ភ្ជាប់​ទៅ​គេហទំព័រ​ទាក់ទង

អាមេរិក​កំពុងពិចារណាដាក់គ្រឿង​សព្វាវុធ​យោធា​នៅ​អ៊ឺរ៉ុបខាងកើត


រូបភាព​ឯកសារ ៖ យន្តហោះ​ចម្បាំង​អាមេរិក​ចត​នៅ​ឯ​ព្រលាន​យន្តហោះ​ក្នុង​រដ្ឋធានី​ Riga ប្រទេស​ឡេតូនី​ កាល​ពី​ថ្ងៃ​ទី​២៤​ ខែ​មេសា ឆ្នាំ​២០១៥។​

ក្រុម​មន្ត្រី​បាន​និយាយ​កាល​ពី​ថ្ងៃ​សៅរ៍ថា ​សហរដ្ឋ​អាមេរិក​កំពុង​ពិចារណា​ដាក់គ្រឿង​សព្វាវុធ​និង​គ្រឿង​ឧបករណ៍​ធុន​ធ្ងន់​នៅ​ក្នុង​ប្រទេស​មួយ​ចំនួន​ ក្នុង​តំបន់​សមុទ្រ​បាល់ទិក​និង​ផ្នែក​ខាង​កើត​នៃ​ទ្វីបអឺរ៉ុប។​

គេ​បាន​និយាយ​ថា​ សំណើ​នេះ​ជា​ការ​បញ្ចូន​សញ្ញា​ខ្លាំង​មួយ​ទៅ​កាន់​ប្រធានាធិបតី​រុស្សី​ Vladimir Putin ថា​ស.រ.អ.​នឹង​ទៅ​ការពារ​ក្រុម​សម្ព័ន្ធ​មិត្ត​អូតង់​របស់​ខ្លួន​ក្នុងភាគ​ខាង​កើត​នៃ​ទ្វីប​អឺរ៉ុប។​

វិធានការ​នេះ​ត្រូវ​បាន​រាយការណ៍​ជា​ដំបូង​នៅ​ក្នុង​កាសែត The New York Timesកាល​ថ្ងៃ​សៅរ៍។​

ភាពតានតឹង​មាន​សភាព​ធ្ងន់ធ្ងរ​រួច​ស្រេច​ហើយ​នៅ​ភាគ​ខាង​កើត​នៃ​ទ្វីប​អឺរ៉ុប​ ក្រោយ​ពេល​រុស្សី​បាន​ចូល​កាន់​កាប់​ឧបទ្វីប​គ្រីម៉េ​នៃ​ប្រទេស​អ៊ុយក្រែន ​និង​នៅ​ពេល​មាន​ជម្លោះ​ដែល​កំពុង​មាន​ត​ទៅ​ទៀត​ក្នុង​អ៊ុយក្រែន។​

សារព័ត៌មាន The New York Times ​បាន​ផ្សាយ​ថា​ លោក​រដ្ឋមន្ត្រី​ការពារ​ប្រទេស​ស.រ.អ. Ash Carter និង​សេតវិមាន​ត្រូវ​យល់​ព្រម​ដល់​សំណើ​នេះ​ ដែល​នឹង​បញ្ជូន​គ្រឿង​សព្វាវុធ​និង​អាវុធ​ទៅ​កាន់​ប្រទេស​ ប៊ុលហ្គារី​ អេស្តូនី​ ឡេតូនី​ លីទុយអានី ប៉ូឡូញ រ៉ូម៉ានី​ និង​ប្រហែល​ជា​ប្រទេស​ហុងគ្រី​ផង​ដែរ។​

លោក Raimonds Vejonis ​រដ្ឋមន្ត្រី​ការពារ​ប្រទេស​នៃ​ប្រទេស​ឡេតូនី​បាន​និយាយ​ប្រាប់កាសែត​ The New York Times ​ថា​ «ប្រសិន​បើ​មាន​អ្វី​កើត​ឡើង​ យើង​មិន​អាច​រង់​ចាំ​ច្រើន​ថ្ងៃ​ឬ​ច្រើន​អាទិត្យ​ ដើម្បី​ទទួល​គ្រឿង​សព្វាវុធ​ថែម​ទៀត​ទេ។​ យើង​ត្រូវ​ការ​ធ្វើ​ប្រតិកម្ម​ជា​បន្ទាន់​»៕

XS
SM
MD
LG