ភ្ជាប់​ទៅ​គេហទំព័រ​ទាក់ទង

សហរដ្ឋ​អាមេរិក​ធ្វើ​ការ​ហោះហើរ​យន្តហោះ​ទម្លាក់​គ្រាប់​បែក​លើ​ឧបទ្វីប​កូរ៉េ


កងកម្លាំង​ការពារ​អាកាស​ជប៉ុន​ និង​យន្តហោះ​ទម្លាក់គ្រាប់បែក​អាមេរិក​ហោះ​ជាមួយយន្តហោះ​ចម្បាំង​ជប៉ុន F-2 លើ​កោះ Kyushu ភាគខាងត្បូង​ប្រទេស​ជប៉ុនក្នុង​សមយុទ្ធរួមគ្នា​រវាងជប៉ុននិង​អាមេរិក។

កងទ័ព​អាកាស​សហរដ្ឋ​អាមេរិក​បាន​ធ្វើ​ការ​ហោះហើរ​យន្តហោះ​ទម្លាក់​គ្រាប់​បែក B-1B ពីរ​គ្រឿង អម​ដោយ​យន្តហោះ​ចម្បាំង​កូរ៉េ​ខាង​ត្បូង និង​យន្តហោះ​ចម្បាំង​ជប៉ុន លើ​ឧបទ្វីប​កូរ៉េ​កាល​ពី​ថ្ងៃ​សៅរ៍​ម្សិលមិញ។

ទីបញ្ជាការ​សហរដ្ឋ​អាមេរិក​ប្រចាំ​តំបន់​ប៉ាស៊ីហ្វិក​បាន​បញ្ជាក់​ថា បេសកកម្ម​នេះ​គឺ​ជា «ការ​ឆ្លើយតប​ដោយ​ផ្ទាល់‍» ទៅ​នឹង​ការ​បាញ់​គ្រាប់​ផ្លោង​មីស៊ីល​ឆ្លង​ទ្វីប​របស់​កូរ៉េ​ខាង​ជើង​កាល​ពី​ថ្ងៃ​ទី ៣ និង​ថ្ងៃ​ទី ២៨ ខែ​កក្កដា​កន្លង​ទៅ​នេះ។

លោក​ឧត្ដមសេនីយ៍ Terrence O'Shaughnessy មេបញ្ជាការ​កងទ័ព​អាកាស​សហរដ្ឋ​អាមេរិក​ប្រចាំ​តំបន់​ប៉ាស៊ីហ្វិក បាន​និយាយ​ថា៖ «ប្រទេស​កូរ៉េ​ខាង​ជើង​នៅ​តែ​ជា​ការ​គំរាម​កំហែង​ដ៏​ខ្លាំងក្លា​ជាទី​បំផុត​ចំពោះ​ស្ថិរភាព​នៅ​ក្នុង​តំបន់។ យើង​នៅតែ​ផ្ដល់​អាទិភាព​លើ​វិធីសាស្ត្រ​ការទូត ប៉ុន្តែ​យើង​មាន​ការ​ទទួល​ខុស​ត្រូវ​ចំពោះ​សម្ព័ន្ធមិត្ត​របស់​យើង និង​ចំពោះ​ប្រទេស​ជាតិ​របស់​យើង ដើម្បី​បង្ហាញ​អំពី​ការ​ប្ដេជ្ញា​មិន​ប្រែប្រួល​របស់​យើង ស្រប​ពេល​ដែល​យើង​ត្រៀម​ខ្លួន​សម្រាប់​ពេល​មាន​ករណី​អាក្រក់​ធ្ងន់ធ្ងរ​ណា​មួយ​កើត​ឡើង។ ប្រសិន​បើ​ជា​សម្ព័ន្ធមិត្ត​របស់​យើង​ហៅ​ឲ្យ​យើង​ជួយ យើង​ត្រៀម​ឆ្លើយតប​ដោយ​កម្លាំង​ខ្លាំងក្លា​ឲ្យ​បាន​លឿន​ជា​ទី​បំផុត នៅ​ពេល​ណា​ក៏​បាន‍»។

បេសកកម្ម​រួម​គ្នា​រយៈពេល ១០ ម៉ោង​នេះ បាន​ចាប់ផ្ដើម​ចេញ​ពី​មូលដ្ឋាន​ទ័ព​អាកាស Andersen នៅ​លើ​កោះ Guam។ យន្តហោះ​ទម្លាក់​គ្រាប់​បែក​របស់​កងទ័ព​អាកាស​សហរដ្ឋ​អាមេរិក​ត្រូវ​បាន​ចូលរួម​ជាមួយ​ដោយ​យន្តហោះ​ចម្បាំង F-2 របស់​ជប៉ុន​ចំនួន​ពីរ​គ្រឿង នៅ​លើ​ដែន​អាកាស​ជប៉ុន។ បន្ទាប់​មក យន្តហោះ​ទម្លាក់​គ្រាប់​បែក​អាមេរិក​ទាំង​នេះ បាន​ហោះ​ពី​លើ​ឧបទ្វីប​កូរ៉េ ដែល​អម​ដោយ​យន្តហោះ​ចម្បាំង​កូរ៉េ​ខាង​ត្បូង​ចំនួន ៤ គ្រឿង។

កាល​ពី​ថ្ងៃ​សៅរ៍​ម្សិលមិញ​នេះ​ដែរ ប្រធានាធិបតី​សហរដ្ឋ​អាមេរិក​លោក Donald Trump ជា​ថ្មី​ម្ដង​ទៀត បាន​រិះគន់​ប្រទេស​ចិន​ថា​បាន​បរាជ័យ​បញ្ឈប់​កម្មវិធី​គ្រាប់​ផ្លោង​មីស៊ីល និង​អាវុធ​នុយក្លេអ៊ែរ​របស់​កូរ៉េ​ខាង​ជើង៕

XS
SM
MD
LG