ទីក្រុង Saclay ប្រទេសបារាំង — សហរដ្ឋអាមេរិកនិងសហភាពអឺរ៉ុបមានគម្រោងប្រកាសនៅថ្ងៃចន្ទនេះ នូវកិច្ចណប្រឹងប្រែងរួមគ្នា ដែលមានគោលបំណងបង្កើនការផ្គត់ផ្គង់បន្ទះអេឡិកត្រូនិក Semiconductor ដែលមានភាពរអាក់រអួល និងដើម្បីប្រឆាំងព័ត៌មានក្លែងក្លាយរបស់រុស្ស៊ី។ នេះបើតាមការបញ្ជាក់របស់មន្ត្រីមួយចំនួន ហើយត្រូវបានរាយការណ៍ដោយទីភ្នាក់ងារព័ត៌មាន AFP។
ក្រុមមន្ត្រីសហរដ្ឋអាមេរិកកំពូលៗកំពុងបំពេញទស្សនកិច្ចនៅមជ្ឈមណ្ឌលវិទ្យាសាស្ត្របារាំង Saclay ដើម្បីជួបជាមួយក្រុមប្រឹក្សាពាណិជ្ជកម្មនិងបច្ចេកវិទ្យាដែលត្រូវបានបង្កើតកាលពីឆ្នាំទៅ នៅពេលដែលចិនបានបង្កើនឥទ្ធិពលខាងព័ត៌មានវិទ្យានោះ។
មន្ត្រីសហរដ្ឋអាមេរិកបានទទួលស្គាល់ថា ការឈ្លានពានរបស់រុស្ស៊ីលើប្រទេសអ៊ុយក្រែនបានពង្រីកតួនាទីរបស់ក្រុមប្រឹក្សាពាណិជ្ជកម្មនិងបច្ចេកវិទ្យានេះ ក៏ប៉ុន្តែ បាននិយាយថា ប្លុកប្រទេសលោកខាងលិចនៅតែយកចិត្តទុកដាក់លើការប្រកួតប្រជែងពីប្រទេសចិននៅឡើយ។
ភាគីទាំងពីរ នឹងប្រកាសពី «ប្រព័ន្ធព្រមានមុនដំបូង» សម្រាប់ការបង្អាក់ការផ្គត់ផ្គង់បន្ទះអេឡិកត្រូនិកSemiconductor ដោយសង្ឃឹមថា នឹងបញ្ចៀសការប្រកួតប្រជែងដ៏ខ្លាំងរវាងមហាអំណាចលោកខាងលិចសម្រាប់សមាសភាពបច្ចេកវិទ្យាសំខាន់ៗ។
ឧស្សាហកម្មនេះបានទទួលរងការប៉ះពាល់មកពីការខ្វះខាតបន្ទះ Chip ដោយសារតែតម្រូវការផលិតផលអេឡិកត្រូនិកទូទាំងសាកលលោក និងការរាតត្បាតនៃជំងឺកូវីដ១៩ ដែលបានបង្អាក់សង្វាក់ផ្គត់ផ្គង់។
មន្ត្រីម្នាក់ដែលបាននិយាយដាច់ដោយឡែកនិងក្នុងលក្ខខណ្ឌមិនបញ្ចេញឈ្មោះថា គោល បំណងនេះ គឺថា «នៅពេលដែលរដ្ឋាភិបាលក្រុងវ៉ាស៊ីនតោននិងរដ្ឋាភិបាលក្រុងប៊្រុចសែលស្វះស្វែងលើកទឹកចិត្តការវិនិយោគទុនលើបន្ទះអេឡិកត្រូនិក Semiconductor នៅក្នុងប្រទេសរបស់យើង យើងធ្វើដូច្នេះនៅក្នុងលក្ខណៈនៃការសម្របសម្រួលគ្នា ហើយយើងមិនលើកទឹកចិត្តឱ្យមានការប្រកួតប្រជែងដោយមានការឧបត្ថម្ភប្រាក់ពីរដ្ឋាភិបាលនោះទេ»។
មន្ត្រីរូបនោះបាននិយាយបន្ថែមទៀតថា ភាគីទាំងពីរកំពុងពិនិត្យមើលលើការបង្អាក់ការផ្គត់ផ្គង់ដែលបណ្តាលមកពីការបិទខ្ទប់ដោយសារជំងឺរាតត្បាតកូវីដវី១៩ នៅក្នុងប្រទេសចិន ដែលជាប្រទេសមានសេដ្ឋកិច្ចដ៏សំខាន់មួយ ដែលកំពុងអនុវត្តយុទ្ធសាស្ត្រគ្មានជំងឺកូវីដ១៩ នៅក្នុងប្រទេសរបស់ខ្លួននោះ។
សហភាពអឺរ៉ុបនិងសហរដ្ឋអាមេរិក ក៏នឹងប្រកាសវិធានការរួមគ្នាលើការប្រយុទ្ធប្រឆាំងព័ត៌មានក្លែងក្លាយនិងការលបចូលក្នុងប្រព័ន្ធកំព្យូទ័រ ជាពិសេសសកម្មភាពចេញពីប្រទេសរុស្ស៊ីរួមទាំងការណែនាំស្តីពីការអនុវត្តដ៏ល្អបំផុតនូវសន្តិសុខប្រព័ន្ធកំព្យូទ័រសម្រាប់ក្រុមហ៊ុនតូចៗនិងមធ្យម និងក្រុមការងារស្តីពីការផ្គត់ផ្គង់បច្ចេកវិទ្យាដែលទុកចិត្តបានផងដែរ៕
