Toyota ដែលជាក្រុមហ៊ុនផលិតរថយន្តលក់ដាច់ជាងគេបំផុតនៅលើពិភពលោក បានបញ្ជាក់កាលពីថ្ងៃអង្គារថា ខ្លួនលែងរំពឹងថា នឹងអាចផលិតរថយន្តទៅតាមគោលដៅកំណត់ប្រចាំឆ្នាំរបស់ខ្លួនដោយសារតែកំពុងជួបបញ្ហានៃកង្វះខាតគ្រឿងអេឡិចត្រូនិករថយន្តជាសាកល។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។
ការខ្វះខាតគ្រឿងអេឡិចត្រូនិក microchipដែលជាគ្រឿងបង្គុំដ៏សំខាន់សម្រាប់រថយន្តទំនើបនៅទូទាំងពិភពលោក បានបង្ខំឲ្យក្រុមហ៊ុនផលិតរថយន្តជាច្រើនដែលក្នុងនោះក៏មានក្រុមហ៊ុន Toyota ផងដែរ បានពន្យារពេល ឬផ្អាកជាបណ្តោះអាសន្ននូវសង្វាក់ផលិតកម្មរបស់ខ្លួន។
កាលពីខែកញ្ញា ក្រុមហ៊ុនផលិតរថយន្តដ៏ធំរបស់ជប៉ុន បានបញ្ចុះចំនួនរថយន្តដែលខ្លួនសង្ឃឹមថា នឹងផលិតក្នុងមួយឆ្នាំទៅដល់ខែមីនា ឆ្នាំ២០២២នេះ ពីចំនួន៩លាន៣សែនគ្រឿងមកត្រឹម៩លានគ្រឿង។
ក៏ប៉ុន្តែ ក្រុមហ៊ុននេះ បានបញ្ជាក់កាលពីថ្ងៃអង្គារថា ការកាត់បន្ថយនៃការផលិតរថយន្តនៅខែក្រោយនេះ មានន័យថា ក្រុមហ៊ុនទំនងមិនអាចសម្រេចការផលិតរថយន្តរបស់ខ្លួនដូចតាមការកំណត់ទុកនោះឡើយ។
ក្រុមហ៊ុន Toyota បានបញ្ជាក់ក្នុងសេចក្តីថ្លែងការណ៍ថា៖ «តម្រូវការនាពេលបច្ចុប្បន្ននេះ គឺមានការកើនឡើងខ្លាំង ដូច្នេះយើងមានគម្រោងនឹងបង្កើនការផលិតឲ្យបានខ្ពស់នៅក្នុងខែកុម្ភៈខាងមុខនេះ»។
ក៏ប៉ុន្តែ ដោយសារតែបញ្ហានៃការបន្តការខ្វះគ្រឿងអេឡិចត្រូនិក Semiconductor ក្នុងឧស្សាហកម្មផលិតរថយន្តនោះ ក្រុមហ៊ុន Toyota បាននិយាយថា ខ្លួនបានកាត់បន្ថយការផលិតសម្រាប់ទីផ្សារសាកលលោករបស់ខ្លួនមកនៅត្រឹមប្រមាណ៧សែនគ្រឿងនៅក្នុងខែកុម្ភៈខាងមុខនេះ គឺមានចំនួន១សែន៥ម៉ឺនគ្រឿងតិចជាងកាលពីពេលមុន។
សេចក្តីថ្លែងការណ៍របស់ក្រុមហ៊ុន Toyota បន្តទៀតថា៖ «ដោយសារការសើរើពិនិត្យមើលឡើងវិញ ការព្យាករផលិតផលមួយឆ្នាំពេញសម្រាប់ឆ្នាំសារពើពន្ធត្រូវបានគេរំពឹងទុកថា នឹងមានចំនួនទាបជាងការព្យាករកាលពីពេលមុនថា មានចំនួន៩លានគ្រឿង៕
