ស្ថានទូតអាមេរិកប្រចាំនៅទីក្រុងប៉េកាំងកំពុងតែប្រកាសអំពីភាពដែលអាចកើតឡើងនៃការគំរាមកំហែងភេរវកម្មទៅលើជនបរទេសនៅក្នុងតំបន់ Sanlitun ក្នុងថ្ងៃបុណ្យណូអែល ឬអំឡុងពេលប៉ុន្មានថ្ងៃនេះ។
ពុំទាន់មានព័ត៌មានលម្អិតណាមួយអំពីការគំរាមកំហែងនេះនៅឡើយទេ ថ្វីត្បិតតែមានសញ្ញាណនៃការបង្កើនកងកម្លាំងប៉ូលិសនៅក្នុងខណ្ឌ ដែលសម្បូរទៅដោយកន្លែងកម្សាន្តពេលរាត្រីដ៏មានប្រជាប្រិយ និងហាងទំនិញអន្តរជាតិនេះក៏ដោយ។
ស្ថានទូតអាមេរិកបានជំរុញឲ្យពលរដ្ឋអាមេរិកាំងទាំងអស់បង្កើនការប្រុងប្រយ័ត្នខ្ពស់។ ស្ថានទូតអង់គ្លេស និងបារាំងក៏បានចេញសេចក្ដីប្រកាសស្រដៀងគ្នានេះដែរ។
ប៉ូលិសទីក្រុងប៉េកាំងបាននិយាយថា ខ្លួនបានផ្តួចផ្តើមឲ្យមានការប្រុងប្រយ័ត្នសន្តិសុខកម្រិតពណ៌លឿង នៅតាមផ្សារលក់ទំនិញ និងផ្សារទំនើបនានាក្នុងអំឡុងពេលនៃថ្ងៃបុណ្យណូអែលនេះ។
ទីភ្នាក់ងារសារព័ត៌មានផ្លូវការស៊ីនហួរបានឲ្យដឹងថា ការប្រកាសឲ្យប្រុងប្រយ័ត្នពណ៌លឿងគឺស្ថិតនៅលំដាប់ទី២នៅក្នុងប្រព័ន្ធប្រុងប្រយ័ត្នទាំង៤ពណ៌ ដែលរួមមានពណ៌បៃតង ពណ៌លឿង ពណ៌ទឹកក្រូច និងពណ៌ក្រហម ទៅតាមលំដាប់ធ្ងន់ស្រាល។
សេចក្ដីរាយការណ៍នេះមានសេចក្ដីថា «យោងតាមបទបញ្ញត្តិការពារសុវត្ថិភាពរបស់រដ្ឋាភិបាល សេចក្ដីប្រកាសនេះមានន័យថា ៦០ភាគរយនៃបុគ្គលិកសន្តិសុខនៅក្នុងផ្សារលក់ទំនិញ និងផ្សារទំនើបទាំងនោះគួរតែធ្វើការត្រួតពិនិត្យសន្តិសុខទៅលើបុគ្គលិក សម្ភារៈ និងយានយន្តណាដែលគួរឲ្យសង្ស័យ»៕
