ភ្ជាប់​ទៅ​គេហទំព័រ​ទាក់ទង

site logo
ព័ត៌មាន​​ថ្មី

សមាជិក​ព្រឹទ្ធសភា​គណបក្ស​ប្រជា​ធិបតេយ្យ​បង្ហាញ​ផែនការ​សុវត្ថិភាព​សង្គម


សមាជិក​គណបក្ស​ប្រជាធិបតេយ្យ លោក Bernie Sanders (ឆ្វេង) និង​លោក Chuck Schumer (ស្ដាំំ) ថ្លែង​ទៅ​កាន់​​អ្នកកាសែត​ ខណៈ​ដែល​ពួកគេ​​ចេញ​ពី​កិច្ចប្រជុំ​មួយ​នៅ​វិមាន​សភា​សហរដ្ឋ​អាមេរិក ក្នុង​រដ្ឋធានី​វ៉ាស៊ីនតោន ថ្ងៃទី៩ ខែសីហា ឆ្នាំ២០២១។

សមាជិក​ព្រឹទ្ធ​សភា​គណបក្ស​ប្រជា​ធិបតេយ្យ កាល​ពី​ថ្ងៃ​ច័ន្ទ បាន​បង្ហាញ​សំណើ​លម្អិត​ស្តីពី​កម្ម​វិធី​សុវត្ថិភាព​សង្គម​មាន​ទឹក​ប្រាក់​៣,៥​ លានលាន​ដុល្លារ​ ដែល​នឹង​ពង្រីក​តួនាទី​រដ្ឋាភិបាល​ថ្នាក់​ជាតិ​សម្រាប់​ជីវភាព​របស់​ពលរដ្ឋ​អាមេរិកាំង​រាប់​លាន​នាក់។

ផែនការ​នេះ​បំពេញ​ការ​សន្យា​ក្នុង​យុទ្ធនាការ​បោះ​ឆ្នោត​ប្រធានាធិបតី​កាល​ពី​ឆ្នាំ​ទៅ​របស់​ លោក​ Joe Biden ​ដើម្បី​ជួយ​ឲ្យ​ពលរដ្ឋ​អាមេរិក​ដែល​មាន​ជីវភាព​ទន់​ខ្សោយ​មាន​ឱកាស​មាន​ជីវភាព​វណ្ណៈ​កណ្តាល។​ ស្រប​ពេល​ជា​មួយ​គ្នា​នេះ​ដែរ​ កម្មវិធី​នេះ ក៏​នឹង​ពង្រីក​សេវា​របស់​រដ្ឋាភិបាល​ដែល​មាន​រួច​ហើយ​ និង​កម្មវិធី​ថ្មីៗ​ផង​ដែរ។

ផែនការ​នេះ​នឹង​ផ្តល់នូវ​ការ​អប់រំ​កម្រិត​មត្តេយ្យ​ដោយ​ឥត​គិត​ថ្លៃ​ជា​សកល​សម្រាប់​កុមារ​អាយុ​៣​និង​៤​ ឆ្នាំ​និង​ថ្នាក់​មហា​វិទ្យាល័យ​សហគមន៍​ឥត​គិត​ថ្លៃ​ពីរ​ឆ្នាំ​សម្រាប់​និស្សិត​បញ្ចប់​ការ​សិក្សា​នៅ​វិទ្យាល័យ។​ សម្រាប់​ជនជាតិ​អាមេរិក​វ័យ​ចំណាស់​ ផែនការ​នេះ​នឹង​បង្កើន​ការ​ចំណាយ​របស់​សហព័ន្ធ​សម្រាប់​ការ​បន្ថែម​អត្ថ​ប្រយោជន៍​នៃ​ការ​ថែទាំ​សុខភាព​ដោយ​ផ្តល់​មូលនិធិ​ជា​លើក​ដំបូង​សម្រាប់​ការ​ថែទាំ​សុខភាពធ្មេញ​ ភ្នែក​ និង​ត្រចៀក។

ផែនការ​របស់​សមាជិក​ព្រឹទ្ធ​សភា​គណបក្ស​ប្រជាធិបតេយ្យ​នេះ​មិន​ទទួល​បាន​ការ​គាំទ្រ​ពី​ខាង​សមាជិក​សភា​គណបក្ស​សាធារណរដ្ឋ​នោះ​ទេ​ ដោយ​ពួកគេ​លើក​ឡើង​ថា​ គម្រោង​នេះ​ចំណាយ​ច្រើន​ណាស់​ និង​ហាក់​ដូច​ជា​មាន​ទំនោរ​ខ្លាំង​ឆ្ពោះ​ទៅ​បំណង​ពង្រីក​រដ្ឋាភិបាល​តាម​បែប​សង្គម​និយម។ លុយ​នេះ​គួរ​តែ​យក​ទៅ​ប្រើ​ប្រាស់​ប្រយុទ្ធ​ប្រឆាំង​នឹង​ការ​ប្រែប្រួល​អាកាធាតុ​ កែ​ច្បាប់​អន្តោប្រវេសន៍​សហព័ន្ធ​ និង​បន្ថយ​តម្លៃ​ថ្នាំ​ពេទ្យ​ចេញ​ដោយ​វេជ្ជបញ្ជា។ សមាជិក​សភា​មួយ​ចំនួន​ខាង​គណបក្ស​ប្រជា​ធិបតេយ្យ​ ក៏​បង្ហាញ​ភាព​អល់អែក​ស្តីពី​ការ​ចំណាយ​ច្រើន​របស់​សំណើ​នេះ​ដែរ។

សេចក្តី​ស្នើ​ចំណាយ​ថ្មី​នេះ​ គឺ​បន្ថែម​ទៅ​លើ​កញ្ចប់​ថវិកា​សម្រាប់​ហេដ្ឋា​រចនា​សម្ព័ន្ធ​ ដែល​មាន​ទឹក​ប្រាក់​ប្រមាណ​១លាន​លាន​ដុល្លារ​ សម្រាប់​ផ្លូវ​ថ្នល់​ ស្ពាន​ ​ពង្រីក​ប្រព័ន្ធ​អ៊ីនធឺណិត​លឿន​ និង​ពង្រីក​ផ្លូវ​រថភ្លើង​និង​ស្ថានីយ​អ្នក​ដំណើរ​ឆ្លងកាត់​ដែលេជិត​ទទួល​បាន​ការ​អនុម័ត​ពី​ព្រឹទ្ធសភា​ នៅ​ថ្ងៃ​អង្គារ៕

XS
SM
MD
LG