ការបិទរដ្ឋាភិបាលសហរដ្ឋអាមេរិកមួយផ្នែកបានចូលដល់ថ្ងៃទី ៣១ ហើយ នៅថ្ងៃចន្ទនេះ ដោយមេដឹកនាំគណបក្សសាធារណរដ្ឋនៃព្រឹទ្ធសភាកំពុងរៀបចំការបោះឆ្នោតលើសំណើមួយ ដែលលោកប្រធានាធិបតី Donald Trump ហៅថាជាការសម្របសម្រួល ហើយក្រុមមេដឹកនាំគណបក្សប្រជាធិបតេយ្យហៅថាជាសំណើដែលបរាជ័យរួចទៅហើយ។
គម្រោងរបស់លោក Trump គឺនឹងផ្ដល់ការការពាររយៈពេល ៣ ឆ្នាំ មិនឲ្យមានការបញ្ជូនចេញពីសហរដ្ឋអាមេរិកនូវជនអន្តោប្រវេសន៍រាប់សែននាក់ ដែលចូលមកក្នុងសហរដ្ឋអាមេរិកដោយខុសច្បាប់តាំងពីនៅកុមារ ក៏ដូចជាពន្យារពេលបន្ថែមនូវឋានៈដែលមានការការពារសម្រាប់អ្នកដែលរត់គេចពីប្រទេសកំណើតដោយសារអំពើហិង្សា ឬក៏គ្រោះមហន្តរាយធម្មជាតិ។ ជាថ្នូរនឹងគម្រោងនេះ លោក Trump ចង់បានថវិកា ៥ ពាន់ ៧ រយលានដុល្លារ ដើម្បីសាងសង់ជញ្ជាំងព្រំដែនជាប់ប្រទេសម៉ិកស៊ិក។
សមាជិកសភាខាងគណបក្សប្រជាធិបតេយ្យប្រឆាំងនឹងការសាងសង់ជញ្ជាំងព្រំដែន ដោយអះអាងថា វាជាដំណោះស្រាយសន្តិសុខគ្មានប្រសិទ្ធភាព និងចំណាយច្រើន។ គណបក្សប្រជាធិបតេយ្យចង់ឲ្យលោក Trump និងគណបក្សសាធារណរដ្ឋយល់ព្រមបើករដ្ឋាភិបាលឡើងវិញជាមុនសិន មុននឹងពិភាក្សាអំពីគម្រោងសន្តិសុខព្រំដែនផ្សេងទៀត។
លោក Mitch McConnell មេដឹកនាំខាងគណបក្សសាធារណរដ្ឋនៃព្រឹទ្ធសភា បាននិយាយថា លោកគ្រោងដាក់សំណើរបស់លោក Trump ឲ្យព្រឹទ្ធសភាបោះឆ្នោតនៅក្នុងរយៈពេលប៉ុន្មានថ្ងៃខាងមុខនេះ ទោះបីជាលោកនឹងត្រូវការការគាំទ្រពីសមាជិកគណបក្សប្រជាធិបតេយ្យមួយចំនួនដើម្បីអនុម័តលើសំណើនេះក៏ដោយ។
ចំណែកឯនៅខាងរដ្ឋសភាវិញ ប្រធានរដ្ឋសភាលោកស្រី Nancy Pelosi ថា លោកស្រីគ្រោងនឹងរៀបចំការបោះឆ្នោតនៅសប្ដាហ៍នេះ លើការបន្ថែមចំនួនចៅក្រមផ្នែកអន្តោប្រវេសន៍ និងថវិកាដើម្បីពិនិត្យលើរថយន្ត និងគ្រឿងញៀននៅឯច្រកព្រំដែន៕
