ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក​ Trump នឹង​ថ្លែង​សុន្ទរកថា​ទៅ​កាន់​ប្រទេសជាតិអំពី​ការបិទ​រដ្ឋាភិបាល​និង​សន្តិសុខ​ព្រំដែន


ប្រធានាធិបតី​សហរដ្ឋ​អាមេរិក​ ដូណាល់ ត្រាំ ថ្លែង​អំពី​គោលលទ្ធិការពារ​របស់​អាមេរិកាំង​កាលពី​ថ្ងៃព្រហស្បតិ៍​ទី​១៧ ខែមករា ឆ្នាំ២០១៩។
ប្រធានាធិបតី​សហរដ្ឋ​អាមេរិក​ ដូណាល់ ត្រាំ ថ្លែង​អំពី​គោលលទ្ធិការពារ​របស់​អាមេរិកាំង​កាលពី​ថ្ងៃព្រហស្បតិ៍​ទី​១៧ ខែមករា ឆ្នាំ២០១៩។

លោកប្រធានាធិបតីស.រ.អា. Donald Trump បាន​និយាយ​ថា​លោកនឹង​ធ្វើសចក្តី​ប្រកាស​សំខាន់មួយ​អំពី​ការបិទ​រដ្ឋាភិបាល​និង​សន្តិសុខ​ព្រំដែន​នៅក្នុង​សុន្ទរកថា​មួយ​ទៅកាន់ប្រទេស​ជាតិ​នៅថ្ងៃ​សៅរ៍​នេះ។

លោក Trump បាន​និយាយ​ថា​លោកនឹង​ថ្លែង​អំពី​សេចក្តី​ប្រកាស​នេះ​ពី​សេតវិមាន​នៅម៉ោង​៣រសៀល​ហើយ​លោក​នឹង​និយាយ​អំពី «វិបត្តិ​មនុស្ស​ធម៌​នៅ​តាម​ព្រំដែន​ខាង​ត្បូង​របស់យើង»។

ភាព​មិនឈ្នះ​មិនចាញ់​រវាង​ពួក​ប្រជាធិបតេយ្យ​និង​សាធារណរដ្ឋ​អំពីការកសាង​ជញ្ជាំង​មួយ​តាម​បណ្តោយ​ព្រំដែនរវាង​ស.រ.អា.​និង​ប្រទេសម៉ិកស៊ិក​បាននាំ​ឱ្យ​មាន​ការ​បិទ​រដ្ឋាភិបាល​ដែល​ចូលក្នុង​ថ្ងៃ​ទី២៩​ហើយ​នៅ​ថ្ងៃ​សៅរ៍​នេះ។​

លោក​ Trump បាន​អំពាវ​នាវឱ្យ​មាន​ការ​ផ្តល់​ប្រាក់​៥ពាន់លាន​ដុល្លារ​ពី​ក្រុម​អ្នកបង់ពន្ធដារ​អាមេរិកាំង​សម្រាប់​ការ​ស្ថាបនា​ជញ្ជាំង​នេះ​ ចំណែក​ឯពួក​ប្រជាធិបតេយ្យ​វិញ​បានស្នើ​ផ្តល់ប្រាក់ជាង​១ពាន់លាន​ដុល្លារ​ជា​ប្រាក់កាស​ថ្មី​សម្រាប់​កិច្ច​ការពារ​សន្តិសុខ​ព្រំដែន ក៏​ប៉ុន្តែ​គ្មាន​ទឹកប្រាក់​ជាក់លាក់​សម្រាប់ការ​កសាង​ជញ្ជាំង​នេះទេ។

ប្រភព​គណបក្ស​ប្រជាធិបតេយ្យនិយាយ​ថា​ទឹកប្រាក់​នេះ​នឹងមានរួម​បញ្ចូល​នៅ​ក្នុង​សេចក្តី​ព្រាង​ច្បាប់ចំណាយដែល​សភា​តំណាង​រាស្ត្រអាមេរិកាំង​នឹង​ពិចារណា​នៅសប្តាហ៍​ក្រោយ​គឺ​មាន​៥២៤លាន​ដុលា្លរ​ដើម្បី​កែ​លម្អ​កន្លែង​ចូល​ក្នុង​ប្រទេស​អាមេរិក​និង​ ៥៦៣លានដុល្លារ​ទៀត​សម្រាប់​ជួល​ពួកចៅក្រម​ខាង​អន្តោ​ប្រវេសន៍​ថែមទៀត។​

ជម្លោះ​អំពី​ជញ្ជាំង​ព្រំដែន​និង​ការ​បិទ​រដ្ឋាភិបាល​ក៏​បាននាំ​ឱ្យមានជម្លោះ​មួយ​រវាង​លោក​ Trump និង​លោកស្រី​ Nancy Pelosi អំពី​ផែនការ​លោកស្រី​ក្នុងការ​ធ្វើ​ដំណើរ​ទៅប្រទេស​អាហ្វហ្គានីស្ថាន។

កាលពី​ថ្ងៃសុក្រ​លោកស្រី​ Pelosi ក៏​បាន​ចោទ​ប្រកាន់​សេតវិមាន​ថា​បាន​ធ្វើ​ឱ្យ​លេច​ព័ត៌មានអំពី​គម្រោង​ធ្វើដំណើរ​របស់​លោកស្រី​តាមយន្តហោះ​ជំនួញ​ទៅ​កាន់​ប្រទេស​អាហ្វហ្គានីស្ថាន​នៅ​ក្រោយ​លោក Trump បាន​បដិសេធ​មិន​ឱ្យ​លោកស្រី​ប្រើ​យន្តហោះ​យោធា​មួយ​គ្រឿង​សម្រាប់​ការ​ធ្វើ​ដំណើរ​នេះ៕

XS
SM
MD
LG