អនុប្រធានាធិបតីសហរដ្ឋអាមេរិកលោក Mike Pence នឹងដឹកនាំគណៈប្រតិភូជាន់ខ្ពស់ធ្វើដំណើរទៅប្រទេសតួកគីនៅថ្ងៃពុធនេះ ដើម្បីចរចាដាក់លក្ខខណ្ឌឲ្យប្រធានាធិបតីនៃប្រទេសនេះបញ្ឈប់ការវាយលុករបស់ខ្លួននៅភាគខាងជើងប្រទេសស៊ីរី។
កាលពីថ្ងៃអង្គារម្សិលមិញ លោកប្រធានាធិបតី Donald Trump បានថ្លែងនៅក្នុងកិច្ចប្រជុំនៅសេតវិមានថា «យើងកំពុងស្នើឲ្យមានបទឈប់បាញ់គ្នា។ យើងបានដាក់ទណ្ឌកម្មខ្លាំងបំផុត។ យើងមានលក្ខខណ្ឌច្រើនណាស់ដើម្បីចរចាជាមួយនឹងតួកគី រួមទាំងការដំឡើងពន្ធគយខ្ពស់បំផុតលើដែកថែបផងដែរ»។
ចូលរួមជាមួយគណៈប្រតិភូទៅកាន់ទីក្រុងអង់ការ៉ាដែលត្រូវជួបជាមួយប្រធានាធិបតីតួកគីលោក Recep Tayyip Erdogan នៅថ្ងៃព្រហហស្បតិ៍ស្អែកនេះ មានលោក Robert O'Brien ទីប្រឹក្សាសន្តិសុខជាតិ និងលោកឯកអគ្គរដ្ឋទូត James Jeffrey ប្រេសិតពិសេសទទួលបន្ទុកកិច្ចការស៊ីរី និងសម្ព័ន្ធភាពសកលលោកដើម្បីបង្រ្កាបក្រុមរដ្ឋឥស្លាម។
យោងតាមសេចក្តីថ្លែងការណ៍របស់សេតវិមានលោក Pence នឹងប្រកាសពីការប្តេជ្ញាចិត្តរបស់សហរដ្ឋអាមេរិកដើម្បីទទួលបានបទឈប់បាញ់គ្នានិងដាក់លក្ខខណ្ឌដើម្បីចរចារកដំណោះស្រាយ។
សេចក្តីថ្លែងការដដែលនោះក៏បានបញ្ជាក់ផងដែរថា នៅអំឡុងកិច្ចប្រជុំលោកអនុប្រធានាធិបតីក៏នឹងបញ្ជាក់ឡើងវិញអំពីការប្តេជ្ញារបស់លោក Trump ដើម្បីជំរុញដាក់ទណ្ឌកម្មលើប្រទេសតួកគី រហូតទាល់តែមានដំណោះស្រាយ។
មន្រ្តីក្រសួងការបរទេសម្នាក់បាននិយាយកាលពីថ្ងៃអង្គារម្សិលមិញថា «គោលដៅទីមួយគឺអនុវត្តតាមផ្នែកការទូតដើម្បីព្យាយាមស្វែងរកបទឈប់បាញ់ និងដាក់ស្ថានការឲ្យស្ថិតក្រោមការគ្រប់គ្រង។ វាពិតជាច្របូកច្របល់ខ្លាំងណាស់ ហើយវាមានគ្រោះថ្នាក់ណាស់សម្រាប់កងទ័ពរបស់យើង។ វាកំពុងធ្វើឲ្យការប្រយុទ្ធប្រឆាំងនឹងក្រុម ISIS មានភាពគ្រោះថ្នាក់ និងការប្រឈមនៃការគេចខ្លួនចេញពីពន្ធគាររបស់ពួកអ្នកទោស ISIS ជិត១០.០០០ ដែលកងកម្លាំងឃឺតបានឃុំខ្លួនពួកគេផងដែរ»៕
