ភ្ជាប់​ទៅ​គេហទំព័រ​ទាក់ទង

លោក​រដ្ឋ​មន្រ្តី​ការពារ​ប្រទេស​អាមេរិក៖ ​អង្គការ​អូតង់​ជា​គ្រឹះ​ដ៏​រឹងមាំ​នៃ​សន្តិសុខ​ឆ្លង​កាត់​មហាសមុទ្រ​អាត្លង់ទិក


លោក James Mattis ស្តាប់​សំណួរ​ក្នុង​ពេល​សវនការ​នៅ​ចំពោះ​មុខ​គណៈកម្មាការ​ភ្នាក់ងារ​ប្រដាប់​អាវុធ​របស់​ព្រឹទ្ធសភា នៅ​ក្នុង​វិមាន​សភា ក្នុង​រដ្ឋធានី​វ៉ាស៊ីនតោន កាលពី​ថ្ងៃទី១២​ ខែមករា ឆ្នាំ២០១៧។

លោក​រដ្ឋ​មន្រ្តី​ការពារ​ប្រទេស​សហរដ្ឋ​អាមេរិកJames Mattis ​បាន​ស្វះស្វែង​កាល​ពី​ថ្ងៃ​ពុធ​ដើម្បីបន្ធូរ​បន្ថយការ​ព្រួយ​កង្វល់​របស់​អង្គការ​អូតង់​ដោយ​បាន​ប្រាប់​ពីការ​តាំង​ចិត្ត​របស់​សហរដ្ឋ​អាមេរិកដល់​សន្តិសុខ​របស់​សហភាព​អឺរ៉ុប។ លោក​រដ្ឋមន្រ្តី​ការពារ​ប្រទេស​អាមេរិក Mattis មាន​ប្រសាសន៍​ថា ​សម្ព័ន្ធភាព​ខាង​យោធា​ជា​ស្នូល​កណ្តាល​នៃ​ទំនាក់​ទំនង​រវាង​ប្រទេស​អាមេរិក ​និង​សម្ព័ន្ធ​មិត្ត​អឺរ៉ុប។

លោក​រដ្ឋ​មន្រ្តី​ការពារ​ប្រទេស​អាមេរិក Mattis និយាយ​នៅ​ពេល​ដែល​លោក​បាន​ជួប​ជាលើក​ទី​១​ជាមួយ​រដ្ឋ​មន្រ្តី​ការពារ​ប្រទេស​របស់​អង្គការ​អូតង់​នៅ​ទីក្រុង​ប្រ៊ុចសែល (Brussels) ថា «សម្ព័ន្ធភាព​នេះ​នៅតែ​ជា​គ្រឹះ​ដ៏​រឹងមាំ​សម្រាប់​សហរដ្ឋ​អាមេរិក ​និង​សម្រាប់​សហគមន៍​ឆ្លង​កាត់​មហាសមុទ្រ​អាត្លង់ទិក​ទាំងអស់‍»។

សមាជិក​របស់​អង្គការ​អូតង់​មើល​ឃើញ​សន្និសីទ​នេះ​ថា​ជាឱកាស​ដើម្បី​បញ្ចាក់​ឡើង​វិញ​ពី​ការ​តាំង​ចិត្ត​របស់​សហរដ្ឋ​អាមេរិក​ដល់សន្តិសុខ​របស់​តំបន់​អឺរ៉ុប​បន្ទាប់​ពី​ប្រធានាធិបតី​សហរដ្ឋ​អាមេរិក ​ដូណាល់ ​ត្រាំ ​បាន​ចោទ​សួរ​ពី​តម្លៃ​នៃ​សម្ព័ន្ធភាព​ខាង​យោធា​មុន​ និង​ក្រោយ​ការ​បោះឆ្នោត​ប្រធានាធិបតី​សហរដ្ឋ​អាមេរិក​កាល​ពី​ខែ​កញ្ញា ឆ្នាំ​ទៅ។

​ចាប់​តាំង​ពី​ចូល​កាន់​តំណែង​កាល​ពី​ថ្ងៃ​ទី​២០ ​ខែ​មករា​មក ​លោក​ប្រធានាធិបតី​ត្រាំ ​មិន​សូវ​រិះគន់​អង្គការ​អូតង់​ទេ ​ទោះ​ជាយ៉ាង​នោះ​ក៏ដោយ ​លោកប្រធានាធិបតី ​បាន​បន្ត​រិះគន់​សមាជិក​ខ្លះ​ចំពោះ​ការ​ខក​ខាន​មិន​បាន​រួម​វិភាគ​ទាន​ខាង​ហិរញ្ញវត្ថុ​ឲ្យ​បាន​ពេញ​លេញ​ និង​ត្រឹមត្រូវ​ដល់​អង្គការ​អូតង់។

ប្រទេស​នៅ​អឺរ៉ុប​ និងកាណាដា​ដែល​ជា​សមាជិក​អង្គការ​អូតង់ ​បាន​បង្កើន​ការ​ចំណាយ​ខាង​វិស័យ​ការពារ​ប្រទេស​ប្រហែល​១០​ពាន់​លាន​ដុល្លារ​កាល​ពី​ឆ្នាំ​ទៅ ​ក៏ប៉ុន្តែ ​លោក Jens Stoltenberg ​អគ្គលេខាធិការ​អង្គការ​អូតង់​បាន​និយាយ​កាល​ពី​ថ្ងៃ​ពុធ​ម្សិលមិញ​ថា «ចំនួន​នេះ​មិនទាន់​គ្រប់​គ្រាន់​ទេ‍»។

សម្ព័ន្ធ​មិត្ត​ខ្លះរបស់​អង្គការ​អូតង់​ក៏​បាន​សម្តែង​នូវ​ក្តី​ព្រួយកង្វល់​អំពី​អ្វី​ដែល​ពួកគេបាន​ហៅ​ថា ​ជា​ជំហរ​ទន់​ជ្រាយ​ចំពោះ​ប្រទេស​រុស្ស៊ី៕

XS
SM
MD
LG