សហរដ្ឋអាមេរិក និងប្រទេសគុយបា និយាយថា ប្រទេសទាំង២ កំពុងចាត់វិធានការធ្វើឲ្យមានទំនាក់ទំនងជាប្រក្រតីឡើងវិញ ដោយបញ្ចប់ភាពឯកោផ្នែកការទូតអស់រយៈពេលជាងកន្លះទសវត្សរ៍ដែលកើតមានឡើងតាំងពីសង្គ្រាមត្រជាក់។
លោកប្រធានាធិបតីស.រ.អា បារ៉ាក់ អូបាម៉ា និងលោក Raul Castro ប្រធានាធិបតីនៃប្រទេសគុយបា នៅក្នុងសុន្ទរកថានៅពេលជាមួយគ្នាពីរដ្ឋធានីវ៉ាស៊ីនតោន និងរដ្ឋធានីឡាហាវ៉ាន (Havana) បាននិយាយកាលពីថ្ងៃពុធថាលោកទាំងពីរ បានផ្លាស់ប្តូរអ្នកទោសអាមេរិកាំង និងគុយបារវាងគ្នានិងគ្នាដែលបានជាប់ឃុំឃាំងអស់រយៈពេលជាច្រើនឆ្នាំ ហើយឥឡូវនេះនឹងបើកផ្លូវដើម្បីបង្កើនចំណងទាក់ទងខាងផ្នែកសេដ្ឋកិច្ច និងការធ្វើដំណើររវាងប្រទេសទាំង២។
លោក Alan Gross ជាអ្នកធ្វើការតាមកិច្ចសន្យាឲ្យទីភ្នាក់ងារអភិវឌ្ឍន៍អន្តរជាតិរបស់ស.រ.អា បានត្រូវប្រទេសគុយបាដោះលែងកាលពីថ្ងៃពុធបន្ទាប់ពីជាប់ពន្ធនាគារ៥ឆ្នាំពីបទនាំចូលបច្ចេកវិទ្យាដែលបានហាមឃាត់ទៅកាន់ប្រទេសគុយបា។ លោកប្រធានាធិបតី អូបាម៉ា បានមានប្រសាសន៍ថា លោក Gross ជាបុរសម្នាក់ដែលត្រូវបានគេទុកថាជាភ្នាក់ងារស៊ើបការសម្ងាត់ដ៏សំខាន់បំផុតរបស់សហរដ្ឋអាមេរិកបានត្រូវដោះដូរជាមួយភ្នាក់ងារស៊ើបការសម្ងាត់គុយបា៣នាក់ដែលបានចំណាយពេលជាងមួយទសវត្សរ៍ក្នុងគុកនៅស.រ.អា។
លោកអូបាម៉ាប្រកាសការផ្លាស់ប្តូរជាប្រវតិ្តសាស្ត្រមួយចំពោះទំនាក់ទំនងអាមេរិកនិងគុយបា
លោកប្រធានាធិបតី អូបាម៉ា បានមានប្រសាសន៍ថា ការផ្តាច់ទំនាក់ទំនងការទូតរបស់សហរដ្ឋអាមេរិករយៈពេល៥០ឆ្នាំដល់ប្រទេសកុម្មុយនិស្តមួយនេះ មិនបានការនោះទេ ហើយវាជាពេលវេលាមួយសម្រាប់ការចាប់ផ្តើមរកផ្លូវដោះស្រាយថ្មី។ ប្រធានាធិបតី Castro នៃប្រទេសគុយបា បាននិយាយថា មេដឹកនាំអាមេរិកាំង សមនឹងទទួលការគោរព និងទទួលស្គាល់ដោយប្រជាពលរដ្ឋរបស់យើង។
មេដឹកនាំទាំង២ បានសន្ទនាគ្នាតាមទូរស័ព្ទអស់រយៈពេលជាង៤៥នាទីកាលពីថ្ងៃអង្គារ ជាការទាក់ទងដ៏សំខាន់លើកដំបូងរវាងប្រធានាធិបតីស.រ.អា និងគុយបាចាប់តាំងពីឆ្នាំ១៩៦១មក។
ប្រទេសទាំង២ ត្រូវគេរំពឹងនឹងធ្វើការចរចាក្នុងរយៈពេលប៉ុន្មានសប្តាហ៍ទៀតលើកិច្ចព្រមព្រៀងដែលនឹងនាំប្រទេសទាំង២បើកស្ថានទូតក្នុងរដ្ឋធានីវ៉ាស៊ីនតោន និងរដ្ឋធានីឡាហាវ៉ាន (Havana)។ លោកប្រធានាធិបតី អូបាម៉ា បានមានប្រសាសន៍បន្តទៀតថា ចំណងទាក់ទងផ្នែកពាណិជ្ជកម្ម និងការធ្វើដំណើរនឹងត្រូវចាប់ផ្តើម ក៏ប៉ុន្តែលោកថា លោកនឹងត្រូវធ្វើការចរចាជាមួយសភាស.រ.អាដើម្បីបញ្ចប់ការរារាំងផ្នែកសេដ្ឋកិច្ចរបស់ស.រ.អាប្រឆាំងនឹងប្រទេសគុយបា។
លោក Gross ជាពលរដ្ឋអាមេរិកាំងដែលត្រូវបានដោះលែង បានធ្វើដំណើរតាមយន្តហោះត្រឡប់មកកាន់ស.រ.អា ដែលបានអមដំណើរដោយសមាជិកសភាអាមេរិកាំង៣នាក់។ អតីតបុគ្គលិកផ្តល់ជំនួយដែលមានអាយុ៦៥ឆ្នាំរូបនេះ បានត្រូវដោះលែងនៅពេលជាមួយគ្នាដែលជនជាតិគុយបា៣នាក់ចេញពីគុកស.រ.អា៕