រដ្ឋាភិបាលសហរដ្ឋអាមេរិក គ្រោងនឹងទប់ទល់ឥទ្ធិពលរបស់ចិននៅក្នុងតំបន់អាស៊ីអាគ្នេយ៍ដោយធ្វើជាដៃគូជួយដល់ប្រទេសចំនួនប្រាំ ដែលតែងតែទៅសុំជំនួយពីប្រទេសចិន។ នេះ បើយោងតាមអ្នកជំនាញក្នុងតំបន់។
ភាពជាដៃគូមេគង្គ-អាមេរិក ដែលបានបង្កើតឡើងនៅថ្ងៃទី១១ ខែកញ្ញា នឹងផ្ដល់ឱកាសឲ្យរដ្ឋាភិបាលក្រុងវ៉ាស៊ីនតោន រឹតចំណងមិត្តភាពជាមួយប្រទេសកម្ពុជា ឡាវ មីយ៉ាន់ម៉ា ថៃ និងវៀតណាម តាមរយៈការផ្ដល់ជំនួយលើគម្រោងជាច្រើន ចាប់ពីជំនួយលើជំងឺកូវីដ១៩ និងវិធីសាស្ត្រប្រឆាំងនឹងគ្រោះរាំងស្ងួត។
អ្នកវិភាគនិយាយថា មន្ត្រីរដ្ឋាភិបាលអាមេរិកសង្ឃឹមថា បណ្ដាប្រទេសដៃគូក្នុងតំបន់អាស៊ីអាគ្នេយ៍ នឹងទទួលយកជំនួយរបស់អាមេរិក ជាជាងជំនួយរបស់ចិន។ អ្នកជំនាញក៏បាននិយាយថា ប្រទេសចិនកសាងហេដ្ឋារចនាសម្ព័ន្ធយ៉ាងសកម្មនៅក្នុងតំបន់អាស៊ីអាគ្នេយ៍ ប៉ុន្តែគំរាមការផ្គង់ផ្គង់ទឹកពីទំនប់ខ្សែទឹកខាងលើ និងបានធ្វើឲ្យប្រទេសមួយចំនួនធ្លាក់ក្នុងអន្ទាក់បំណុល។
ចិននិងសហរដ្ឋអាមេរិកដែលជាមហាអំណាចប្រជែងគ្នា បានប្រកួតប្រជែងគ្នាក្នុងផ្នែកភាគច្រើននៃពិភពលោកដើម្បីគាំទ្រប្រទេសតូចៗ នៅពេលដែលរដ្ឋាភិបាលក្រុងប៉េកាំង ពង្រីកសេដ្ឋកិច្ច និងយោធានៅក្រៅប្រទេស។ នៅក្នុងតំបន់អាស៊ីអាគ្នេយ៍ សហរដ្ឋអាមេរិកគាំទ្រប្រទេសវៀតណាមនៅក្នុងការតតាំងការវាតទីរបស់ចិនក្នុងសមុទ្រចិនខាងត្បូង ជាទីកន្លែងដែលប្រទេស២នៅតំបន់អាស៊ីនេះ បានទាមទារទឹកដីជាន់គ្នា។
លោក Alexander Vuving ជាសាស្ត្រាចារ្យនៅមជ្ឈមណ្ឌលអាស៊ីប៉ាស៊ីហ្វិក Daniel K. Inouye សម្រាប់ការសិក្សាសន្តិសុខនៅកោះហាវ៉ៃ សហរដ្ឋអាមេរិក បាននិយាយថា «ខ្ញុំគិតថា ភាពជាដៃគូរវាងសហរដ្ឋអាមេរិក និងទន្លេរមេគង្គ បានស្ថិតនៅពីលើគេនៅលើរបៀបវារៈសម្រាប់សហរដ្ឋអាមេរិក ពីព្រោះតែសហរដ្ឋអាមេរិក បានទទួលស្គាល់ពីសារៈសំខាន់នៃអនុតំបន់ទន្លេមេគង្គ ដែលនៅទីនោះចិន បានទទួលអត្ថប្រយោជន៍ដ៏សំខាន់»។
លោក Vuving បាននិយាយទៀតថា «ការប្រកួតប្រជែងគ្នាខ្លាំងឡើងរវាងសហរដ្ឋអាមេរិកនិងចិន កើនឡើង ធ្វើឲ្យអនុតំបន់ទន្លេមេគង្គកាន់តែសំខាន់ឡើង»៕