ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

សមាជិក​សភា​អាមេរិក​ម្នាក់​រំពឹង​ថា ស្ថានការណ៍​នយោបាយ​កម្ពុជា នឹង​មាន​ការ​ផ្លាស់ប្តូរ


ក្រុម​វាគ្មិន​រួម​មាន​ លោក​ស្រី​ Olivia Enos​ កញ្ញា​ កឹម​ មនោវិទ្យា​ និង​ លោក​ Alan Lowenthal​ នៅ​ក្នុង​កិច្ចពិភាក្សា​អំពី​ស្ថាន​ភាព​នយោបាយ​ប្រទេស​កម្ពុជា​ និង​ តួនាទី​របស់​សហរដ្ឋ​អាមេរិក​ នៅ​ទីក្រុង​ Annandale រដ្ឋវឺជីនៀ​ នៅ​ថ្ងៃ​ទី​៣​ ខែ​ធ្នូ​ ឆ្នាំ​ ២០១៧​។ (លឹម​ ហ្គេច​ហៀង/VOA)
ក្រុម​វាគ្មិន​រួម​មាន​ លោក​ស្រី​ Olivia Enos​ កញ្ញា​ កឹម​ មនោវិទ្យា​ និង​ លោក​ Alan Lowenthal​ នៅ​ក្នុង​កិច្ចពិភាក្សា​អំពី​ស្ថាន​ភាព​នយោបាយ​ប្រទេស​កម្ពុជា​ និង​ តួនាទី​របស់​សហរដ្ឋ​អាមេរិក​ នៅ​ទីក្រុង​ Annandale រដ្ឋវឺជីនៀ​ នៅ​ថ្ងៃ​ទី​៣​ ខែ​ធ្នូ​ ឆ្នាំ​ ២០១៧​។ (លឹម​ ហ្គេច​ហៀង/VOA)

សមាជិក​សភា​អាមេរិកាំង​ម្នាក់ថា ​នៅពេល​សហគមន៍​អន្តរជាតិ​រួមគ្នា​ នឹងមានការ​ផ្លាស់ប្តូរ​ស្ថានការណ៍​កម្ពុជា​ដូចពេល​ដែលមាន​កិច្ចព្រមព្រៀង​សន្តិភាព​ទី​ក្រុង​ប៉ារីស។

សមាជិក​សភាអាមេរិកាំង​ម្នាក់​រំពឹងថា ​ស្ថានការណ៍​នយោបាយ​កម្ពុជា​ នឹងមានការ​ផ្លាស់ប្តូរ​ នៅពេល​ពិភពលោក​ធ្វើការរួមគ្នា។​ លោក​ថា​ ការធ្វើដូច្នោះ​ បាន​ទាល់​តែមាន​ការ​គាំទ្រ​ពីពលរដ្ឋ​ខ្មែរ ​សហគមន៍​ខ្មែរ​ដើម្បី​រួមគ្នាប្រាប់ពិភព​លោក​អំពីអ្វី​ដែលកំពុង​កើតឡើងនៅ​កម្ពុជា​ ហើយ​ត្រូវការ​ផ្លាស់ប្តូរ។​

សមាជិក​សភា​អាមេរិកាំង​ម្នាក់​គឺ​លោក​ Alan Lowenthal ​បាន​អះអាង​កាល ពី​ថ្ងៃ​អាទិត្យ​ប្រាប់​ពលរដ្ឋខ្មែរ​អាមេរិកាំង​ជា​ច្រើន​មកពី​តាម​បណ្តា​រដ្ឋនានា ​អំពី​វិធានការ​ទៅមុខ​ជាបន្តបន្ទាប់​ ដែលសភា ​និងរដ្ឋាភិបាល​អាមេរិក​ និងសហគមន៍​អន្តរជាតិ​ត្រូវ​ធ្វើ​ចំពោះ​ស្ថានការណ៍​កម្ពុជា​ ដោយ​លោក​បាន​សង្កត់​ធ្ងន់ថា ស.រ.អា.​និង​ពិភពលោក​ទាំងមូល ​ចាំបាច់​ត្រូវ​រួមគ្នា​ដើម្បី​ធ្វើអន្តរាគមន៍​ ឲ្​យស្ថានការណ៍កម្ពុជាវិល​ទៅ​រកសភាពធម្មតាវិ​ញ​ មានការ​បោះឆ្នោត​ដោយសេរី ​យុត្តិធម៌ និង ​មាន​ការ​ដោះ​លែងមេដឹក​នាំ​ជំទាស់​។

«ដោយសារ​តែ​ការ​ចូលរួម​ពាក់ព័ន្ធ​របស់​លោកអ្នក​ទាំងអស់​គ្នា​ ការចូលរួម​ជាមួយ​សហគមន៍​ បាន​ធ្វើឲ្យ​មាន​ប្រតិបត្តិការ​ពាសពេញ​ពិភព​លោក​មួយ​បច្ចុប្បន្ន​នេះ ​ហើយ​យើង​ត្រូវតែ​យល់​ថា ​ការ​ផ្លាស់ប្តូរ​ដ៏​ពិត​ប្រាកដទាំងឡាយ​នោះនឹង​កើត​ឡើង​នៅ​ពេលណា​ ដែល​ពិភពលោក​ធ្វើ​កិច្ចការ​រួមគ្នា​ដូច ​ដែលគេ​បាន​ធ្វើ​ឲ្យ​មាន​កិច្ចព្រម​ព្រៀង​សន្តិភាព​ទី​ក្រុង​ប៉ារីស។​ រឿង​នេះ​ប្រហែលជា ​មិន​ដូច​ពេលធ្វើ​កិច្ចព្រមព្រៀងទីក្រុងប៉ារីស​ទេ​ តែ​យើង​ចាំបាច់​ត្រូវ​ឲ្យពិភព​លោកងើបឡើងទាមទារ​ការ​ផ្លាស់ប្តូរ​អ្វី​ដែលកំពុង​កើត​ឡើង។​ ស.រ.អា.​មិន​អាច​ធ្វើ​កិច្ចការ​នេះ​ម្នាក់​ឯង​បាន​ទេ។​ ដូច្នេះ​ហើយបានជា​ ខ្ញុំ​នឹង​សុំ​ឲ្យ​មានការ​គាំទ្រ​ពី​ពលរដ្ឋ​ទាំងអស់​គ្នា​ គាំទ្រ​ពី​សហគមន៍ ​គាំទ្រ​ពី​សកម្មជន ​គាំទ្រ​ពី​អង្គការ​សង្គម​ស៊ីវិល ។​ សភា​គឺ​ នឹងជា​ផ្នែក​មួយ​នៃ​រឿង​នេះ។ ​ហើយ​យើងចាំបាច់​ត្រូវការ​ធ្វើការ​រួមគ្នា​ ដើម្បី​ទាក់ទងទៅ​មិត្ត​របស់យើងពាសពេញ​ពិភពលោក ​ដើម្បី​និយាយ​ប្រាប់​គេ​ថា យើង​ត្រូវ​ធ្វើ​ការ​រួមគ្នា ដើម្បី​ធានា​ឲ្យ​មាន​ការ​បោះឆ្នោតដោយសេរី​ យុត្តិធម៌​ ត្រឹមត្រូវ‍»។

លោក​ សុខ​ ខេមរា​កំពុង​ធ្វើ​បទ​សម្ភាសន៍​ជាមួយ​លោក​ Alan Lowenthal​ ​នៅ​ក្នុង​កិច្ចពិភាក្សា​អំពី​ស្ថាន​ភាព​នយោបាយ​ប្រទេស​កម្ពុជា​ និង​តួនាទី​របស់​សហរដ្ឋ​អាមេរិក​ នៅ​ទីក្រុង​ Annandale រដ្ឋ​វឺជីនៀ​ នៅ​ថ្ងៃ​ទី​ ៣​ ខែ​ធ្នូ​ ឆ្នាំ​ ២០១៧​។ (លឹម​ ហ្គេច​ហៀង/VOA)
លោក​ សុខ​ ខេមរា​កំពុង​ធ្វើ​បទ​សម្ភាសន៍​ជាមួយ​លោក​ Alan Lowenthal​ ​នៅ​ក្នុង​កិច្ចពិភាក្សា​អំពី​ស្ថាន​ភាព​នយោបាយ​ប្រទេស​កម្ពុជា​ និង​តួនាទី​របស់​សហរដ្ឋ​អាមេរិក​ នៅ​ទីក្រុង​ Annandale រដ្ឋ​វឺជីនៀ​ នៅ​ថ្ងៃ​ទី​ ៣​ ខែ​ធ្នូ​ ឆ្នាំ​ ២០១៧​។ (លឹម​ ហ្គេច​ហៀង/VOA)

លោក Lowenthal​ នៃ​គណបក្ស​ប្រជាធិបតេយ្យ​ មក​ពី​រដ្ឋ​កាលីហ្វ័រញ៉ា ​ដែល​ជា សហប្រធានក្រុម​អ្នក​តំណាងរាស្ត្រ​ចម្រុះ​បក្ស​គិត​ពី​បញ្ហា​កម្ពុជា ហៅថា​ គណៈកម្មាធិការសភា ដើម្បីពិនិត្យតាមដានស្ថានការណ៍នៅ​កម្ពុជា​បាន​ថ្លែង​ដូច្នេះ គឺ​សំដៅ​លើ​សហភាព​អឺរ៉ុប ​ដែល​បាន​រិះគន់​រដ្ឋាភិបាលកម្ពុជាយ៉ាង​ធ្ងន់ធ្ងរ​ផង​ដែរ និង​ប្រទេស​ជប៉ុន​ ដែល​ជា​ប្រទេស​មាន​ទំនាក់ទំនង​សេដ្ឋកិច្ច​ ពាណិជ្ជកម្ម​ និង​ការ​ផ្តល់​ប្រាក់​ជំនួយ​ដល់​កម្ពុជា​រាប់ពាន់​លាន​ដុល្លារ​ស.រ.អា។​ លោក​បង្ហាញ​ថា លោក​មិនមែន​កំពុងតែ​ខិតខំ​ដើម្បី​ធ្វើ​ចលនា​ជាមួយ​សហគមន៍​អន្តរជាតិ​ប៉ុណ្ណោះ​ទេ​ តែ​ថែម​ទាំង​ធ្វើ​ឲ្យ​សភា​ និង​រដ្ឋាភិបាល​អាមេរិក​និយាយ​ភាសា​រួមគ្នា​តែមួយ​ចំពោះ​ស្ថានការណ៍​កម្ពុជា​ផង​ដែរ​ក្រៅ​ពី​រឿង​ទណ្ឌកម្ម​ និង​ការ​អនុម័ត​សេចក្តី​សម្រេច​នានា​អំពី​ស្ថានការណ៍​កម្ពុជា​ផង​នោះ។

ការបោះឆ្នោត​ដោយសេរី​ដែល​សហគមន៍​អន្តរជាតិ​ដូចជា​ សហរដ្ឋអាមេរិក​ និង​សហភាព​អឺរ៉ុប ​ក៏​ដូចជា​បណ្តា​ប្រទេសផ្សេងៗ​ទៀត​ចង់​បាននោះ​គឺ ការដែល​ត្រូវធ្វើឲ្យ​គណបក្ស​ជំទាស់​រស់​ឡើងវិញ​ ហើយ​លោក​ កឹម សុខា​ប្រធានគណបក្ស​ត្រូវ​បាន​ដោះលែង​ រួម​ទាំង​អ្នកទោស​នយោបាយ ​និង​មនសិការ​ទាំងអស់​ផ្សេងទៀត គួប​ផ្សំ​នឹងការរៀបចំ​ការ​បោះឆ្នោតឲ្យ​មាន​លក្ខណៈសេរី​ និងយុត្តិ​ធម៌​ត្រឹមត្រូវ​ ការ​បញ្ឈប់ការ​យាយី​ក្រុម​ជំទាស់​ អង្គការ​សង្គមស៊ីវិល​ និង​អ្នកសារព័ត៌មានឯករាជ្យ។

ថ្លែង​ក្នុង​កិច្ចពិភាក្សា​កាលពី​ថ្ងៃអាទិត្យ​កញ្ញា កឹម មនោវិទ្យា​ ជា​មន្ត្រី​ទទួល​បន្ទុក​កិច្ចការ​បរទេស​នៃ​អតីត​គណបក្ស​សង្គ្រោះជាតិ និង​ជា​វាគ្មិន​ម្នាក់​ ដែល​កំពុងដើរ​គៀង​គរ​រក​ការ​គាំទ្រ​ពី​ក្រសួងការ​បរទេស​អាមេរិក ​ សេតវិមាន ​សភា ​នៅ​ក្នុងរដ្ឋធានី​វ៉ាស៊ីនតោន​ បាន​អះអាង​ថា​ មាន​ការ​ដឹង​ឮ​ពី​ស្ថានការណ៍​នយោបាយ​កម្ពុជា​ច្រើន​ ហើយ​ស.រ.អា​ ដែល​ធ្វើ​កិច្ចការ​យ៉ាង​ច្រើន​សម្រាប់​ស្ថានការណ៍​កម្ពុជា​នោះ ក៏​មានសេចក្តី​ថ្លែងការណ៍​ពី​គ្រប់​ស្ថាប័ន​ស.រ.អា.​កំពូល​ទៀត​ផង​ ហើយ​ស.រ.អា.​ចង់ឃើញ​ស្ថានការណ៍​កម្ពុជា​ល្អ​ប្រសើរឡើងវិញ ដើម្បី​រួច​ផុត​ពី​ការ​ដាក់ទណ្ឌកម្ម​នានា​ ដែល​រដ្ឋាភិបាល​កម្ពុជា​គឺ​ជា​ អ្នក​ទទួល​ខុសត្រូវ។

«អាមេរិក​ខ្លួនឯង​គាត់​ធ្វើ​បាន​ធ្វើ​គ្រប់គ្រាន់ហើយ។ ​គាត់​បាន​នឹងកំពុង​ធ្វើ​ហើយ ប៉ុន្តែ​អ្វី​ដែល​គាត់​អាចធ្វើ​បានទៀត​ គាត់ទាមទារ​យក​សំឡេង​ដទៃទៀត ប្រទេស​ដទៃទៀត​ដែល​ជាមិត្ត​គាត់ហ្នឹង​ ដើម្បី​ចូល​ធ្វើការ​ជាមួយគាត់​។ឧទាហរណ៍​ សហភាព​អឺរ៉ុប​ EU និង​ជប៉ុន​ជាដើម។​ ហើយ​ត្រង់​ចំណុចហ្នឹង​ខ្ញុំចង់​បញ្ជាក់ថា​ ខ្ញុំជឿ​ថា​ នៅ​ប៉ុន្មាន​ថ្ងៃខាង​មុខ​នេះ​ សហភាព​អឺរ៉ុប​នឹង​មាន​ជំហរ​ដូចអាមេរិកអញ្ចឹងទាក់ទង​ទៅនឹងការ​ដកជំនួយ​ទៅ​លើការ​បោះឆ្នោត​នៅ​ប្រទេស​កម្ពុជា‍»។

កញ្ញា​ កឹម​ មនោវិទ្យា​ កំពុង​ថ្លែង​សុន្ទរកថា​នៅ​ក្នុង​កិច្ចពិភាក្សា​អំពី​ស្ថាន​ភាព​នយោបាយ​ប្រទេស​កម្ពុជា​ និង​តួនាទី​របស់​សហរដ្ឋ​អាមេរិក​ នៅ​ទីក្រុង​ Annandale​ រដ្ឋ​វឺជីនៀ ថ្ងៃ​ទី​ ៣​ ខែ​ធ្នូ​ ឆ្នាំ​ ២០១៧​។ (លឹម​ ហ្គេច​ហៀង/VOA)
កញ្ញា​ កឹម​ មនោវិទ្យា​ កំពុង​ថ្លែង​សុន្ទរកថា​នៅ​ក្នុង​កិច្ចពិភាក្សា​អំពី​ស្ថាន​ភាព​នយោបាយ​ប្រទេស​កម្ពុជា​ និង​តួនាទី​របស់​សហរដ្ឋ​អាមេរិក​ នៅ​ទីក្រុង​ Annandale​ រដ្ឋ​វឺជីនៀ ថ្ងៃ​ទី​ ៣​ ខែ​ធ្នូ​ ឆ្នាំ​ ២០១៧​។ (លឹម​ ហ្គេច​ហៀង/VOA)

សេតវិមាន​បានចេញ​សេចក្តី​ថ្លែងការណ៍​មិន​ទទួល​ស្គាល់ការ​បោះឆ្នោត​នៅ​ក្នុង​ប្រទេសកម្ពុជា និង​ព្រមាន​ចាត់​វិធានការ​បន្ថែម​ទៀតក្នុងស្ថាន​ការណ៍ដែលគណបក្ស​ជំទាស់មួយ​ត្រូវ​រំលាយ ​និង​មេដឹកនាំ​ក្រុម​ជំទាស់នៅ​ក្នុងពន្ធនាគារ​ រួម​ទាំង​ការ​រិតត្បិត​អង្គការ​សង្គមស៊ីវិល និង​ប្រព័ន្ធផ្សព្វផ្សាយ​ឯករាជ្យ​ផង​នោះ។​ វិធានការ​ទាំង​នេះ​គឺ បន្ថែម​ពី​លើ​ការ​ប្រកាស​មិន​ផ្តល់​ជំនួយ​ក្នុង​ពេល​បោះឆ្នោត​ជាតិ​ឆ្នាំ ២០១៨​ទៀត​ផង។

កញ្ញា ​កឹម មនោវិទ្យា​ បាន​ថ្លែងថា​ ការ​កាត់​ជំនួយ​និង​ ការ​ផ្តាច់​ជំនួយយ៉ាងណាគឺ ស្រេច​លើ​ការវិនិច្ឆ័យ​របស់​ប្រទេស​នានា​ទាំងអស់ ​ដែលគេ​បាន​ដឹង​រឿង​ពិត​របស់​ប្រទេស​កម្ពុជា​ពេល​ ដែល​រដ្ឋាភិបាល​កម្ពុជា​មិន​ធ្វើ​តាម​លក្ខខណ្ឌ​របស់​សហគមន៍​អន្តរជាតិ​ តែ​ការ​ផ្តាច់​ជំនួយ​នោះ​មិន​មែនសម្រេច​លើ​គណបក្ស​ជំទាស់​ទេ។

លោក​នាយក​រដ្ឋមន្ត្រី​ ហ៊ុន សែន​ នៃ​ប្រទេស​កម្ពុជា​បាន​ថ្លែង​ថា លោក​មិន​ខ្លាចនឹង​ការ​មិន​ទទួល​ស្គាល់​អំពី​ភាព​ស្របច្បាប់​របស់​រដ្ឋាភិបាលលោក ដែល​កើតចេញ​ពី​ការ​បោះឆ្នោត​ទេ​ ហើយ​លោក​ក៏​មិន​ត្រូវការ​បរទេស​ទទួលស្គាល់​ដែរ​ ក្រៅ​ពី​បញ្ជាក់​ថា​ បើ​បរទេស​កាត់​ជំនួយ​ នោះ​គឺ មក​ពី​គណបក្ស​ប្រឆាំង។

«ហើយ​យក​ល្អ​អំពាវនាវ​ឲ្យ​អាមេរិក​កាត់​ជំនួយ​ទាំងអស់​តែ​ម្តង ​ព្រោះ​កាត់ទៅ​វា​ងាប់​ អា NGOS​ (អង្គការសង្គម​ស៊ីវិល)​ នៅ​ក្នុង​ស្រុក​ទាំងអស់​ទៅ​ សម្លាប់​កូន​របស់​ឯង​តែ​ម្តង​ទៅ​ ស្អី​ឡើង​កាត់ៗ​ កាត់​ទៅ‍»។

ទោះជា​យ៉ាងណា​ក៏​ដោយ​ក្រុម​វាគ្មិន ​និង​អ្នក​ចូលរួម​នានា ​ដែលចូល​រួមក្នុង​វេទិកា​មួយ​នៅ​ក្នុង​សង្កាត់​ អាណាឌែល​ រដ្ឋ វីជីនៀ ​(Virginia ) ដែល​រៀប​ចំដោយអង្គការ​សម្ព័ន្ធ​មិត្ត​ខ្មែរ​អាមេរិកាំង​របស់​លោក ​ទូច វិបុល ​កាល​ពី​ថ្ងៃ​អាទិត្យ​ បាន​គាំទ្រឲ្យ​មានការ​បោះឆ្នោត​ដោយសេរី​ និង​យុត្តិធម៌​ត្រឹមត្រូវ​ ការ​បញ្ចប់​ការ​យាយីក្រុម​ជំទាស់​ និង​វិធានការ​បន្ថែម​ពី​រដ្ឋាភិបាល​ស.រ.អា.។

លោក ​រ៉េន ហុង​ ពលរដ្ឋ​ខ្មែរ​មក​ពី​ក្រុង​ហ្វីឡាឌែលហ្វីយ៉ា​ (Philadelphia)​ នៃ​រដ្ឋ​ភេនស៊ីលវីនៀ (Pennsylvania) ​បាន​ថ្លែង​ថា​ រដ្ឋាភិបាល​ត្រូវ​ធ្វើ​តាម​ការ​ចង់​បាន​របស់​សហគមន៍​អន្តរជាតិ និង​ពលរដ្ឋ​កម្ពុជា​ មុន​សភាព​ការណ៍​កាន់តែ​ធ្លាក់​ដុន​ដាប។

«ខ្ញុំ​សង្ឃឹមថា​មាន​ការ​ជួបជុំគ្នានេះ​ ជាការល្អ​បំផុត ​ហើយ​សម្រាប់​ប្រជាជន​យើង​ទូទាំង​ពិភពលោក​ ឲ្យ​ដឹង​ថា​ ខ្មែរយើង​មាន​ការ​ក្រោក​ឈរ​ ឥឡូវ​ គឺ​ក្រោក​ឈរ​ពី​រឿង​ការតស៊ូ​ដើម្បី​ស្រុកទេស​របស់​យើង‍»។

លោក​ សុខ​ ខេមរា​កំពុង​ធ្វើ​បទ​សម្ភាសន៍​ជាមួយ​លោក ​រ៉េន ហុង​ ពលរដ្ឋ​ខ្មែរ​មក​ពី​ក្រុង​ហ្វីឡាឌែលហ្វីយ៉ា​ (Philadelphia)​ នៃ​រដ្ឋ​ភេនស៊ីលវីនៀ (Pennsylvania) ​នៅ​ក្នុង​កិច្ចពិភាក្សា​អំពី​ស្ថាន​ភាព​នយោបាយ​ប្រទេស​កម្ពុជា​ និង​តួនាទី​របស់​សហរដ្ឋ​អាមេរិក​ នៅ​ទីក្រុង​ Annandale​ រដ្ឋ​វឺជីនៀ នៅ​ថ្ងៃ​ទី​ ៣​ ខែ​ធ្នូ​ ឆ្នាំ​ ២០១៧​។ (លឹម​ ហ្គេច​ហៀង/VOA)
លោក​ សុខ​ ខេមរា​កំពុង​ធ្វើ​បទ​សម្ភាសន៍​ជាមួយ​លោក ​រ៉េន ហុង​ ពលរដ្ឋ​ខ្មែរ​មក​ពី​ក្រុង​ហ្វីឡាឌែលហ្វីយ៉ា​ (Philadelphia)​ នៃ​រដ្ឋ​ភេនស៊ីលវីនៀ (Pennsylvania) ​នៅ​ក្នុង​កិច្ចពិភាក្សា​អំពី​ស្ថាន​ភាព​នយោបាយ​ប្រទេស​កម្ពុជា​ និង​តួនាទី​របស់​សហរដ្ឋ​អាមេរិក​ នៅ​ទីក្រុង​ Annandale​ រដ្ឋ​វឺជីនៀ នៅ​ថ្ងៃ​ទី​ ៣​ ខែ​ធ្នូ​ ឆ្នាំ​ ២០១៧​។ (លឹម​ ហ្គេច​ហៀង/VOA)

លោក​បាន​បន្ថែម​ថា​ លោក​មាន​ការ​ចាប់​អារម្មណ៍​នឹង​ការ​ពិភាក្សា​គ្នា​អំពី​ការ​កាត់​ជំនួយ​ពី​ការ​គៀង​គរ​អន្តរជាតិ​ ដើម្បី​ដាក់​ការ​គាប​សង្កត់​ទៅលើ​រដ្ឋាភិបាល​កម្ពុជា របស់​លោក​នាយក​រដ្ឋ​មន្ត្រី​ហ៊ុន សែន។ លោក​ក៏​ព្រួយបារម្ភ​ចំពោះ​ប្រាក់ខែ​កម្មករ​រោងចក្រ​ និង​មន្ត្រី​រាជការ​ផង​ដែរ​ បើ​អន្តរជាតិដាក់​គំនាប​ខ្លាំង​ឡើងខាងសេដ្ឋកិច្ច​មក​លើ​រដ្ឋាភិបាលទីក្រុង​ភ្នំពេញ។

ស្តី្រ​វ័យ​ចំណាស់​ម្នាក់​មក​ពី​ រដ្ឋម៉ារីលែន ​(Maryland) ដែល​បាន​ចូលរួម​ស្តាប់​ការ​ពិភាក្សា​នយោបាយកម្ពុជា​ បាន​ថ្លែង​ថាលោកស្រី​គាំទ្រ​ឲ្យ​មានអន្តរាគមន៍​ពី​អន្តរជាតិជា​ពិសេស​រដ្ឋាភិបាល​ស.រ.អា.​ដើម្បី​ធ្វើ​យ៉ាងណា​ឲ្យ​មាន​ការ​បោះឆ្នោត​ដោយ​សេរី ​យុត្តិធម៌​ត្រឹមត្រូវ​ គ្មាន​ការ​គៃបន្លំ ​ដើម្បី​ការ​ផ្លាស់​ប្តូរ​ពិត​ប្រាកដក្នុង​ប្រទេស​កម្ពុជា​។

«អញ្ចឹង​ហើយ​ខ្ញុំ​សុំ​ឲ្យ​អាមេរិកាំង​មេត្តា​ជួយ​ឲ្យបាន​សន្តិភាព​នៅ​ក្នុង​ឆ្នាំ​ ២០១៨​ហ្នឹង ​ឲ្យ​រាស្ត្រ​ខ្មែរ​ប្រជាពលរដ្ឋ​ខ្មែរ​ស្គាល់​លទ្ធិ​ប្រជាធិបតេយ្យ​ពិតប្រាកដ​ផង ព្រោះ​ខ្មែរ​រងទុក្ខ​វេទនា​ណាស់។ ​៥០ឆ្នាំ​ ហើយដែល​ខ្ញុំ​រស់​ក្រោម​របប​កុម្មុយនិស្ត ដែល​ខ្ញុំ​ទឹកភ្នែករាល់ថ្ងៃ​ ដែល​ខ្ញុំ​និយាយ​អត់រួច​ និងធ្វើ​អីមិនកើត‍»។

ព្រះ​តេជ​ព្រះគុណ​ ប៊ុត ប៊ុនតិញ​ ព្រះសង្ឃ​ ដែល​តស៊ូមតិ​មួយ​អង្គ​ និង​ជា​ស្ថាបនិក​បណ្ដាញព្រះសង្ឃ​ឯករាជ្យ​ ដើម្បី​យុត្តិធម៌​សង្គម​ បាន​ចូលរួមក្នុង​កិច្ច​ពិភាក្សា​ផង​នោះ​ មាន​សង្ឃដីកាកោត​សរសើរប្រជាពលរដ្ឋ​ខ្មែរ​ ដែល​មាន​សមាន​ចិត្តផុស​ផុល​ និង​មុតមាំ​ទាំង​ក្នុង ​និង​ក្រៅ​ប្រទេស​ចំពោះ​នយោបាយ។

«ហើយ​ជា​ពិសេស​រឿង​ដែល​យើង​ឃើញ​ប្លែកៗ​ត្រង់​ថា ពី​ដើម​ឡើយ​ចលនា​នយោបាយ​ផុសផុល​តែ​ក្នុង​ព្រះរាជាណាចក្រ​កម្ពុជា​ទេ​ តែ​ឥឡូវនេះ ​ដោយសារ ស្ថានភាព​ ក្នុងព្រះរាជា​ណាចក្រ​កម្ពុជា​ចង្អៀត​ សម្រាប់​ការ​តស៊ូ​នយោបាយ សម្រាប់​ ប្រទេសជាតិ​ ឃើញ​អ្នក​នៅ​ខាង​ក្រៅ​ប្រទេស​ហ្នឹង​ដឹក​មុខ​ល្អ​ ហើយ​អាត្មា​កោតសរសើរ ដែល​ជន​រួមជាតិ​ខ្មែរ​យើង​នៅ​ឯ​នាយ​សមុទ្រ​បាន​មាន​គំនិត​ផ្តួចផ្តើម​ ហើយ​ជំរុញ​ឲ្យ​ស្ថានភាព​ដោះស្រាយ​បញ្ហា​នយោបាយ​នៅ​ក្នុង​ស្រុកខ្មែរ​ហ្នឹង​បានល្អ។​ នេះ​ជា​ចំណុច​ពិសេស ​ហើយដែល​ញាតិញោម​ខ្មែរយើង​មិនមែន​ធ្វើការ រវាង​ខ្មែរ​ និង​ខ្មែរទេ​ តែ​ធ្វើ​ការ​ជាមួយ​នឹង​សហគមន៍​អន្តរជាតិ‍»។

លោកសុខ​ ខេមរា​កំពុង​ធ្វើ​បទ​សម្ភាសន៍​ជាមួយព្រះ​តេជ​ព្រះគុណ​ ប៊ុត ប៊ុនតិញនៅ​ក្នុង​កិច្ចពិភាក្សា​អំពី​ស្ថាន​ភាព​នយោបាយ​ប្រទេស​កម្ពុជា​ និង​តួនាទី​របស់​សហរដ្ឋ​អាមេរិក​ នៅ​ទីក្រុង​ Annandale​ រដ្ឋ​វឺជីនៀ នៅ​ថ្ងៃ​ទី​ ៣​ ខែ​ធ្នូ​ ឆ្នាំ​ ២០១៧​។ (លឹម​ ហ្គេច​ហៀង/VOA)
លោកសុខ​ ខេមរា​កំពុង​ធ្វើ​បទ​សម្ភាសន៍​ជាមួយព្រះ​តេជ​ព្រះគុណ​ ប៊ុត ប៊ុនតិញនៅ​ក្នុង​កិច្ចពិភាក្សា​អំពី​ស្ថាន​ភាព​នយោបាយ​ប្រទេស​កម្ពុជា​ និង​តួនាទី​របស់​សហរដ្ឋ​អាមេរិក​ នៅ​ទីក្រុង​ Annandale​ រដ្ឋ​វឺជីនៀ នៅ​ថ្ងៃ​ទី​ ៣​ ខែ​ធ្នូ​ ឆ្នាំ​ ២០១៧​។ (លឹម​ ហ្គេច​ហៀង/VOA)

​ព្រះតេជព្រះគុណ​បាន​បន្ថែម​ដោយ​សង្ឃដីកា​ទៀត​ថា ​ព្រះអង្គ​ពេញចិត្ត​នឹង​ការ​ដាក់​សំណើរ​របស់​សហគមន៍​អន្តរជាតិ​ និង​មិន​ដាក់​សម្ពាធ។ ​ព្រះ​តេជគុណ​មាន សង្ឃដីកា​ យោង​ទៅ​លើ​ការ​ចេញ​សេចក្តី​សម្រេច ​សេចក្តី​ថ្លែងការណ៍​កន្លងមក ពី​ស.រ.អា.​ សហភាព​អឺរ៉ុប និង​បណ្តា​ប្រទេស​ជា​ច្រើន​ទៀត។

ទោះជា​យ៉ាងណា​ក៏ដោយ ​វាគ្មិន​ម្នាក់​ទៀត​មក​ពី​អង្គការ​តាក់តែង​គោល​នយោបាយ​មួយ​ក្នុង​រដ្ឋធានី ​វ៉ាស៊ីនតោន ​គឺ​អង្គការ Heritage Foundation​ បាន​គាំទ្រ ​ដល់​ការ​ដាក់ ទណ្ឌកម្ម​របស់​រដ្ឋបាល​លោក​ប្រធានាធិបតី​ ដូណាល់ ត្រាំ​ ប្រឆាំង​នឹង​រដ្ឋាភិបាល លោក​នាយក​រដ្ឋមន្ត្រី​ហ៊ុន សែន​ និង​បុគ្គល​ ដែល​ធ្វើ​ឲ្យ​អន្តរាយ​ដល់​ប្រជាធិបតេយ្យ​និងគំរាមកំហែង​ដល់​ការ​រីកចម្រើន​ដល់​សរីរាង្គប្រជាធិបតេយ្យ​ក្នុងប្រទេស​កម្ពុជា។

«ហើយ​នៅ​ពេលដែល​សរីរាង្គ​សំខាន់​ស្ថិត​នៅ​ក្រោម​ការ​គំរាម​កំហែង​ នោះ​គឺ​ជា​សក្តានុពល​មួយ​ ដែល​ប្រទេស​កម្ពុជា​អាច​មាន​ការ​បរាជ័យជា​ប្រព័ន្ធទាំងស្រុង​ ដែល​ប្រទេសនេះ​ពិតជា ​គ្មាន​ក្តី​សង្ឃឹមថា នឹង​មានដំណើរទៅ​មុខ​ផ្នែក​ប្រជាធិបតេយ្យ​ទេ‍»។

លោកស្រី​បានថ្លែង​ថា អ្វី​ដែលអង្គការ​លោកស្រី​ប្រាថ្នា​ចង់​ឃើញគឺ ការ​បង្កើត​ឡើង​វិញ​នូវ​ក្រុម​ស្នូល​នៃ​ប្រទេសហត្ថលេខី​នៃ​សន្ធិសញ្ញា​សន្តិភាព​ទីក្រុង​បារីសសំខាន់ៗ​នានាដើម្បី​ធ្វើ​ទំនាក់ទំនង​ និង​ដោះ​ស្រាយ​បញ្ហា​កម្ពុជា៕

XS
SM
MD
LG