កាលពីថ្ងៃចន្ទសហរដ្ឋអាមេរិកបានថ្កោលទោសអំពើហិង្សានៅក្នុងប្រទេសនីការ៉ាហ្គាដោយបានប្រកាសឲ្យលោកប្រធានាធិបតី Daniel Ortega ទទួលខុសត្រូវចំពោះអំពើហិង្សាដែលបង្កឲ្យមនុស្សជាង៤០០នាក់បាត់បង់ជីវិតក្នុងរយៈពេលប៉ុន្មានខែចុងក្រោយនេះ។ អ្នកនាំពាក្យសេតវិមានបានអានសេចក្តីថ្លែងការរបស់សេតវិមានដែលបានចេញកាលពីថ្ងៃចន្ទថា «ប្រធានាធិបតី Ortega និងអនុប្រធានាធិបតី Murillo ត្រូវទទួលខុសត្រូវទាំងស្រុងចំពោះអំពើឃោរឃៅដែលបានធ្វើឡើងដោយពួកប៉ូលិសប៉ារ៉ាដែលគាំទ្ររដ្ឋាភិបាលទៅលើប្រជាពលរដ្ឋខ្លួនឯង»។
សេចក្តីថ្លែងការនោះក៏បានបញ្ជាក់ផងដែរថា «សហរដ្ឋអាមេរិកគាំទ្រប្រជាពលរដ្ឋនីការ៉ាហ្គា រួមទាំងសមាជិករបស់គណបក្ស Sandinista ដែលកំពុងអំពាវនាវឲ្យមានការធ្វើកំណែទម្រង់ប្រជាធិបតេយ្យ និងបញ្ចប់អំពើហិង្សាក្នុងប្រទេសនីការ៉ាហ្គា។ មានតែការបោះឆ្នោតដោយសេរី យុត្តិធម៌ និងតម្លាភាពតែប៉ុណ្ណោះ ដែលអាចជួយស្តារប្រជាធិបតេយ្យក្នុងប្រទេសនីការ៉ាហ្គាបាន»។
សេចក្តីថ្លែងការដដែលនោះក៏បានប្រកាសផងដែរថាសហរដ្ឋអាមេរិកនឹងដកហូតទិដ្ឋាការរបស់មន្ត្រីទាំងឡាយណាដែលជាប់ពាក់ព័ន្ធនឹងអំពើហិង្សាប្រឆាំងនឹងបាតុករក្នុងប្រទេសនីការ៉ាហ្គា។
អំពើហិង្សាក្នុងប្រទេសនីការ៉ាហ្គាបានបង្កឲ្យមនុស្សជាង៤០០នាក់បាត់បង់ជីវិតក្នុងរយៈពេលបីខែចុងក្រោយនេះ បន្ទាប់ពីមានសំណើផ្លាស់ប្តូរប្រាក់សោធននិវត្តន៍របស់លោក Ortega ដែលបានបង្កឲ្យមានបាតុកម្មប្រឆាំងនឹងសំណើនេះ។ បើទោះបីជាសំណើនេះត្រូវបានលុបចោលវិញក៏ដោយ ក៏បាតុកម្មប្រឆាំងនឹងរដ្ឋាភិបាលនៅតែបន្តកើតឡើងដោយអំពាវនាវឲ្យធ្វើកំណែទម្រង់ប្រជាធិបតេយ្យបន្ទាប់ពីមានការបោះឆ្នោតដោយក្លែងបន្លំអស់ជាច្រើនឆ្នាំ និងការបង្ក្រាបទៅលើគណបក្សប្រឆាំងនិងប្រព័ន្ធផ្សព្វផ្សាយឯករាជ្យមក។ នេះបើយោងតាមសេចក្តីថ្លែងការរបស់សេតវិមាន៕
