កាលពីថ្ងៃពុធម្សិលមិញ សហរដ្ឋអាមេរិកបានថ្កោលទោសខ្លាំងក្លាលើសំណើរបស់រដ្ឋសភាប្រទេសរុស្ស៊ីដែលមានបំណងទទួលស្គាល់តំបន់ផ្តាច់ខ្លួនពីរនៅក្នុងប្រទេសអ៊ុយក្រែនថាជារដ្ឋឯករាជ្យ។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មាន AFP។
រដ្ឋមន្ត្រីការបរទេសសហរដ្ឋអាមេរិកលោក Antony Blinken បានបញ្ជាក់នៅក្នុងសេចក្តីថ្លែងការណ៍មួយថា ចំណាត់ការបែបនេះនឹង «រំលោភយ៉ាងធ្ងន់ធ្ងរលើច្បាប់អន្តរជាតិ»។
កាលពីថ្ងៃអង្គារ រដ្ឋសភាប្រទេសរុស្ស៊ីបានបោះឆ្នោតជំរុញឲ្យលោកប្រធានាធិបតី Vladimir Putin ទទួលស្គាល់តំបន់ផ្ដាច់ខ្លួនពីរនៅផ្នែកខាងកើតនៃប្រទេសអ៊ុយក្រែនថាជា «រដ្ឋអធិបតេយ្យនិងឯករាជ្យ»។
ការជំរុញនេះបានធ្វើឡើងនៅចំពេលដែលមានភាពតានតឹងកើនឡើងជាមួយនឹងក្រុមបស្ចិមប្រទេសអំពីការបង្កើនកម្លាំងកងទ័ពរបស់រុស្ស៊ីនៅតាមបណ្ដោយព្រំដែនជាប់ប្រទេសអ៊ុយក្រែន។
ដោយយោងលើកិច្ចព្រមព្រៀងទីក្រុងមីនស្កិ៍ជាប្រវត្តិសាស្ត្រឆ្នាំ ២០១៤ ដែលមានបំណងដោះស្រាយវិបត្តិអ៊ុយក្រែន លោក Blinken បានបញ្ជាក់ថា៖ «ប្រសិនបើរដ្ឋាភិបាលរុស្ស៊ីឯកភាពតាមសំណើនេះ នោះវាមានន័យថា វាស្មើនឹងការជំទាស់ទាំងស្រុងរបស់រុស្ស៊ីលើការប្ដេជ្ញាចិត្តរបស់ខ្លួននៅក្រោមកិច្ចព្រមព្រៀងទីក្រុងមីនស្កិ៍»។
លោក Blinken បានបន្ថែមថា ប្រសិនបើរដ្ឋាភិបាលរុស្ស៊ីសម្រេចបែបនេះ នោះវានឹងធ្វើឲ្យអន្តរាយដល់ការតាំងចិត្តរបស់រដ្ឋាភិបាលក្រុងមូស្គូ «នៅក្នុងការបន្តចូលរួមក្នុងផ្លូវការទូតដើម្បីសម្រេចឲ្យបាននូវដំណោះស្រាយសម្រាប់វិបត្តិនេះដោយសន្តិវិធី និងតម្រូវឲ្យមានការឆ្លើយតបយ៉ាងឆាប់រហ័សនិងម៉ឺងម៉ាត់ពីសហរដ្ឋអាមេរិកក្រោមកិច្ចសម្របសម្រួលពេញលេញជាមួយនឹងសម្ព័ន្ធមិត្តនិងដៃគូរបស់សហរដ្ឋអាមេរិក»៕
