ក្រុមហ៊ុនផលិតថ្នាំវ៉ាក់សាំងមួយដែលមានទីតាំងក្នុងសហរដ្ឋអាមេរិកមានគម្រោងចាប់ផ្តើមដំណាក់កាលទី ២ នៃការធ្វើតេស្តលើមនុស្សដើម្បីការពារការឆ្លងជំងឺកូវីដ១៩ នៅក្នុងប្រទេសអាហ្វ្រិកខាងត្បូងដែលកំពុងមានការកើនឡើងនូវករណីឆ្លងជំងឺនេះ។
ក្រុមហ៊ុន Novavax បានប្រាប់ឱ្យដឹងនៅក្នុងសេចក្តីប្រកាសមួយថា ការពិសោធន៍នេះនឹងធ្វើឡើងលើមនុស្សពេញវ័យដែលមានសុខភាពល្អចំនួន ២ ពាន់ ៦ រយ ៦៥ នាក់នៅក្នុងប្រទេសអាហ្វ្រិកខាងត្បូង។
ការសាកល្បងនេះក៏នឹងប្រៀបធៀបប្រសិទ្ធភាពរបស់ថ្នាំវ៉ាក់សាំងនេះលើមនុស្សពេញ វ័យផ្ទុកមេរោគ HIV ដែលមានសុខភាពនឹងនរចំនួន ២៤០ នាក់ផងដែរ ដែលការឆ្លើយ តបរបស់ភាពស៊ាំនឹងជំងឺរបស់ពួកគេ អាចខុសពីអ្នកដែលមិនមានផ្ទុកមេរោគ HIV។
ការរកឃើញដំបូងៗពីការសាកល្បងលើកទី ១ បានបង្ហាញថា មនុស្សដែលទទួលបានថ្នាំវ៉ាក់សាំងចំនួន២ដូសបានបង្កើតអង់ទីគ័រការពារ ដែលអាចរារាំងមិនឱ្យវីរុសចូលក្នុងកោសិកាបាន បន្ទាប់ពីបានទទួលបានដូសទី ២នៃថ្នាំវ៉ាក់សាំង។
រួមជាមួយនឹងការវាយតម្លៃលើការឆ្លើយតបនៃភាពស៊ាំនឹងជំងឺក្នុងដំណាក់កាលសាកល្បងលើកទី ២ ក្នុងប្រទេសអាហ្វ្រិកខាងត្បូង ក្រុមហ៊ុន Novavax ក៏នឹងរៀបចំការ សាកល្បងដំណាក់កាលទី ២ នៅក្នុងសហរដ្ឋអាមេរិក និងប្រទេសអូស្ត្រាលីក្នុងពេលឆាប់ៗខាងមុខនេះផងដែរ។
អាហ្វ្រិកខាងត្បូងជាប្រទេសដែលមានករីណឆ្លងជំងឺកូវីដ១៩ ច្រើនបំផុតទី៥នៅក្នុងពិភពលោក ដោយមានការឆ្លងចំនួន ៥ សែន ៨ ម៉ឺន ៣ ពាន់ករណី និងការស្លាប់ចំនួនជាង១ម៉ឺន១ពាន់៦រយនាក់៕
