ក្រសួងយុត្តិធម៌អាមេរិកកាលពីថ្ងៃព្រហស្បតិ៍បានប្រកាសចោទប្រកាន់បទឧក្រិដ្ឋប្រឆាំងនឹងធនាគារវិយោគ Goldman Sachsនិងអ្នកវិភាគហរិញ្ញវត្ថុម៉ាឡេស៊ីម្នាក់ពីបទជាប់ពាក់ព័ន្ធនឹងគម្រោងសូកប៉ាន់ដែលត្រូវបានរៀបចំយ៉ាងល្អិតល្អន់មួយ។
ក្រសួងយុត្តិធម៌បានប្រកាសថាលោក Low Taek Jhoអតីតមន្រ្តីនៃមូលនិធិ 1MDBនិងលោក Ng Chong Hwaជាអតីតអ្នកវិនិយោគិនត្រូវបានចោទប្រកាន់ថាបានឃុបឃិតលាងលុយរាប់ពាន់លានដុល្លារបានមកពីមូលធិនិនេះ។ លោក Low ដែលមិនទាន់ត្រូវបានចាប់ខ្លួននៅឡើយនោះ ត្រូវបានគេឃើញចុងក្រោយនៅប្រទេសចិន។
លោក Tim Leissnerអតីតវិនិយោគិននៃធនាគារវិនិយោគ Goldman Sachsបានសារភាពទទួលកំហុសរួចហើយ និងបានយល់ព្រមបង់ប្រាក់ជិត៤៤លានដុល្លារ។ នេះបើយោងតាមឯកសារដែលត្រូវបានបង្ហាញក្នុងតុលាការសហព័ន្ធនៅទីក្រុងញ៉ូវយ៉ក។
កាលពីមុនរដ្ឋអាជ្ញាសហរដ្ឋអាមេរិកបានដាក់ពាក្យបណ្តឹងរដ្ឋប្បវេណីរឹបអូសទ្រព្យ
សម្បត្តិដែលត្រូវបានគេចោទប្រកាន់ថាបានលួចពីមូលនិធិ 1MDB ដែលជារឿងអាស្រូវធ្វើឲ្យរង្គោះរង្គើឆាកនយោបាយនៅក្នុងប្រទេសម៉ាឡេស៊ី។ អតីតនាយករដ្ឋមន្រ្តីម៉ាឡេស៊ីលោក Najib Razakអ្នកដែលបានបង្កើតមូលនិធិនេះកាលពីឆ្នាំ២០០៩ ត្រូវបានចោទប្រកាន់បទឧក្រិដ្ឋកាលពីសប្តាហ៍មុនថាបានប្រើប្រាស់មិនត្រឹមត្រូវនូវប្រាក់របស់មូលនិធិ 1MDB។ ក៏ប៉ុន្តែលោក Razakមិនសារភាពទទួលកំហុសលើបទចោទទាំងអស់។
លោក Najib Razakបានចាញ់ការបោះឆ្នោតកាលពីខែឧសភា និងបានបញ្ចប់ការដឹកនាំរបស់គណបក្សលោកដែលមានអាយុកាល ៦ទសវត្សរ៍មកហើយនៅក្នុងជីវិតនយោបាយម៉ាឡេស៊ី។
ការប្រកាសចោទប្រកាន់កាលពីថ្ងៃព្រហស្បតិ៍គឺជាការចោទប្រកាន់បទឧក្រិដ្ឋជាលើកដំបូងរបស់ក្រសួងយុត្តិធម៌អាមេរិកប្រឆាំងនឹងបុគ្គល ជារឿងអាស្រូវដែលលោករដ្ឋមន្រ្តីក្រសួងយុត្តិធម៌ Jeff Sessionsបានពណ៌នានៅក្នុងសេចក្តីថ្លែងការរបស់លោកកាលពីខែធ្នូថាជាអំពើពុករលួយដ៏អាក្រក់បំផុតរបស់រដ្ឋាភិបាលនៃប្រទេសមួយ៕
