សហរដ្ឋអាមេរិកកាលពីថ្ងៃពុធបានសរសើរផែនការរបស់ប្រទេសអាល្លឺម៉ង់ ដែលជាសម្ព័ន្ធមិត្តរបស់អង្គការអូតង់ ចំពោះគម្រោងបើកបរនាវាចម្បាំងឆ្លងកាត់សមុទ្រចិនខាងត្បូងដែលមានជម្លោះ ដោយបានហៅផែនការនេះថាជាការគាំទ្រប្រកបដោយការស្វាគមន៍មួយ«ដល់សណ្តាប់ធ្នាប់អន្តរជាតិដែលផ្អែកលើច្បាប់»នៅក្នុងតំបន់។
ពួកមន្ត្រីអាល្លឺម៉ង់បាននិយាយកាលពីថ្ងៃអង្គារថា កងនាវាអាល្លឺម៉ង់នឹងធ្វើដំណើរទៅកាន់តំបន់អាស៊ីនៅខែសីហា ហើយពេលត្រឡប់មកវិញ នាវានេះនឹងក្លាយជានាវាចម្បាំងអាល្លឺម៉ង់ដំបូងគេដែលបើកឆ្លងកាត់សមុទ្រចិនខាងត្បូងចាប់តាំងពីឆ្នាំ២០០២មក។
អ្នកនាំពាក្យក្រសួងការបរទេសសហរដ្ឋអាមេរិកបាននិយាយថា៖ «សហរដ្ឋអាមេរិកមានផលប្រយោជន៍ជាតិនៅក្នុងការថែរក្សាសន្តិភាពនិងស្ថិរភាព គោរពច្បាប់អន្តរជាតិ ធ្វើពាណិជ្ជកម្មតាមផ្លូវច្បាប់ដោយគ្មានការបង្អាក់ សេរីភាពនៃការធ្វើនាវាចរណ៍ និងការប្រើប្រាស់សមុទ្រដោយស្របច្បាប់»។
ចិនបានទាមទារផ្នែកភាគច្រើននៃសមុទ្រចិនខាងត្បូងទាំងមូល។ អ្នកនាំពាក្យក្រសួងការបរទេសចិនបាននិយាយថា ប្រទេសនានាមានសេរីភាពក្នុងការធ្វើនាវាចរណ៍ និងការហោះហើរឆ្លងកាត់ផ្លូវទឹកនោះនៅក្រោមច្បាប់អន្តរជាតិ ប៉ុន្តែ បាននិយាយទៀតថា «ប្រទេសទាំងនោះមិនអាចយកលេសដើម្បីធ្វើឲ្យអន្តរាយដល់អធិបតេយ្យភាព និងសន្តិសុខរបស់ប្រទេសដទៃដែលស្ថិតនៅតាមបណ្តោយសមុទ្រនោះបានទេ»៕
