ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

សហរដ្ឋអាមេរិក ស្នើឱ្យ​ជនជាតិ​អាមេរិក​ចាកចេញ​ពី​ប្រទេស​អេត្យូពី ខណៈ​ក្រុម​ឧទ្ទាម​រុល​ចូល​រដ្ឋធានី


រូបឯកសារ៖ កងកម្លាំងតំបន់ Tigray នៅលើរថយន្តដឹកទំនិញដែលគ្មានដំបូលនៅផ្នែកខាងក្រោយ ដឹកទាហានរដ្ឋាភិបាលអេត្យូពី និងសមាជិកកងជីវពលសម្ព័ន្ធមិត្តដែលត្រូវបានចាប់ខ្លួន គ្រាដែលពួកគេបើកនៅតាមផ្លូវដែលទំនងជាត្រូវបាននាំទៅមជ្ឈមណ្ឌលឃុំឃាំងនៅទីក្រុង Mekele នៃតំបន់ Tigray នៅថ្ងៃទី២២ ខែតុលា ឆ្នាំ២០២១។
រូបឯកសារ៖ កងកម្លាំងតំបន់ Tigray នៅលើរថយន្តដឹកទំនិញដែលគ្មានដំបូលនៅផ្នែកខាងក្រោយ ដឹកទាហានរដ្ឋាភិបាលអេត្យូពី និងសមាជិកកងជីវពលសម្ព័ន្ធមិត្តដែលត្រូវបានចាប់ខ្លួន គ្រាដែលពួកគេបើកនៅតាមផ្លូវដែលទំនងជាត្រូវបាននាំទៅមជ្ឈមណ្ឌលឃុំឃាំងនៅទីក្រុង Mekele នៃតំបន់ Tigray នៅថ្ងៃទី២២ ខែតុលា ឆ្នាំ២០២១។

ក្រសួង​ការ​បរទេស​សហ​រដ្ឋ​អាមេរិក​បាន​និយាយ​ថា ​បេសកជន​ពិសេស​របស់​សហ​រដ្ឋ​អាមេរិក​សម្រាប់​តំបន់​ខាងកើត​ទ្វីប​អាហ្រ្វិក (Horn of Africa)​ លោក ​Jeffrey Feltman ​នឹង​ធ្វើ​ដំណើរ​ទៅ​ប្រទេស​អេត្យូពី​ថ្ងៃ​ព្រហស្បតិ៍ ​និង​ថ្ងៃ​សុក្រ​ បន្ទាប់ពី​កង​កម្លាំង​ឧទ្ទាម​មក​ពី​តំបន់​ Tigray ​ភាគ​ខាងជើង​បាន​និយាយ​ថា​ ពួកគេ​កំពុង​រុល​ចូល​រដ្ឋធានី​ ហើយ​រដ្ឋាភិបាល​នៅ​ទីក្រុង​អាឌីសអាបេបា​ (Addis Ababa) ​បាន​ប្រកាស​ភាព​អាសន្ន។​

នៅ​ថ្ងៃ​ព្រហស្បតិ៍​ ប្រទេស​អេត្យូពី​ ប្រារព្ធ​ខួបមួយ​ឆ្នាំ​នៃ​ការ​ប្រយុទ្ធ​គ្នា​យ៉ាង​ព្រៃផ្សៃ​រវាង​កងកម្លាំង​រដ្ឋាភិបាលជាសម្ព័ន្ធ​មិត្តជាមួយ​កង​កម្លាំង​អេរីត្រេ និង​ពួកឧទ្ទាម​នៅ​ក្នុង​តំបន់ ​Tigray ​ភាគខាង​ជើង។​ ឥឡូវនេះ ​កងកម្លាំង​ឧទ្ទាម​និយាយ​ថា​ ពួកគេ​កំពុង​ឆ្ពោះ​ទៅ​កាន់​រដ្ឋធានី អាឌីសអាបេបា​ នាយក​រដ្ឋមន្ត្រី​អេត្យូពី ​បាន​ប្តេជ្ញា​ថា ​រដ្ឋាភិបាល​របស់​លោក​នឹង​ឈ្នះ។​

លោក ​ Abiy Ahmed ​ថា​ «អេត្យូពី​ នឹង​មិន​ដួល​រលំ​ទេ។ ​អេត្យូពី​ នឹង​រីកចម្រើន។ ​ អេត្យូពី​ នឹង​បន្ត​ជារៀង​រហូត​ដោយ​មាន​កិត្តិយស​ដោយ​យក​ឈ្នះ​អ្នក​ដែល​សាកល្បង​ដោយ​លះបង់​ឈាម និង​ឆ្អឹង​ពលរដ្ឋ»។​

រដ្ឋាភិបាល​អេត្យូពី​បាន​ប្រកាស​ភាពអាសន្ន​ និង​បាន​អំពាវនាវ​ឱ្យអ្នក​ស្រុក​ការពារ​សង្កាត់​របស់​ពួកគេ បើពួក​ឧទ្ទាម​ចូលមក​ក្នុង​រដ្ឋធានី។ ​ប្រធាន​តំបន់ ​Tigray ​បាន​ស្តី​បន្ទោស​រដ្ឋាភិបាល​អេត្យូពី​ និង​សម្ព័ន្ធ​មិត្ត​ចំពោះ​ការ​ឈឺ​ចាប់​នានា។​

លោក​ Debretsion Gebremichael​ និយាយថា ​«ឈ្មួញសង្គ្រាម ​បាន​សម្រេច​ចិត្ត​បន្ត​សង្រ្គាម​ ហើយ​យើង​បាន​ចូល​ធ្វើ​សង្រ្គាម​នេះ ​ពីព្រោះ​នេះ ជា​ជម្រើស​តែមួយ​គត់​ដើម្បី​បំផ្លាញ​សត្រូវ​របស់​យើង»។​

អ្នក​នាំពាក្យ​ក្រសួង​ការបរទេស​សហរដ្ឋ​អាមេរិក​លោក ​Ned Price ​បាន​អំពាវនាវ​ឱ្យ​ភាគី​ចម្បាំង​ទាំងអស់​បញ្ចប់​ការ​ប្រយុទ្ធ​គ្នា​ និង​ការពារ​អាយុ​ជីវិត​ និង​សិទ្ធិ​របស់​ប្រជា​ពលរដ្ឋ។ លោក​បាន​និយាយ​ថា​ ឥឡូវ​នេះ ​ក្រសួង​ការ​បរទេស​ណែនាំ​មិន​ឱ្យ​ពលរដ្ឋ​អាមេរិកាំង ​ធ្វើដំណើរ​ទៅ​ប្រទេស​អេត្យូពីទេ។

ប្រធាន​សិទ្ធិ​មនុស្ស​របស់​អង្គការ​សហ​ប្រជាជាតិ​បាន​និយាយ​ថា ​ជម្លោះ​រយៈពេល​មួយឆ្នាំ​នេះ​ «ឃោរឃៅ​បំផុត»។

របាយ​ការណ៍​របស់​ការិយាល័យ​សិទ្ធិ​មនុស្ស​នៃ​អង្គការ​សហ​ប្រជាជាតិ​និង​គណៈ​កម្មាធិការ​សិទ្ធិ​មនុស្ស​អេត្យូពី​ដែល​បង្កើត​ដោយ​រដ្ឋាភិបាល​បាន​រកឃើញ​ថា​ អំពើ​ហិង្សា​ផ្លូវភេទ​ បាន​កើត​មាន​នៅ​ក្នុង​ជម្លោះ​នេះ​ មាន​ការ​រំលោភ​បូកលើ​ស្ត្រី និង​ក្មេងស្រី ព្រមទាំង​លើ​បុរស ​និង​ក្មេងប្រុស​ផង​ដែរ៕

អ្នកស្រី Heather Murdock នៃវីអូអេ រួមចំណែកនៅក្នុងសេចក្តីរាយការណ៍នេះ។

XS
SM
MD
LG