ភ្ជាប់​ទៅ​គេហទំព័រ​ទាក់ទង

សហរដ្ឋ​អាមេរិក​ដាក់​ទណ្ឌកម្ម​ថ្មី​លើ​ធនាគារ និង​មន្ត្រី​ធនាគារ​កូរ៉េ​ខាង​ជើង


រដ្ឋមន្ត្រី​ក្រសួង​ហិរញ្ញវត្ថុ​អាមេរិក​លោក Steven Mnuchin ទទួល​សំណួរ​មួយ​នៅ​ក្នុង​សន្និសីទ​កាសែត​នៅ​សណ្ឋាគារ Hilton Midtown ក្នុង​បុរី​ញូវយ៉ក កាលពី​ថ្ងៃទី២១ ខែកញ្ញា ឆ្នាំ២០១៧។

កាល​ពី​ថ្ងៃ​អង្គារ​ម្សិលមិញ ក្រសួង​ហិរញ្ញវត្ថុ​សហរដ្ឋ​អាមេរិក​បាន​ប្រកាស​អំពី​ការ​ដាក់​ទណ្ឌកម្ម​ថ្មី​ប្រឆាំង​នឹង​ធនាគារ​កូរ៉េ​ខាង​ជើង ៨ កន្លែង និង​មន្ត្រី​ធនាគារ​កូរ៉េ​ខាង​ជើង ២៦ នាក់។

សេចក្ដី​ប្រកាស​របស់​ក្រសួង​ហិរញ្ញវត្ថុ​អាមេរិក​បាន​ឲ្យ​ដឹង​ថា វិធានការ​នេះ «សំដៅ​លើ​ការ​ប្រើប្រាស់​របស់​រដ្ឋាភិបាល​កូរ៉េ​ខាង​ជើង​នូវ​ប្រព័ន្ធ​ហិរញ្ញវត្ថុ​អន្តរជាតិ​ដើម្បី​សម្រួល​ដល់​កម្មវិធី​អាវុធ​ប្រល័យ​លោក និង​គ្រាប់​ផ្លោង​មីស៊ីល​របស់​ខ្លួន»។

រដ្ឋមន្ត្រី​ក្រសួង​ហិរញ្ញវត្ថុ​អាមេរិក​លោក Steven Mnuchin បាន​និយាយ​ថា៖ «វិធានការ​នេះ​បង្កើន​យុទ្ធសាស្ត្រ​របស់​យើង​ក្នុង​ការ​ផ្ដាច់​កូរ៉េ​ខាង​ជើង​ឲ្យ​នៅ​ឯកោ ដើម្បី​សម្រេច​ឲ្យ​បាន​នូវ​គោល​បំណង​ធំ​របស់​យើង គឺ​ការ​ធ្វើ​ឲ្យ​ឧបទ្វីប​កូរ៉េ​មាន​សន្តិភាព និង​គ្មាន​អាវុធ​នុយក្លេអ៊ែរ។ វិធានការ​នេះ​ក៏​ស្រប​ទៅ​នឹង​សេចក្ដី​សម្រេច​របស់​ក្រុម​ប្រឹក្សា​សន្តិសុខ​អង្គការ​សហប្រជាជាតិ​ផង​ដែរ‍»។

កាល​ពី​ដើម​ខែ​នេះ ក្រុម​ប្រឹក្សា​សន្តិសុខ​អង្គការ​សហប្រជាជាតិ​បាន​អនុម័ត​លើ​ការ​ដាក់​ទណ្ឌកម្ម​សេដ្ឋកិច្ច​ជុំ​ថ្មី​មួយ​ទៀត​ប្រឆាំង​នឹង​កូរ៉េ​ខាង​ជើង បន្ទាប់​ពី​រដ្ឋាភិបាល​ក្រុង​ព្យុងយ៉ាង​ធ្វើ​ការ​សាកល្បង​អាវុធ​នុយក្លេអ៊ែរ​ដែល​អាច​ជា​គ្រាប់​បែក​អ៊ីដ្រូហ្សែន។

ប្រសិន​បើ​អនុវត្ត​ឲ្យ​បាន​ពេញលេញ ការ​ដាក់​ទណ្ឌកម្ម​ថ្មីៗ​ទាំង​នេះ​នឹង​កាត់​ផ្ដាច់​ការ​នាំ​ចូល​ប្រេង​ចំនួន​មួយ​ភាគ​បី កាត់​បន្ថយ​ជាង​ពាក់​កណ្ដាល​នូវ​ការ​នាំ​ចូល​ឧស្ម័ន ប្រេង​ម៉ាស៊ូត និង​ប្រេង​ឥន្ធនៈ​ខ្លាំង​ដទៃ​ទៀត និង​ហាម​ឃាត់​ទាំង​ស្រុង​នូវ​ការ​នាំ​ចូល​ឧស្ម័ន​ធម្មជាតិ និង​សារធាតុ​ផ្សេងៗ​ដែល​ជំនួស​ឲ្យ​ប្រេង ទៅ​កាន់​ប្រទេស​កូរ៉េ​ខាង​ជើង។

មន្ត្រី​ធនាគារ​កូរ៉េ​ខាង​ជើង​ទាំង ២៦ នាក់ ដែល​រង​ការ​ដាក់​ទណ្ឌកម្ម​របស់​សហរដ្ឋ​អាមេរិក​កាល​ពី​ថ្ងៃ​អង្គារ​ម្សិលមិញ រស់នៅ​បរទេស​ប៉ុន្តែ​ធ្វើ​ការ​ឲ្យ​ធនាគារ​កូរ៉េ​ខាង​ជើង។ មន្ត្រី ១៩ នាក់​កំពុង​រស់នៅ​ក្នុង​ប្រទេស​ចិន ៣ នាក់​នៅ​ក្នុង​ប្រទេស​រុស្ស៊ី ម្នាក់​នៅ​ក្នុង​ប្រទេស​លីប៊ី និង​ម្នាក់​ទៀត​នៅ​ក្នុង​ប្រទេស​អេមីរ៉ាត​អារ៉ាប់រួម៕

XS
SM
MD
LG