ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ឯក​អគ្គរដ្ឋ​ទូត​អាមេរិក៖ ព្រះ​រាជ​អាជ្ញា​​បំភ្លៃ​​ភស្តុតាង​ចោទ​​អាមេរិក​ពាក់ព័ន្ធ​នឹង​សំណុំ​រឿង​លោក​កឹម សុខា


លោក W. Patrick Murphy ឯកអគ្គ​រដ្ឋទូត​សហរដ្ឋអាមេរិក​ប្រចាំកម្ពុជា ចាកចេញ​ពីសវនាការ​លោក​ កឹម សុខា លើ​សំណុំ​រឿង «សន្ទិដ្ឋិភាព​ជាមួយ​បរទេស» នៅ​ថ្ងៃ​ព្រហស្បតិ៍ សប្ដាហ៍​ទី៨​ ទី១២ ខែមីនា ឆ្នាំ២០២០។ (ទុំ ម្លិះ/VOA)

ឯក​អគ្គរដ្ឋ​ទូត​សហរដ្ឋ​អាមេរិក​ប្រចាំ​កម្ពុជា​នៅ​ថ្ងៃ​ព្រហស្បតិ៍​នេះ លើក​ឡើង​ថា ​សហរដ្ឋ​អាមេរិក​មាន​ការ​រំខានចិត្ត​ដែល​ព្រះ​រាជ​អាជ្ញា​ក្នុង​សវនាការ​កាត់​ទោស​លោក​ កឹម សុខា​ បាន​បំភ្លៃភស្តុតាង​ចោទ​ប្រកាន់​ថា ​សហរដ្ឋ​អាមេរិក​មាន​ពាក់ព័ន្ធ​នឹង​សំណុំ​រឿង​នេះ។

លោក ​Patrick Murphy ​លើក​ឡើង​បែប​នេះ​ ក្រោយ​បាន​ចូលរួម​ជា​លើក​ដំបូង​ស្តាប់​សវនាការ​ជំនុំ​ជម្រះសំណុំ​រឿង​លោក​ កឹម សុខា ​ដែលជាសវនាការ​ថ្ងៃ​ទី​១៦ នៃ​សប្តាហ៍​ទី​៨ ពាក់ព័ន្ធ​នឹង​បទ «សន្ទិដ្ឋិភាព​ជាមួយ​បរទេស» ​ដែលមាន​ការ​ចោទ​ថា ​លោក កឹម សុខា​ បាន​ឃុប​ឃិត​ជាមួយ​បរទេស ​រៀប​គម្រោង​ផ្តួល​រំ​លំ​រដ្ឋាភិបាល។​

បន្ទាប់ពី​ចំណាយ​ពេល ១៥​នាទី ​នៅ​ក្នុង​សវនាការ​ លោក​ Patrick Murphy ​បាន​ចេញ​ពី​បន្ទប់​សវនាការ និង​និយាយ​ទៅ​កាន់​អ្នក​សារ​ព័ត៌មាននៅ​ផ្លូវ​ម្ខាងខាង​មុខ​តុលាការ ​ក្រោយ​ពី​សមត្ថកិច្ច​តុលាការ​ហាម​មិន​ឲ្យ​ឈរ​នៅ​ខាង​មុខ​របង​តុលាការ។​

លោក​ Patrick Murphy ​ថ្លែង​ថា​ ​សហរដ្ឋ​អាមេរិក​កំពុង​តាមដាន​សវនាការ​កាត់ក្តី​លោក​ កឹម សុខា យ៉ាង​ដិត​ដល់ ​ដោយមាន​បុគ្គលិក​ស្ថានទូត​បាន​ចូលរួម​គ្រប់​ថ្ងៃ​នៃ​ដំណើរការ​សវនាការ​នេះ។​ លោក​បន្ត​ថា​ ​ដំណើរការ​សវនាការ​នេះ​អាច​មាន​មាន​ផល​វិបាក​ទៅ​លើ​នីតិរដ្ឋ ​និង​ដំណើរ​ការ​ត្រឹមត្រូវ​តាម​ផ្លូវ​ច្បាប់​នៅ​កម្ពុជា ​និង​ទំនាក់​ទំនង​អន្តរជាតិ​របស់​កម្ពុជា។​

លោក​ Patrick Murphy ​បន្ថែមថា ​សហរដ្ឋ​អាមេរិក​មាន​ការ​រំខាន​ចិត្ត​ដោយ​សារ​មាន​ការ​ប្រឌិត​រឿង​ចោទសហ​រដ្ឋ​អាមេរិក​ពាក់ព័ន្ធ​នឹង​សំណុំ​រឿង​លោក​កឹម សុខា។

«យើង​មាន​ការរំខាន​ចិត្ត ​ដោយ​ខាង​ព្រះរាជ​អាជ្ញា​បាន​លើក​ឡើង​នូវ​រឿង​មិន​ពិត ​ដែល​ត្រូវ​បាន​ប្រឌិត​ឡើង​ទាក់ទង​នឹង​សហរដ្ឋ​អាមេរិក។ ​ការណ៍​ពិត​គឺសហរដ្ឋ​អាមេរិក​បាន​ផ្តល់​ជំនួយ​ចំនួន​ ៣​ពាន់​លាន​ដុល្លា រ​ដល់​ប្រទេស​កម្ពុជា​ក្នុង​ពេល​ប៉ុន្មាន​ទស​វត្សរ៍​កន្លង​ទៅ​នេះ​ ដោយ​រួម​ទាំង​ជំនួយ​ប្រកប​ដោយ​តម្លាភាព ដើម្បី​ពង្រឹង​ស្ថាប័ន ​និង​គណបក្ស​នយោបាយ​ ស្រប​តាម​រដ្ឋ​ធម្មនុញ្ញ​របស់​ប្រទេស​កម្ពុជា»។​

លោកក៏​បាន​បន្ថែម​ថា​ សហរដ្ឋ​អាមេរិក​គាំទ្រគណបក្ស​នយោបាយ​ទាំងអស់ ​ហើយ​ថា ​សហរដ្ឋ​អាមេរិក​តែង​ប្រកាស​ថា​ ​មិនជ្រៀត​ជ្រែកកិច្ច​ការ​ផ្ទៃ​ក្នុងរបស់​ប្រទេស​កម្ពុជា​ និង​តែង​គោរព​ពេញ​លេញ​ចំពោះ​ឯករាជ្យ​ភាព​ និង​អធិបតេយ្យ​ភាព​របស់កម្ពុជា។ ​លោកក៏​បាន​បន្ថែម​ថា​ ពិភព​លោក​ស្គាល់​កេរ្តិ៍​ឈ្មោះ​លោក​ កឹម សុខា ​តាម​រយៈ​ការងារ​លើក​តម្កើង​សិទ្ធិ​មនុស្ស​របស់​លោក។​

លោក​ កឹម សុខា​ ប្រធាន​គណបក្ស​សង្គ្រោះ​ជាតិ​ដែល​ត្រូវ​តុលាការ​រំលាយ​មុន​ការ​បោះ​ឆ្នោត​ឆ្នាំ​២០១៨ ​ត្រូវ​បាន​ចោទ​ប្រកាន់​ពី​បទ​រួម​គំនិត​ជាមួយ​បរទេសក្នុង​គម្រោង​មួយ​ដែល​រដ្ឋាភិបាល​របស់​លោក​ ហ៊ុន សែន ​ហៅ​ថា«ការ​ប៉ុនប៉ង​ផ្ដួល​រំលំ​រដ្ឋាភិបាល»​ ដោយ​មាន​សហរដ្ឋ​អាមេរិក​នៅ​ពី​ក្រោយ។ ​ទាំង​លោក​ កឹម សុខា ​និង​សហរដ្ឋ​អាមេរិក​បាន​បដិសេធ​ការ​ចោទ​ប្រកាន់​នេះ។​

ក្រោយ​ការ​ថ្លែង​របស់​ឯក​អគ្គរដ្ឋទូត​សហរដ្ឋ​អាមេរិក​ប្រចាំ​កម្ពុជា ​សាលា​ដំបូង​រាជធានី​ភ្នំពេញ​បាន​ចេញ​សេចក្តី​ប្រកាស​ព័ត៌មាន​មួយ​ឆ្លើយ​តបនឹង​ការ​លើក​ឡើង​នោះ។ ​អ្នក​នាំ​ពាក្យ​សាលា​ដំបូង​រាជធានី​ភ្នំពេញ​បញ្ជាក់​ថា៖​

«ព្រះរាជ​អាជ្ញា​ពុំ​បាន​ចោទ​ប្រកាន់​ប៉ះពាល់​ទៅ​លើ​សហរដ្ឋ​អាមេរិក ​រដ្ឋ​បរទេស ​ឬ​ភ្នាក់ងារ​បរទេស​ណាមួយ​ឡើយ​ ព្រះ​រាជអាជ្ញា​បាន​ចោទ​ប្រកាន់​តែ​ទៅ​លើ​ជនជាប់​ចោទ​ឈ្មោះ​ កឹម សុខា ​ដែល​មាន​អង្គហេតុ ​អង្គច្បាប់ ​ព្រមទាំង​មាន​ធាតុ​ផ្សំ​គ្រប់​គ្រាន់​ទៅ​តាម​ច្បាប់​នៃ​ព្រះ​រាជាណា​ចក្រ​កម្ពុជា​តែ​ប៉ុណ្ណោះ»។​

លោក​ ជិន ម៉ាលីន ​អ្នក​នាំ​ពាក្យ​ក្រសួង​យុត្តិធម៌​ និង​ជា​អនុប្រធាន​គណៈ​កម្មាធិការ​សិទ្ធិ​មនុស្ស​កម្ពុជា ​ប្រាប់ ​VOA ​ថា ​សវនាការ​លើ​លោក ​កឹម សុខា ​គឺ​សម្រេច​លើ​ការ​អនុវត្ត​របស់​លោក​ កឹម សុខា​ ​តែ​មិន​ពាក់ព័ន្ធ​នឹង​ការ​មាន​កេរ្តិ៍​ឈ្មោះ ​ឬ​អត់​នោះ​ទេ។ ​លោក​បន្ត​ថា រដ្ឋាភិបាល​កម្ពុជា និង​តុលាការ​មិន​ដែល​ចោទ​ថា​សហរដ្ឋ​អាមេរិក​មាន​ជាប់​ពាក់ព័ន្ធ​នឹង​លោក​ កឹម សុខា នោះ​ទេ។​

«មក​ដល់​ពេល​នេះ​មិន​ទាន់​មាន​ស្ថាប័ន​ណា​សម្រេច​ថា​ ​តើ​អាមេរិក​ពាក់ព័ន្ធ ​ឬ​មិន​ពាក់ព័ន្ធ​នោះ​ទេ។​ វា​ស្ថិត​នៅ​ក្នុង​ដំណើរ​ការ​នីតិវិធី​របស់​តុលាការ។ ​ហើយ​រដ្ឋាភិបាល​ក៏​មិន​ដែល​លើក ​ក៏​មិន​ដែល​ចោទ​អាមេរិកនៅ​ពី​ក្រោយ​សំណុំ​រឿង ​និង​ពាក់​ព័ន្ធ​នឹង​សំណុំ​រឿង​នោះ​ដែរ។ ​គឺ​លោក ​កឹម សុខា ​ខ្លួន​ឯង​ដែល​បញ្ជាក់​ខ្លួន​ឯង ​ហើយ​មាន​ឯកសារ​នៅ​ក្នុង​សំណុំ​រឿង»។​

លោក កឹម សុខា​ ត្រូវ​បាន​ចាប់​ខ្លួន​កាល​ពី​ដើម​ខែ​កញ្ញា ឆ្នាំ​២០១៧ ​ហើយ​ត្រូវ​បាន​យក​ទៅ​ដាក់ក្នុង​ពន្ធនាគារ​អស់​រយៈពេល​ជាង​មួយ​ឆ្នាំ។ ​តុលាការ​បាន​សម្រេច​បន្ធូរបន្ថយ​លក្ខខណ្ឌ​នៃ​ការ​ឃុំខ្លួន​លោក កាល​ពី​ខែ​វិច្ឆិកា ឆ្នាំ​២០១៩ ​ដោយ​អនុញ្ញាត​ឲ្យ​នៅ​ផ្ទះ​មួយ​រយៈ។​ ​បច្ចុប្បន្ន ​លោកមិន​ត្រូវ​បាន​អនុញ្ញាត​ឲ្យ​ធ្វើ​នយោបាយ ​និង​ធ្វើ​ដំណើរ​ទៅក្រៅ​ប្រទេស​នោះ​ទេ។​

នៅសវនាការ​កាត់​ទោសលោក​ កឹម សុខា រៀង​រាល់​សប្តាហ៍មានមន្រ្តី​ស្ថានទូតមួយ​ចំនួន​ ដូចជា​មន្ត្រី​ស្ថានទូត​សហរដ្ឋ​អាមេរិក ​អង់គ្លេស ​អាល្លឺម៉ង់ ​ស៊ុយអែត ​អូស្រ្តាលី ​ជប៉ុន ​សហគមន៍​អឺរ៉ុបនិង​អង្គការ​សហ​ប្រជាជាតិ​ ​ចូលរួម ​និង​ឃ្លាំ​មើល។​

ក្នុង​សវនាការ​នៅ​ព្រឹក​ថ្ងៃ​ព្រហស្បតិ៍នេះ ​តំណាង​អយ្យការ​ស្នើ​ឲ្យ​ចាក់​វីដេអូដែល​ជា​ដំណើរ​ទស្សន​កិច្ច​របស់លោក​ កឹម សុខា ​និង​លោក ​សម រង្ស៊ី ទៅ​កាន់​ប្រទេស​ហ្វាំងឡង់​ កាល​ពី​ខែ​មករា​ ឆ្នាំ​២០១៣។ ​វីដេអូ​នោះបង្ហាញ​ពី​ការ​ថ្លែងរបស់​លោក​ សម រង្ស៊ី ​ភ្ជាប់​ជា​មួយ​ការ​អះអាង​ថា​ ជាភស្តុតាង​បង្ហាញ​ពី​ការ​ប្រើ​ហិង្សា​របស់​លោកសម រង្ស៊ី។

មេធាវី​ការពារក្តី​ឲ្យ​លោក កឹម សុខា ​បាន​និយាយ​ថា ​សុន្ទរកថារបស់​លោក​ សម រង្ស៊ី ​គឺជា​ការ​ថ្លែងរបស់​លោក​ សម រង្ស៊ី​ ខុស​ពី​សារ​នយោបាយ ​ឬ​កម្មវិធី​នយោបាយ​ដែល​ឆ្លុះ​បញ្ចាំង​ពី​ជំហរ​គោល​នយោបាយ​របស់​គណបក្ស​សង្គ្រោះ​ជាតិ។​

លោក​ កឹម សុខា ​ដែល​ឈរ​ក្នុង​រង្វង់​ក្រចក​សេះ​ដូច​សព្វ​ដង​ ​ក៏​បាន​ថ្លែង​ថា ​ការ​ថ្លែង​របស់​លោក​ សម រង្ស៊ី​ ក្នុង​វីដេអូ​នោះ​ជា​សារ​របស់​បុគ្គល​ផ្ទាល់​ខ្លួន ​ដែល​ត្រូវ​មាន​ការ​ទទួល​ខុស​ត្រូវ​របស់​បុគ្គល។​ ចំណែក​សារ​នយោបាយ​របស់​គណបក្ស​ដែល​ត្រូវ​បាន​អនុម័ត​ដោយ​គណៈ​កម្មាធិការ​អចិន្រ្តៃយ៍​របស់​គណបក្ស ទើប​ជាការ​ទទួល​ខុស​ត្រូវ​របស់​គណបក្ស។​

លោក​ កឹម សុខា​ ក៏​បាន​បន្ថែមក្នុង​អំឡុង​ឆ្លើយ​សំណួរ​ក្នុង​សវនាការ​ថា ​លោក​សប្បាយ​ចិត្ត​ដែល​បាន​មក​តុលាការ​ដើម្បី​បញ្ជាក់​អំពី​ការណ៍​ពិត។ ​លោក​បញ្ជាក់​ថា ​ការណ៍​ពិត​នោះ​គឺ​សំដៅ​លើ​ការ​ដែល​លោក​ចាប់​ផ្តើម​សម្រេច​បង្កើត​គណបក្ស​សង្គ្រោះ​ជាតិ​ដោយ​ឈរ​លើ​គោល​ការណ៍​អហិង្សា​ដើម្បី​ឈាន​ទៅ​រក​ការ​បោះឆ្នោត។​

ក្រោយ​ការ​បញ្ចប់​ការ​ដេញ​ដោល​អង្គហេតុ​ថ្មី​ពាក់ព័ន្ធ​នឹង​សកម្មភាព​មុនការ​បោះឆ្នោត ​អំឡុង និង​ក្រោយ​ការ​ប្រកាស​លទ្ធផល​បោះ​ឆ្នោត​ ​ចៅក្រម​លោក​ កូយ សៅ​ បាន​សម្រេច​បិទ​សវនាការ​ និង​ប្រកាស​បន្ត​សវនាការ​ទៅ​ថ្ងៃ​ទី​២៥ ​និង​២៦ ​ខែ​មីនា​ខាង​មុខ៕

ផែនទីលទ្ធផលការបោះឆ្នោតប្រធានាធិបតីអាមេរិកពីឆ្នាំ ១៩៩២-បច្ចុប្បន្ន

XS
SM
MD
LG