មន្រ្តីយោធាកំពូលម្នាក់របស់សហរដ្ឋអាមេរិក និយាយថា ការតាំងចិត្តថែរក្សាសន្តិភាពនិងសន្តិសុខនៅក្នុងតំបន់អាស៊ី និងមហាសមុទ្រប៉ាស៊ីហ្វិក នឹងមិនមានការផ្លាស់ប្តូរនៅក្រោមរដ្ឋបាលថ្មីរបស់សហរដ្ឋអាមេរិកទេ។
ឧត្តមនាវីឯក Harry Harris មេបញ្ជាការទីបញ្ជាតំបន់អាស៊ី និងមហាសមុទ្រប៉ាស៊ីហ្វិកបានព្យាយាមបញ្ជាក់ឡើងវិញប្រាប់សម្ព័ន្ធមិត្តរបស់សហរដ្ឋអាមេរិកថា តំបន់អាស៊ីនិងមហាសមុទ្រប៉ាស៊ីហ្វិកមានសារៈសំខាន់សម្រាប់ភាពរុងរឿង និងសន្តិសុខរបស់សហរដ្ឋអាមេរិក។ លោក Harrisបានមានប្រសាសន៍ថា «សហរដ្ឋអាមេរិកមិនដែលមានអគ្គមេបញ្ជាការណាដែលអង្គុយនៅស្ងៀមមិនធ្វើអ្វីនោះទេ»។ លោក Harrisចង្អុលបង្ហាញថា លោកប្រធានាធិបតីសហរដ្ឋអាមេរិក បារ៉ាក់ អូបាម៉ា នឹងនៅធ្វើការទាក់ទិននៅក្នុងតំបន់នោះរហូតទាល់តែអាណត្តិរបស់លោកចប់នៅពាក់កណ្តាលខែមករា។
ថ្លែងក្នុងអំឡុងពេលនៃសន្និសីទកំពូលប្រចាំឆ្នាំការពារប្រទេសក្នុងរដ្ឋធានីវ៉ាស៊ីនតោនកាលពីថ្ងៃអង្គារ លោក Harris បានមានប្រសាសន៍បន្ថែមទៀតថា ខណៈដែលលោកមិនអាចទស្សន៍ទាយពីកិច្ចផ្តួចផ្តើមគោលនយោបាយរបស់រដ្ឋបាលដូណាល់ ត្រាំនៅពេលខាងមុខក៏ដោយ លោកគ្មានការមន្ទិលសង្ស័យឡើយថា យើងនឹងបន្តការតាំងចិត្តចំពោះសម្ព័ន្ធមិត្តនិងដៃគូរបស់យើងនៅតំបន់អាស៊ីនិងមហាសមុទ្រប៉ាស៊ីហ្វិក។
លោក Harris បាននិយាយថា លោកនឹងបន្តបម្រើការងារជូនប្រធានាធិបតីអូបាម៉ារហូតដល់ថ្ងៃទី២០ ខែមករា ហើយបន្ទាប់មកនឹងធ្វើការជូនប្រធានាធិបតីត្រាំ។ លោក Harrisនិយាយបន្ថែមទៀតថា លោកព្រួយកង្វល់អំពីការគំរាមកំហែងខាងសន្តិសុខពីប្រទេសកូរ៉េខាងជើងនិងចិន ក៏ប៉ុន្តែ បានទទួលការលើកទឹកចិត្តពីសម្ព័ន្ធភាពដ៏រឹងមាំជាមួយប្រទេសជប៉ុន កូរ៉េខាងត្បូង អូស្រ្តាលីនិងប្រទេសហ្វីលីពីន។
លោកក៏មានប្រសាសន៍ដែរថា ទោះបីមានកំណត់សម្គាល់ខ្លះរបស់មេដឹកនាំនៃប្រទេសហ្វីលីពីន បានធ្វើឲ្យលោកមានការមិនសប្បាយចិត្តក៏ដោយ សម្ព័ន្ធភាពខាងយោធារវាងសហរដ្ឋអាមេរិក និងហ្វីលីពីននៅតែខ្លាំង ហើយទំនាក់ទំនងផ្ទាល់ខ្លួនរបស់លោកជាមួយមន្រ្តីយោធាជាន់ខ្ពស់ហ្វីលីពីនមានភាពជិតស្និទ្ធបំផុត៕