ក្រុមសហជីពកំពុងទាមទារអត្ថប្រយោជន៍បន្ថែមមួយចំនួនជូនកម្មកររោងចក្រកាត់ដេរ អំឡុងពេលនៃការចរចាឱ្យមានការកំណត់ប្រាក់ឈ្នួលអប្បបរមាថ្មីសម្រាប់ឆ្នាំ២០២៣។ នេះបើតាមរបាយការណ៍ចុងក្រោយមួយដែលបានដាក់ជូនទៅរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈដោយក្រុមប្រឹក្សាជាតិប្រាក់ឈ្នួលកាលពីថ្ងៃអង្គារ។
បើតាមរបាយការណ៍របស់ក្រុមប្រឹក្សាជាតិប្រាក់ឈ្នួល ចុះថ្ងៃទី១៣ ខែកញ្ញា ផ្ញើជូនរដ្ឋមន្ត្រីក្រសួងការងារលោក អ៊ិត សំហេង ភាគីសហជីពបានលើកសំណើដែលមាន៨ចំណុច ក្នុងនោះគឺការស្នើរោងចក្របង្កើនសោហ៊ុយធ្វើដំណើរ និងអាហារថ្ងៃត្រង់ ស្នើរដ្ឋាភិបាលបន្តអនុវត្តគោលនយោបាយបញ្ចុះតម្លៃទឹកភ្លើង និងតបណ្តាញដល់កន្លែងស្នាក់នៅ និងសុំឱ្យរដ្ឋាភិបាល និងរោងចក្រកែលម្អសុវត្ថិភាពមធ្យោបាយដឹកជញ្ជូនកម្មករ ឱ្យមានលក្ខណៈបច្ចេកទេសត្រឹមត្រូវ។ ភាគីសហជីពក៏សុំឱ្យក្រសួងការងារ និងបណ្តុះបណ្តាលវិជ្ជាជីវៈស៊ើបអង្កេត និងបញ្ឈប់ការប្រើប្រាស់កម្មករដេរស៊ីបុង ប្រចាំថ្ងៃលើសពីចំនួន៦០ថ្ងៃ។
លើសពីនេះ ភាគីសហជីពបានលើកឡើងតួលេខនៃប្រាក់ឈ្នួលបីផ្សេងគ្នា គឺចាប់ពី២០៦ដុល្លារ ២១០ដុល្លារនិង២១៣ដុល្លារសម្រាប់ការកំណត់ប្រាក់ឈ្នួលអប្បបរមាឆ្នាំ២០២៣។
ប្រធានសហជីពចលនាកម្មករកម្ពុជា លោក ប៉ាវ ស៊ីណា ប្រាប់វីអូអេនៅថ្ងៃពុធនេះថា ជំហររបស់សហជីពដែលទាមទារឱ្យកំណត់ប្រាក់ឈ្នួលលើសពី២០០ដុល្លារគឺនៅដដែល និងថា ការទាមទារនេះគឺសម្រាប់ប៉ះប៉ូវការខាតប្រយោជន៍ជាច្រើនរបស់កម្មករ ដូចជាការលុបថ្ងៃបុណ្យជាតិចំនួនជិត៧ថ្ងៃ ដែលកម្មករមិនបានសម្រាកតែត្រូវធ្វើការ ហើយបើមិនធ្វើការ ប្រាក់ឈ្នួលរបស់ពួកគេនឹងត្រូវបានកាត់ និងក៏មិនទទួលបានប្រាក់បន្ថែមដូចពេលមុនដែរ។
លោកថ្លែងថា៖ «សម្រាប់ខ្ញុំ ខ្ញុំមើលឃើញថា ការបាត់បង់ផលប្រយោជន៍ បូករួមទាំងការបង្កើននូវការចំណាយនៅក្នុងជីវភាពរស់នៅរបស់គាត់ យើងឃើញថា គាត់ពិតជាមានការលំបាក ដូច្នេះក្នុងនាមយើងជាភាគីតំណាងឱ្យកម្មករ យើងរក្សាជំហរដើមរបស់យើងគឺ២១៣[ដុល្លារ] បើទោះបីបានមិនបាន ក៏យើងនៅតែបង្ហាញពីការឈរជាមួយបងប្អូនកម្មករដែរ»។
បើតាមលោក ប៉ាវ ស៊ីណា ខាងភាគីនិយោជកនៅបន្តទាមទារកំណត់ប្រាក់ឈ្នួលថ្មីក្នុងរង្វង់១៩៧ដុល្លារ ខណៈរដ្ឋាភិបាលចង់បាន១៩៨ដុល្លារអាមេរិក។
ប្រធានគ្រប់គ្រងកម្មវិធីការងាររបស់មជ្ឈមណ្ឌលសម្ព័ន្ធភាពការងារ និងសិទ្ធិមនុស្សហៅកាត់ថា សង់ត្រាល់ លោក ឃុន ថារ៉ូ យល់ថា ខណៈកម្ពុជាកំពុងឆ្ពោះទៅការបោះឆ្នោតជាតិឆ្នាំ២០២៣នោះ រដ្ឋាភិបាលបច្ចុប្បន្នគួរតែពិចារណាដំឡើងប្រាក់ឈ្នួលក្នុងកម្រិតមួយដែលកម្មករអាចរស់សមរម្យបាន បើសិនរដ្ឋាភិបាលចង់បានសំឡេងគាំទ្រពីកម្មករ។
លោកប្រាប់វីអូអេថា៖ «ផ្អែកតាមតួលេខដែលមានការសម្រេច ជាតួលេខជំហរនៃភាគីនីមួយៗ ខ្ញុំគិតថា ចំណុចនេះ វាសំខាន់ណាស់ដែលរាជរដ្ឋាភិបាលត្រូវគិតពិចារណាឱ្យបានល្អិតល្អន់ ហើយវាក៏ជាឱកាសល្អដែលរាជរដ្ឋាភិបាលត្រូវការសំឡេងគាំទ្រពីកម្មករនិយោជិតជាងមួយលាននាក់ ក្នុងការបោះឆ្នោតតំណាងរាស្ត្រឆ្នាំ២០២៣នាពេលខាងមុខ»។
នៅក្នុងរបាយការណ៍នៃកិច្ចប្រជុំរបស់ក្រុមប្រឹក្សាជាតិប្រាក់ឈ្នួលអប្បបរមា ភាគីនិយោជកក្រៅពីការបង្ហាញការចង់បានរបស់ខ្លួននូវតួលេខ១៩៧ដុល្លារសម្រាប់ប្រាក់ឈ្នួលឆ្នាំ២០២៣ ភាគីនេះក៏បានលើកឡើងសំណើមួយចំនួនដើម្បីបន្ថយការចំណាយលើផលិតកម្ម និងការនាំចេញទំនិញ។
សំណើទាំងនោះ រួមមានដូចជាការស្នើឱ្យរដ្ឋាភិបាលកាត់បន្ថយថ្លៃភស្តុភារ ជាពិសេសកម្រៃសេវាបញ្ចេញទំនិញ កម្រៃសេវាកំពង់ផែ និងកម្រៃអតុល្យភាពកុងតឺន័ររបស់ក្រុមហ៊ុនកប៉ាល់ កាត់បន្ថយថ្លៃអគ្គិសនី និងផ្តល់គោលនយោបាយអំណោយផលសម្រាប់ការដំឡើងថាមពលពន្លឺព្រះអាទិត្យ និងជំរុញការអនុវត្តយុទ្ធសាស្ត្រអភិវឌ្ឍវិស័យកាត់ដេរសម្លៀកបំពាក់ ស្បែកជើង និងផលិតផលធ្វើដំណើរ២០២២-២០២៧។
វីអូអេមិនទាន់អាចសុំការអត្ថាធិប្បាយពីអគ្គលេខាធិការសមាគមរោងចក្រកាត់ដេរនៅកម្ពុជា ឬ GMAC លោក ខេន លូ បានទេ ដោយសារលោកជាប់ប្រជុំ។
វីអូអេមិនអាចទាក់ទងសុំការអត្ថាធិប្បាយពី លោក ហេង សួរ រដ្ឋលេខាធិការ និងជាអ្នកនាំពាក្យក្រសួងការងារតាមរយៈប្រព័ន្ធទំនាក់ទំនង WhatsApp បានទេនៅថ្ងៃពុធនេះ។
ខណៈការចរចាប្រាក់ឈ្នួលសម្រាប់កម្មករក្នុងឧស្សាហកម្មកាត់ដេរបានធ្វើឡើងចំនួន៤លើកមកនោះ គណបក្សភ្លើងទៀនបានឱ្យដឹងពីជំហររបស់ខ្លួនសម្រាប់ការទាមទារឱ្យមានការដំឡើងប្រាក់ឈ្នួលអប្បបរមាគោលសម្រាប់កម្មករចំនួន២១៥ដុល្លារក្នុងមួយខែសម្រាប់ឆ្នាំ២០២៣។ នេះបើតាមសេចក្តីថ្លែងការណ៍របស់គណបក្សចុះថ្ងៃទី១៣ ខែកញ្ញា ឆ្នាំ២០២២។
គណបក្សជំទាស់នេះយល់ថា ប្រាក់ឈ្នួលដែលមានចំនួន២១៥ដុល្លារនេះអាចជួយដល់កម្មករបានមួយចំណែក បើទោះបីការដំឡើងកម្រិតនេះមិនទាន់សមល្មមចំពោះការប្រឈមនឹងជីវភាពរស់នៅរបស់កម្មករក្នុងស្ថានភាពដែលរួមមានម្ហូបអាហារ តម្លៃទំនិញ មធ្យោបាយធ្វើដំណើរ កន្លែងស្នាក់នៅមានតម្លៃខ្ពស់ជាងប្រទេសជិតខាងនោះ។
គណបក្សភ្លើងទៀនបញ្ជាក់ក្នុងសេចក្តីថ្លែងការណ៍ថា៖ «គណបក្សភ្លើងទៀនស្នើសុំរាជរដ្ឋាភិបាល ខិតខំរកមធ្យោបាយសម្រួលជាមួយម្ចាស់រោងចក្រ សហគ្រាស ដោយកាត់បន្ថយការចំណាយក្រៅការងារ និងសម្រួលដល់ការនាំចូលវត្ថុធាតុដើម ឬជំរុញដល់ការផលិតវត្ថុធាតុដើមក្នុងស្រុក ដើម្បីអាចផ្តល់លទ្ធភាពដល់ការដំឡើងប្រាក់ខែគោលអប្បបរមា លើសពី៣០០ដុល្លារចាប់ពីឆ្នាំ២០២៤តទៅ»។
កាលពីឆ្នាំ២០២១ កម្មកររោងចក្រកាត់ដេរទទួលបានការដំឡើងប្រាក់ឈ្នួលបន្ថែមសម្រាប់ឆ្នាំ២០២២ចំនួន២ដុល្លារ ធ្វើឱ្យប្រាក់ឈ្នួលអប្បបរមាសម្រាប់កម្មករក្នុងឧស្សាហកម្មកាត់ដេរកើនដល់១៩៤ដុល្លារអាមេរិក។
គួរបញ្ជាក់ផងដែរថា វិស័យកាត់ដេរសម្លៀកបំពាក់ និងស្បែកជើងគឺជាក្បាលម៉ាស៊ីននៃការនាំចេញទំនិញធំបំផុតលំដាប់ទីមួយរបស់កម្ពុជា។ វិស័យនេះបានស្រូបយកកម្លាំងពលកម្មប្រមាណជាង៨០ម៉ឺននាក់ដែលភាគច្រើនគឺជាប្រជាពលរដ្ឋមកពីបណ្តាខេត្ត និងជនបទ។
ឧស្សាហកម្មកាត់ដេររបស់ប្រទេសកម្ពុជាបានរងផលប៉ះពាល់ដោយសារការរាតត្បាតនៃជំងឺកូវីដ១៩មួយផ្នែក និងមួយផ្នែកទៀតដោយសារការបាត់បង់២០%នៃប្រព័ន្ធអនុគ្រោះពន្ធ EBA របស់សហភាពអឺរ៉ុប កាលពីខែសីហា ឆ្នាំ២០២០ ក្រោយការរកឃើញការរំលោភសិទ្ធិមនុស្សធ្ងន់ធ្ងរក្នុងប្រទេស។
គេមិនទាន់ដឹងនៅឡើយទេថា តើសហភាពអឺរ៉ុបនឹងបន្តកាត់បន្ថយប្រព័ន្ធអនុគ្រោះពន្ធ EBA នេះទៀតឬយ៉ាងណាទេ នៅពេលខាងមុខ៕
