ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

រោងចក្រ​ ​Southland​ ​ទទួល​យក​កម្មករ​ ១១​នាក់​ឲ្យ​ចូល​ធ្វើការ​វិញ


រូបឯកសារ៖ ក្រុម​កម្មករ​ជាច្រើន​រយនាក់នៃ​រោង​ចក្រ​​ Southland ​មកប្រមូលផ្តុំគ្នា​នៅមុខក្រសួងការងារ​កាលពី​ថ្ងៃ​ទី​ ៨​ ខែ មិថុនា ឆ្នាំ​ ២០១៧​ ​ទាម​ទារ​ឲ្យថៅកែ​រោងចក្រ Southland ទទួលយកក្រុម​សហជីព​ដែលត្រូវបាន​ព្យួរពីការងារ​។ (ហ៊ុល រស្មី/VOA)
រូបឯកសារ៖ ក្រុម​កម្មករ​ជាច្រើន​រយនាក់នៃ​រោង​ចក្រ​​ Southland ​មកប្រមូលផ្តុំគ្នា​នៅមុខក្រសួងការងារ​កាលពី​ថ្ងៃ​ទី​ ៨​ ខែ មិថុនា ឆ្នាំ​ ២០១៧​ ​ទាម​ទារ​ឲ្យថៅកែ​រោងចក្រ Southland ទទួលយកក្រុម​សហជីព​ដែលត្រូវបាន​ព្យួរពីការងារ​។ (ហ៊ុល រស្មី/VOA)

ថៅកែ​រោងចក្រ​ Southland ​បាន​យល់ព្រម​ទទួល​យក​ក្រុម​សហជីព​ និង​កម្មករ​ចំនួន​១១​នាក់​ឲ្យ​ចូល​ធ្វើការ​វិញហើយ ​កាល​ពី​ព្រឹក​ថ្ងៃ​សៅរ៍​កន្លង​ទៅ ក្រោយ​ពី​ការ​តវ៉ា​ ​របស់ក្រុម​សហជីព​ និង​កម្មករ​ចំពោះ​ការព្យួរ​ពី​ការងារ​ពាក់​ព័ន្ធ​នឹង​ការ​ទាមទារ​សិទ្ធិ​បោះឆ្នោត​ ក្នុង​ពេល​បោះឆ្នោត​ ​ឃុំ-សង្កាត់។​ នេះ​បើ​យោង​តាម​ការ​បញ្ជាក់​ពីតំណាង​ ​និង​មេដឹកនាំ​សម្ព័ន្ធ​សហជីព​ចលនា​កម្មករ​ (CUMW)នៅ​ថ្ងៃ​ចន្ទ​នេះ។​

លោក​ ឡាញ់ ភិរម្យ​ ​បេក្ខជន​ម្នាក់​នៃ​សម្ព័ន្ធ​សហជីព​ចលនា​កម្មករ​ប្រចាំ​រោង​ចក្រ​ Southland​ ​និយាយ​ថា​ ​បន្ទាប់​ពី​មាន​ការ​សម្របសម្រួល​ពី​មន្ត្រី​នៃ​ក្រសួង​ការ​ងារ​នា​ល្ងាច​ថ្ងៃសុក្រ​សប្តាហ៍​មុន​ ក្រុមកម្មករ​១១នាក់​ បាន​ចូល​ទៅ​ធ្វើការ​វិញ​ ​នៅ​ព្រឹក​ថ្ងៃ​សៅរ៍​ ដោយ​រោង​ចក្រ​បាន​កាត់​ប្រាក់ឈ្នួលប្រចាំ​ថ្ងៃ​របស់​កម្មករ​ ដែល​ធ្វើ​កូដកម្ម​ ហើយ​បាន​តម្រូវ​ឲ្យ​តំណាង​សហជីព​ធ្វើ​កំណត់​ហេតុ​ថា​ មិន​ធ្វើ​កូដកម្ម​ដោយ​គ្មាន​ច្បាប់​ទម្លាប់។​ ចំណែក​រោង​ចក្រ​ក៏​សន្យា​ថា​ នឹង​ឈប់​ចង​គំនុំ​ជា​មួយ​កម្មករ​ដែល​រួមគ្នា​ធ្វើ​កូដ​កម្ម​ផង​ដែរ។​

«ខាង​ក្រុមហ៊ុន ក៏​ចុះ​ជា​លាយ​លក្ខណ៍​អក្សរ​ដែរ​ថា​ ចាប់​ពីថ្ងៃ​សៅរ៍​ហ្នឹង​ទៅ​ រហូត​គឺ​ លែង​គុំគួន លែង​រើស​អើង​សហជីព​អីចឹង​បង។ យើង​ធ្វើការ​ដោយ​តាម​កន្លែង​រៀង​ៗ​ខ្លួន​ទៅ​។ យើង​មិនបាន​រើស​អើង​ រើស​អី​ខឹង​ ប៉ុនប៉ង​គ្នា​ គុំ​គ្នា​អីចឹង​ថ្ងៃមុខ​ គឺ​អត់​មាន»។​

ការ​ព្យួរ​ការងារ​របស់​អ្នក​ទាំង​១១នាក់​នេះ​ កើត​មាន​ឡើង​ នៅ​ក្រោយ​ការ​បោះឆ្នោត​ជ្រើសរើស​ក្រុម​ប្រឹក្សា​ឃុំ​-សង្កាត់​ បន្ទាប់​ពី​ក្រុម​កម្មករ​ជិត​ ២០០០នាក់​ បាន​ក្រោក​តវ៉ាប្រឆាំង​នឹង​ថៅកែ​រោងចក្រ​ Southland​ ក្នុង​សង្កាត់​ចោម​ចៅ​ ​ដើម្បី​បាន​ទៅ​បោះឆ្នោតឃុំ​-សង្កាត់​ ​កាលពី​ថ្ងៃ​ទី៤​ ខែមិថុនា​ កន្លង​ទៅ។​

ពាក់ព័ន្ធ​នឹងការ​បញ្ឈប់​ក្រុមកម្មករ​ទាំង១១​នាក់​នេះ​ សមាគម​រោងចក្រ​កាត់​ដេរ​នៅ​កម្ពុជា​ហៅ​កាត់​ថា​ ​(GMAC)​ ​បានចោទ​សម្ព័ន្ធ​សហជីព​ចលនា​កម្មករ​ ថា​ បាន​ប្រព្រឹត្ត​កំហុស​ធ្ងន់​តាម​រយៈ​សកម្មភាព​ដើរ​បិទ​ភ្លើង​ ញុះញង់​កម្មករ​មិន​ឲ្យ​ធ្វើការ​ ​ហើយ​ថា​ សកម្មភាព​នោះ​បាន​បំពានច្បាប់ ដោយ​សម្ព័ន្ធ​សហជីព​ចលនា​កម្មករ​ពុំ​ទាន់​មាន​បញ្ជី​ការ​នៅ​ឡើយ។​

យ៉ាងណាក៏ដោយ​ ​លោក​ ប៉ាវ​ ស៊ីណា​ ប្រធាន​សម្ព័ន្ធ​សហជីព​ចលនា​កម្មករ​បាន​បញ្ជាក់​ប្រាប់​ VOA ​នៅថ្ងៃ​ច័ន្ទនេះ​ថា​ រដ្ឋមន្ត្រី​ក្រសួង​ការ​ងារ​លោក​ អ៊ិត​ សំហេង​ បាន​បញ្ជា​ឲ្យ​មន្ត្រី​ ចាត់​វិធានការ​ភ្លាម​ៗ​ដើម្បី​បញ្ចប់​វិវាទ​កាលពី​ចុង​សប្តាហ៍​មុន​ ដោយ​មាន​លោក​ ខៀវ សាវុធ​ មន្រ្តី​នៃ​នាយកដ្ឋាន​វិវាទ​ ការ​ងារ​ជា​អ្នក​សម្របសម្រួល។​ ​តែទោះ​ជា​យ៉ាង​ណា​ លោក​នៅ​មាន​ក្តី​បារម្ភ​អំពី​ការ​រើស​អើង​សហជីព​នៅ​រោងចក្រ​ Southland។ លោក​ថា​ គម្រោង​ចុះ​បញ្ជី​ការ​សម្ព័ន្ធ​សហជីព​ចលនា​កម្មករ​នៅ​រោង​ចក្រ​ Southland ​នឹង​បន្ត​ដដែល។ ​

លោក​ ប៉ាវ​ ស៊ីណា​ បន្ថែម​ថា៖​

​«យើង​មិនមាន​អ្វី​ប្រែប្រួល​ទេ​ គឺ​យើង​ដំណើរ​ការ​ចុះបញ្ជី​ធម្មតា​ ហើយ​យើង​នៅតែ​បន្ត​ការ​តាមដាន​រាល់​សកម្មភាព​រោង​ចក្រ​នេះ​ ថា​តើ​គាត់​នៅតែ​បន្ត​ការ​រើស​អើង​ ការ​គុំ​គួន​ របៀប​ណា​ទៀត​នោះ​ យើង​នឹង​ប្តឹង​ទៅ​ក្រសួង​ការ​ងារ​ ហើយ​យើង​នឹង​ផ្ញើ​ព័ត៌មាន​ទាំងអស់​នេះ​ ទៅកាន់​ភាគី​ពាក់​ព័ន្ធ​មាន​ដូច​ជា​ ILO (អង្គការ​ពលកម្ម​អន្តរជាតិ) ​BFC ​(រោងចក្រ​ល្អ​ប្រសើរ​នៅកម្ពុជា) ​ក៏ដូចជា អ្នកបញ្ជា​ទិញ​ផ្សេង​ៗ​ ឲ្យ​គេ​បាន​ជ្រាប»។​

រូបឯកសារ៖ លោក​ ប៉ាវ​ ស៊ីណា​ ប្រធាន​សហជីព​ចលនា​កម្មករ​កម្ពុជា​ ថ្លែង​មក​កាន់​ក្រុមអ្នកសារព័ត៌មាន នៅឯសន្និសីទ​ទំនាក់​ទំនង​វិជ្ជាជីវៈ​នៅ​កម្ពុជា ក្នុង​រាជធានី​ភ្នំពេញ​ កាលពី​ថ្ងៃទី​ ២៧​ ខែ​កុម្ភៈ ​ឆ្នាំ​២០១៧។ (ហ៊ាន សុជាតា​/ VOA)
រូបឯកសារ៖ លោក​ ប៉ាវ​ ស៊ីណា​ ប្រធាន​សហជីព​ចលនា​កម្មករ​កម្ពុជា​ ថ្លែង​មក​កាន់​ក្រុមអ្នកសារព័ត៌មាន នៅឯសន្និសីទ​ទំនាក់​ទំនង​វិជ្ជាជីវៈ​នៅ​កម្ពុជា ក្នុង​រាជធានី​ភ្នំពេញ​ កាលពី​ថ្ងៃទី​ ២៧​ ខែ​កុម្ភៈ ​ឆ្នាំ​២០១៧។ (ហ៊ាន សុជាតា​/ VOA)

លោក​ ប៉ាវ​ ស៊ីណា​ ​បាន​ចោទ​ថា​សហជីព​ ​មួយ​ផ្សេង​ទៀត​ គឺ​សហភាព​សហព័ន្ធ​សហជីព​ជាតិ​កម្ពុជា​ នៅ​ក្នុង​រោងចក្រ​ Southland​ បាន​រារាំង​មិន​ឲ្យ​ មាន​សាខាសម្ព័ន្ធ​សហជីព​ចលនា​កម្មករ​នៅ​ក្នុង​រោង​ចក្រ​នោះ។​

VOA​ ​មិន​ទាន់​អាច​ទាក់​ទង​ លោក​ ជួន​ មុំថុល​ ប្រធាន​សហភាព​សហព័ន្ធ​សហជីព​ជាតិ​កម្ពុជា​បាន​ទេ​នា​សៀល​ថ្ងៃ​ចន្ទ​នេះ។ ​

VOA ​ព្យាយាម​សុំ​សេចក្តី​អធិប្បាយ​ពី​លោក​ ខៀវ​ សាវុធ​ មន្ត្រី​នាយកដ្ឋាន​វិវាទ​ការងារ​នៃ​ក្រសួង​ការ​ងារ ​តែ​លោកបដិសេធ​មិន​ផ្តល់​សេចក្តី​អធិប្បាយ។​ ​លោក​បាន​បង្វែរ​សំណួរ​ទៅ​លោក​ ហេង សួរ​អ្នកនាំពាក្យ​ក្រសួង​ការ​ងារ​ ដែល​នៅតែ​មិន​អាច​ទាក់​ទង​ នា​រសៀល​ថ្ងៃ​ចន្ទ​នេះ។ ​

រោង​ចក្រ​ Southland​ ​នេះ​ ទទួល​ការ​បញ្ជា​ទិញ​ពី​ក្រុមហ៊ុន​លក់​សម្លៀក​បំពាក់​យីហោ​អន្តរជាតិ​ធំៗ​ រួម​មាន​ Polo Next Co​ ​និង​ American Eagle៕

XS
SM
MD
LG