កម្មករជាច្រើនរយនាក់មកពីរោងចក្រកាត់ដេររបស់ក្រុមហ៊ុន Southland company បានប្រមូលផ្តុំគ្នានៅមុខក្រសួងការងារ ធ្វើកូដកម្មទាមទារ មិនឱ្យមានការបញ្ឈប់ការងាររបស់សមាជិកសហជីព និងកាត់ប្រាក់ឈ្នួល ពេលពួកគេទៅបោះឆ្នោតឃុំ-សង្កាត់។
តាមការបញ្ជាក់ពីក្រុមកម្មករដែលចូលរួមកូដកម្មនាថ្ងៃព្រហស្បតិ៍នេះ ឲ្យដឹងថា កូដកម្មនេះ បានផ្តើមឡើង តាំងពីថ្ងៃសុក្រកន្លងទៅ គឺ ពីរថ្ងៃមុនការបោះឆ្នោតជ្រើសរើសក្រុមប្រឹក្សាឃុំ-សង្កាត់ ក្រោយពីក្រុមហ៊ុន Southland ដែលស្ថិតក្នុងសង្កាត់ចោមចៅ ច្រានចោលសំណើរបស់កម្មករ ទាមទារឈប់សម្រាកពីរថ្ងៃ ដោយមានប្រាក់ឈ្នួល និងដោយមិនបាច់ប្រើថ្ងៃឈប់សម្រាកប្រចាំថ្ងៃរបស់ពួកគេ ដើម្បីអនុញ្ញាតឲ្យពួកបានទៅបោះឆ្នោត។
ក្រុមកម្មករឲ្យដឹងផងដែរថា ក្រោយពីរោងចក្រច្រានចោលសំណើនេះ កម្មករបានសុខចិត្តឲ្យក្រុមហ៊ុនកាត់ថ្ងៃឈប់សម្រាកប្រចាំឆ្នាំមួយថ្ងៃ និងកាត់ ៥០ភាគរយនៃប្រាក់ឈ្នួលក្នុងមួយថ្ងៃ។ ក៏ប៉ុន្តែនៅពេលកម្មករ វិលត្រឡប់ទៅធ្វើការវិញនៅព្រឹកថ្ងៃពុធ ក្រោយការបោះឆ្នោត បែរជាមានសេចក្តីជូនដំណឹងពីតុលាការក្រុងភ្នំពេញ ហាមឃាត់ តំណាងសហជីពចំនួន១០នាក់ ដែល ជាសមាជិករបស់សម្ព័ន្ធសហជីពចលនាកម្មករ (CUMW) មិនឲ្យចូលធ្វើការ។ ហើយថ្មីៗនេះ មានកម្មករម្នាក់ផ្សេងទៀតក៏ត្រូវបានហាមឃាត់មិនឲ្យចូលធ្វើការផងដែរ ទាក់ទិនការតវ៉ាសុំសម្រាកការងារដើម្បីបានទៅបោះឆ្នោត។
កញ្ញា ធូ ចិន្តា វ័យ ២៥ ឆ្នាំ កម្មការិនីម្នាក់ ដែលចូលរួមកូដកម្មនៅព្រឹកថ្ងៃព្រហស្បតិ៍នេះ ប្រាប់ VOA ថា៖
«អ្នកខាងក្នុងរោងចក្រហ្នឹង គេចោទថា ពួកបង ប្រមាណ ១១នាក់ហ្នឹងណ៎ា អ្នកអុជអាលឲ្យពួកកម្មករបះបោរចឹងណ៎ាបង។ ហ្នឹងហើយ ទៅបោះឆ្នោត អាថ្ងៃយើងឈប់ទៅបោះឆ្នោតពីរថ្ងៃ។ ព្រោះអីថ្ងៃសុក្រហ្នឹង ខ្ញុំធ្វើការបានមួយព្រឹកទេ ដល់ពេលម៉ោង ១២ កន្លះហ្នឹង ពួកខ្ញុំកម្មករហ្នឹងនាំគ្នាបិទភ្លើងតវ៉ា សុំគេស៊ី ៥០ភាគរយមួយថ្ងៃ ហើយនិងសុំគេឲ្យគេកាត់បំណាច់ឆ្នាំមួយថ្ងៃចឹងបង ដល់ពេលរួចហើយខាងសហជីពក្នុងរោងចក្រ គេអត់ដោះស្រាយឲ្យទេ»។
កម្មការិនីកាត់ដេរវ័យ២៥ឆ្នាំរូបនេះ បានបន្ថែមថា ក្រុមសហជីព និងកម្មករដែលត្រូវបានគេហាមឃាត់មិនឲ្យចូលធ្វើការវិញនេះ ជាអ្នកបម្រើប្រយោជន៍ ដល់កម្មករ ដែលផ្ទុយពីក្រុមសហជីពម្ខាងទៀតដែលរណបខ្លបខ្លាចថៅកែរោងចក្រ។
«១១នាក់ហ្នឹង គាត់ចាំជួយកម្មករចឹង ចិនធ្វើបាបកម្មករចឹង គាត់ជួយ ដល់ពេលខាងសហជីពក្នុងរោងចក្រហ្នឹង គេអត់ចង់ឲ្យមានអ្នកជួយចឹង ព្រោះអីក្នុងរោងចក្រហ្នឹង សហជីពហ្នឹងកាន់ជើងចិន អត់ជួយកម្មករទេ»។
ក្រុមកម្មករបានប្រមូលផ្តុំគ្នាយ៉ាងកកកុញ នៅមុខច្រកចូលក្រសួងការងារ នាព្រឹកថ្ងៃព្រហស្បតិ៍តាំងពីព្រឹកព្រលឹម មុនពេលពួកគេរំសាយទៅវិញនៅម៉ោង ប្រមាណជាង ១១ថ្ងៃត្រង់ ក្រោយពេលមន្ត្រីនៃក្រសួងការងារបានចេញមកទទួលញត្តិអន្តរាគមន៍របស់សម្ព័ន្ធសហជីពចលនាកម្មករ។ ញត្តិដែលដាក់ជូនក្រសួងការងារបានស្នើឲ្យថៅកែរោងចក្រ ទទួលកម្មករទាំងឡាយ ដែលត្រូវបានព្យួរការងារ និងឈប់រើសអើងសកម្មភាពសហជីព។
លោកអ៊ូ រតនា មន្ត្រីនៃគណៈកម្មការដោះស្រាយកូដកម្ម និងបាតុកម្មគ្រប់មុខសញ្ញានៃក្រសួងការងារ បានប្រាប់ លោក ប៉ាវ ស៊ីណាប្រធានសម្ព័ន្ធសហជីពចលនាកម្មករ (CUMW) ថា ការចរចាជាមួយ ថៅកែរោងចក្រ Southland នឹងត្រូវធ្វើឡើងនៅព្រឹកថ្ងៃសុក្រស្អែកនេះ។
«ជូនព័ត៌មានអូនថា ស្អែកម៉ោង ៩ យើងចុះទៅដល់រោងចក្រ ហើយសំណូមពរ ឲ្យរំសាយរឿងនេះ okay»។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ ថ្លែងប្រាប់ VOA នៅមុខក្រសួងការងារនាព្រឹកថ្ងៃព្រហស្បតិ៍ដដែលនេះថា កម្មករនឹងមិនត្រឡប់ទៅធ្វើការវិញនោះទេ ប្រសិនបើថៅកែរោងចក្រមិនទទួលយកក្រុមកម្មករដែលត្រូវបានព្យួរការងារ។ លោកថា ក្រុមសហជីពទាំង១០នាក់នោះ ជាបេក្ខជននៃសម្ព័ន្ធសហជីពចលនាកម្មករ ដែលបានព្យាយាមបង្កើតសហជីពមួយដាច់ដោយឡែកនៅក្នុងរោងចក្រនេះ តាំងពីឆ្នាំ ២០១៥ ដោយបានដាក់ពាក្យសុំចុះបញ្ជី តែរោងចក្របានច្រានចោល។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ៖
«ដូច្នេះ ខ្ញុំយល់ថា ការណ៍ដែលបញ្ឈប់នេះ គឺជាការប្រមាថ និងការជាន់ឈ្លី ទៅលើប្រព័ន្ធច្បាប់ទាំងស្រុង។ ដូច្នេះ ខ្ញុំគិតថា និយោជកគប្បី ត្រូវតែទទួលពួកគេចូល ហើយក្រសួងជំនាញត្រូវតែដាក់សម្ពាធឲ្យនិយោជកហ្នឹង យកពួកគាត់ឲ្យទៅចូលធ្វើការវិញ ហើយងាកមករកការគោរពច្បាប់ ងាកមករកការអនុវត្ត ទៅតាមអ្វី ដែលជាបទដ្ឋានស្តង់ដា ការងារបាទ»។
លោក ប៉ាវ ស៊ីណា ឲ្យដឹងបន្ថែមថា រោងចក្រ Southland នេះ ទទួលការបញ្ជាទិញពីក្រុមហ៊ុនលក់សម្លៀកបំពាក់យីហោអន្តរជាតិធំៗ រួមមាន Polo Next Co និង American Eagle។
VOA មិនអាចទំនាក់ទំនងសុំក្តីអធិប្បាយពីតំណាងរោងចក្របានទេនាថ្ងៃព្រហស្បតិ៍នេះ។
របាយការណ៍របស់កាសែត The Cambodia Daily ដែលបានចេញផ្សាយនៅថ្ងៃព្រហស្បតិ៍នេះ បានដកស្រង់សេចក្តីជូនដំណឹងរបស់ចៅក្រម ហេង សុខណា នៃសាលាដំបូងរាជធានីភ្នំពេញក្នុងន័យដើមថា ជំរុញឲ្យ «កម្មករទាំងអស់នៃរោងចក្រកាត់ដេរ Southland ចូលធ្វើការងារវិញដូចធម្មតាក្នុងរយៈពេល៤៨ម៉ោង លើកលែងតែកម្មករ ១០នាក់ដែលត្រូវបានហាមមិនឲ្យចូលធ្វើការវិញឡើយ»។
លោកចៅក្រម ហេង សុខណា បញ្ជាក់ថា សេចក្តីជូនដំណឹងរបស់លោក ជាការឆ្លើយតបទៅនឹងពាក្យបណ្តឹងរបស់មេធាវីតំណាងរោងចក្រ។ លោកបញ្ជាក់បន្ថែមថា កម្មករបានចាប់ផ្តើមធ្វើកូដកម្មដោយមិនបានជូនដំណឹង ឬដាក់ជូនឯកសារណាមួយអំពីការធ្វើកូដកម្មនេះជាមុនឡើយ ដូចដែលមានចែងនៅក្នុងមាត្រា ៣២៤ នៃច្បាប់ការងារ។
VOA ព្យាយាមសុំសេចក្តីអធិប្បាយពីលោកចៅក្រម ហេង សុខណា តែមិនទាន់អាចទាក់ទងបាននៅថ្ងៃព្រហស្បតិ៍នេះ។
ក្រុមអ្នកសង្កេតការណ៍បោះឆ្នោតនៅកម្ពុជា ក៏បានស្តីបន្ទោសក្រសួងការងារ ថាខកខានមិនបានសម្រួលឲ្យកម្មករបានឈប់សម្រាកដើម្បីចូលរួមការបោះឆ្នោតដូចអាណត្តិមុន៕
