ប្រទេសជិតខាងរបស់ប្រទេសស៊ីរីកំពុងទទួលរងផលប៉ះពាល់ពីវិបត្តិជនភៀសខ្លួនស៊ីរី។ ពួកគេកំពុងទទួលបន្ទុកជនភៀសខ្លួនចំនួន ៤,៨ លាននាក់។ ទីភ្នាក់ងារជនភៀសខ្លួននៃអង្គការសហប្រជាជាតិនិយាយថា ប្រទេសដទៃទៀតត្រូវតែជួយទទួលបន្ទុកនេះ។
លោក Filippo Grandi មន្រ្តីនៃអង្គការសហប្រជាជាតិទទួលបន្ទុកផ្នែកជនភៀសខ្លួន (U.N. High Commissioner for Refugees) និយាយថា ទីភ្នាក់ងាររបស់លោកបានគ្រោងនឹងតាំងទីលំនៅថ្មីចំនួនមួយភាគដប់នៃជនភៀសខ្លួន ឬប្រមាណ ៤៨០.០០០នាក់ ក្នុងរយៈពេលបីឆ្នាំខាងមុខនេះ។ លោកទទួលស្គាល់ថា វាមិនមែនជាការងារងាយស្រួលទេ ជាពិសេសនៅពេលដែលបណ្តាប្រទេសនៅទ្វីបអឺរ៉ុបនិងកន្លែងដទៃទៀតមានការប្រឆាំងនឹងការទទួលយកជនភៀសខ្លួនដែលគេចខ្លួនពីជម្លោះនិងការធ្វើទុក្ខបុកម្នេញ។
លោកនិយាយថា មានជនជាតិស៊ីរីជាច្រើនដែលកំពុងផ្សងនឹងគ្រោះថ្នាក់ក្នុងការធ្វើដំណើរឆ្លងកាត់សមុទ្រមេឌីទែរ៉ានេ ((Mediterranee) ដើម្បីស្វែងរកការតាំងទីលំនៅថ្មីនៅទី្វបអឺរ៉ុប។ លោកបញ្ជាក់ថាកិច្ចព្រមព្រៀងរវាងសហភាពអឺរ៉ុបនិងប្រទេសតួកគី គឺមិនទំនងនឹងអាចដោះស្រាយវិបត្តិជនភៀសខ្លួនស៊ីរីទេ។
«ចំណុចដែលយើងស្នើទៅកាន់ប្រទេសតួកគី សហភាពអឺរ៉ុប និងទៅកាន់សហគមន៍អន្តរជាតិគឺ ការផ្តល់មធ្យោបាយស្របច្បាប់ជាដំណោះស្រាយដ៏មានឥទ្ធិពលមួយ ជាជម្រើសជំនួសការធ្វើដំណើរគ្រោះថ្នាក់ ជាពិសេសសម្រាប់ជនងាយរងគ្រោះ។ ដូចនេះ ប្រសិនបើបានអនុម័តកាន់តែឆាប់ មនុស្សកាន់តែច្រើននឹងមិនជ្រើសរើសការធ្វើដំណើរតាមទូក និងមធ្យោបាយផ្សេងទៀតទេ»។
ក្រៅពីការតាំងទីលំនៅថ្មី អង្គការ UNHCR បានផ្តល់មធ្យោបាយស្របច្បាប់ដល់ប្រទេសមួយចំនួនដើម្បីពិចារណា។ មធ្យោបាយទាំងនោះមានដូចជា អាហារូបករណ៍សម្រាប់ការសិក្សា ទិដ្ឋាការមនុស្សធម៌ កម្មវិធីជួបជុំសាច់ញ្ញាតិគ្រួសារដែលងាយស្រួលនិងឆាប់រហ័ស ព្រមទាំងការព្យាបាលផ្នែកវេជ្ជសាស្រ្ត។
អគ្គលេខាធិការអង្គការសហប្រជាជាតិ លោក Ban Ki-moon បានជួយបញ្ចេញសំឡេងឲ្យការអំពាវនាវរបស់អង្គការ UNHCR ដល់ប្រទេសនានាផ្តល់ការតាំងទីលំនៅថ្មីឲ្យជនភៀសខ្លួនស៊ីរី។ លោកនិយាយថា ប្រទេសជាតិទាំងនោះនឹងទទួលបានផលប្រយោជន៍ជាច្រើនពីជនភៀសខ្លួន ដែលពួកគេពាំនាំជំនាញថ្មីៗ និងផ្តល់ផលវិជ្ជមានដល់ផ្នែកសេដ្ឋកិច្ចទៅកាន់សង្គមពួកគេ។
«ការបង្អាប់បង្ខូចជនភៀសខ្លួនពីជម្លោះនិងបញ្ហាក្នុងស្រុក មិនត្រឹមតែបន្ទាបកិត្តិយស វាយប្រហារ និងរារាំងផលិតភាពទេ ជាក់ស្តែងគឺពួកគេខុសតែម្តង។ ហើយវិធានការគ្រប់គ្រងទៅលើការហូរចូលនូវជនភៀសខ្លួនត្រូវតែប្រព្រឹត្តទៅស្របនឹងសិទ្ធិមនុស្ស និងសេចក្តីថ្លៃថ្នូររបស់មនុស្សគ្រប់រូប»។
វិបត្តិជនភៀសខ្លួនស៊ីរីគឺជា បញ្ហាធំបំផុត ក្រោយពីសង្គ្រាមលោកលើកទី២។អង្គការ UNHCR រាយការណ៍ថា ប្រទេសនានាបានផ្តល់កន្លែងលើសពី១៧៩.០០០សម្រាប់ជនភៀសខ្លួនស៊ីរីតាំងពីឆ្នាំ២០១៣។ របាយការណ៍នោះបានបន្តថា ពួកគេសង្ឃឹមថានឹងមានការផ្តល់ជំនួយផ្សេងៗទៀតនៅសន្និសីទ ហើយនេះជាវិបត្តិអន្តរជាតិដែលត្រូវការការឆ្លើយតបជាលក្ខណៈសាកល៕
ប្រែសម្រួលដោយ វិញ សុជាតា
