ដំណើរទស្សនកិច្ចដោយពួកមន្ត្រីអង្គការសហប្រជាជាតិទៅកាន់រដ្ឋ Rakhine ដែលមានបញ្ហានៅប្រទេសមីយ៉ាន់ម៉ាកាលពីថ្ងៃព្រហស្បតិ៍បានត្រូវពន្យារពេល បណ្តាលមកពីអាកាសធាតុមិនល្អ។
អង្គការសហប្រជាជាតិបានប្រាប់ឲ្យដឹងកាលពីថ្ងៃពុធថា តំណាងរបស់ខ្លួននឹងត្រូវអមដំណើរដោយមន្ត្រីរដ្ឋាភិបាលមីយ៉ាន់ម៉ានៅក្នុងដំណើរទស្សនកិច្ចទៅកាន់រដ្ឋ Rakhine នោះ។ អ្នកនាំពាក្យអង្គការសហប្រជាជាតិបាននិយាយថា ដំណើរទស្សនកិច្ចនោះត្រូវបានលើកទៅសប្តាហ៍ក្រោយ។
ដំណើរទស្សនកិច្ចនោះនឹងបានកត់សម្គាល់ជាលើកដំបូងដែលពួកអ្នកតំណាងអង្គការសហប្រជាតិនឹងត្រូវបានគេអនុញ្ញាតឲ្យទៅបំពេញទស្សនកិច្ចនៅរដ្ឋ Rakhineចាប់តាំងពីការចាប់ផ្តើមមានការចាកចេញរបស់ជនជាតិភាគតិចរ៉ូហ៊ីងយ៉ាកាន់សាសនាឥស្លាមដ៏ច្រើននោះ។ ការចេញចូលទៅកាន់តំបន់នោះជាប់នឹងប្រទេសបង់ក្លាដែសបានត្រូវត្រួតពិនិត្យដ៏តឹងរ៉ឹងដោយរដ្ឋាភិបាលមីយ៉ាន់ម៉ា។ អង្គការសហប្រជាជាតិបានប្រាប់ឲ្យដឹងកាលពីថ្ងៃព្រហស្បតិ៍ថា ជនភៀសខ្លួនជាង៥សែននាក់មកពីប្រទេសមីយ៉ាន់ម៉ាបានឆ្លងកាត់ព្រំដែនចូលក្នុងប្រទេសបង់ក្លាដែស។ អង្គការសហប្រជាជាតិបានប្រាប់ឲ្យដឹងទៀតថា ចំនួនថ្មីនិងកាន់តែច្រើនឡើងពីព្រោះតែពួកគេអាចរាប់ជនភៀសខ្លួនបានប្រសើរឡើង មិនមែនពីព្រោះតែចំនួនមនុស្សដែលមកដល់កើនឡើងយ៉ាងខ្លាំងនោះទេ។
អង្គការទេសន្តរប្រវេសន៍អន្តរជាតិបានរាយការណ៍កាលពីថ្ងៃព្រហស្បតិ៍ថាមនុស្ស១៣នាក់រួមមានកូនក្មេង៨នាក់ផង បានត្រូវសម្លាប់នៅពេលដែលទូកមួយគ្រឿងបានក្រឡាប់ខណៈដែលធ្វើដំណើរពីប្រទេសមីយ៉ាន់ម៉ាទៅកាន់ប្រទេសបង់ក្លាដែស។ ជនជាតិភាគតិចរ៉ូហ៊ីងយ៉ា៣០នាក់ទៀតបានត្រូវជួយសង្គ្រោះពីទូកដែលមានដឹកមនុស្ស១២០នាក់នោះ៕
