គ្មានប្រទេសណាមួយគេចផុតពីការរាតត្បាតជាសាកលនៃជំងឺកូវីដ១៩ទេ។ ក៏ប៉ុន្តែដូចជាក្នុងករណីនៃជំងឺឯទៀតៗដែរមន្ត្រីអ.ស.ប.និយាយថា ពួកអ្នកក្រីក្របំផុតនិងពួកអ្នកអាចរងគ្រោះដោយងាយនិងពួកជនត្រូវចាត់ទុកថា គ្មានសារៈសំខាន់ក្នុងសង្គមគឺជា ក្រុមជនរងគ្រោះបំផុតដោយសារផលប៉ះពាល់នៃជំងឺកូវីដ១៩។
លោកស្រី Michelle Bachelet អគ្គស្នងការអ.ស.ប.ខាងសិទ្ធិមនុស្សបានមានប្រសាសន៍ថា រដ្ឋខ្លះបានឆ្លើយតបនឹងវិបត្តិនេះដោយអនុវត្តគោលនយោបាយផ្អែកលើសិទ្ធិមនុស្ស។ លោកស្រីបាននិយាយដែរថា រដ្ឋដែលបានអនុវត្តគោលនយោបាយនានាដូចជាការមានការថែទាំសុខភាពសម្រាប់ពួកជនដែលគ្មានប្រាក់បង់ការថែទាំសុខភាពនិងការផ្តល់ប្រាក់ជំនួយ ម្ហូបអាហារគ្រាមានអាសន្ន និងជំនួយចាំបាច់ឯទៀតៗដល់ក្រុមជនបាត់បង់ការងារជាដើមនោះអាចដោះស្រាយវិបត្តិសុខភាពនេះល្អជាងរដ្ឋដែលមិនអនុវត្តគោលនយោបាយទាំងនេះ។
ម្យ៉ាងវិញទៀតលោកស្រីអគ្គស្នងការបានព្រមានថា ប្រទេសជាតិដែលមិនអើពើដល់សេចក្តីត្រូវការរបស់ក្រុមពលរដ្ឋខ្សោយបំផុតក្នុងសង្គមនឹងប្រឈមនឹងអនាគតអាប់អ៊ួរ។
លោកស្រី Michelle Bachelet បានមានប្រសាសន៍ថា៖
«នៅពេលសព្វថ្ងៃនេះ រដ្ឋខ្លះបានបង្ហាញការមិនទុកចិត្តខ្លាំងដល់ប្រជាពលរដ្ឋខ្លួនដោយសង្កត់សង្កិនការរិះគន់កំហិតសេរីភាពនៃការទទួលព័ត៌មាននិងបង្ក្រាបសកម្មភាពរបស់ពលរដ្ឋ។ អំពើទាំងនេះនិងការរំលោភលើសិទ្ធិមនុស្សឯទៀតៗបានធ្វើឱ្យអន្តរាយសុខាភិបាលសាធារណៈសិទ្ធិមនុស្សនិងកាត់បន្ថយលទ្ធភាពនៃការរើបឡើងវិញដោយមានភាពខ្លាំងក្លានិងប្រកបដោយចីរភាព»។
វិធានការបិទប្រទេសដែលមានគោលដៅបន្ថយការរាលដាលនៃវីរុសកូរ៉ូណាបានធ្វើឱ្យមានផលប៉ះពាល់សែនធ្ងន់ធ្ងរដល់សេដ្ឋកិច្ចរបស់ប្រទេសជាច្រើន។វិធានការទាំងនេះបាននាំឱ្យមានផលប៉ះពាល់ធ្ងន់ណាស់ដល់ពួកជនក្រីក្រនិងមនុស្សជាងពីរពាន់លាននាក់ដែលធ្វើការក្នុងវិស័យសេដ្ឋកិច្ចក្រៅប្រព័ន្ធ។
អង្គការពលកម្មអន្តរជាតិរាយការណ៍ថា ក្នុងការរាតត្បាតជាសាកលនៃជំងឺនេះ ក្រុមស្ត្រីរងផលប៉ះពាល់ច្រើនជាងបុរសក្នុងការបាត់បង់ការងារនិងការបន្ថយម៉ោងធ្វើការ។ អង្គការនេះនិយាយថា ក្រុមជនឯទៀតៗដែលរងផលប៉ះពាល់ដោយសារវិបត្តិសេដ្ឋកិច្ច វិបត្តិគ្មានការងារធ្វើ រួមមានពួកពលករចំណាកស្រុកពួកជនជាតិដើមម្ចាស់ស្រុក ពួកជនជាតិភាគតិច និងក្រុមជនមានកាយវិកល។ អង្គការពលកម្មអន្តរជាតិថ្លែងថា ប្រព័ន្ធការពារខាងសង្គមជាផ្នែកសំខាន់មួយនៃការរើបឡើងវិញពីជំងឺកូវីដ១៩។
អង្គការសុខភាពពិភពលោក WHO រាយការណ៍ថា ក្នុងពេលឆាប់ៗនេះចំនួនមនុស្សមានជំងឺកូវីដ១៩នឹងមានដល់២៩លាននាក់ ដោយមានរួមបញ្ជូលមនុស្សស្លាប់ជិតមួយលាននាក់ផងដែរ។
លោក Michael Ryan ជានាយកប្រតិបត្តិនៃកម្មវិធីសុខភាពគ្រាមានអាសន្ននៃអង្គការ WHO។ លោកកត់សម្គាល់ថា សុខភាពមនុស្ស និងសិទ្ធិមនុស្សមានការជាប់ទាក់ទងគ្នា។ លោកបាននិយាយថា សេវាថែទាំសុខភាពនៅពេលមានការរាតត្បាតនៃវីរុសកូរ៉ូណាគ្មានយុត្តធម៌ឡើយ។ លោក Michael Ryan បានមានប្រសាសន៍ថា៖
«ការណ៍នេះរងឥទ្ធិពលពីវិសមភាពភេទ វិសមភាពធនធាន អាយុ វិសមភាពឋានៈសង្គម វិសមភាពឋានៈខាងច្បាប់ និងវិសមភាពពូជសាសន៍និងកត្តាឯទៀតៗជាច្រើន...។ អង្គការសុខភាពពិភពលោកគាំទ្រការិយាល័យនៃអគ្គស្នងការអ.ស.ប.ខាងសិទ្ធិមនុស្សដែលបានព្រមានជាទៀងទាត់ថា ការរាតត្បាតជាសាកលនៃជំងឺកូវីដ១៩មិនគួរត្រូវបានប្រើជាលេសមួយដើម្បីបង្ក្រាបលើសេរីភាពជាមូលដ្ឋានឡើយ»។
លោក Michael Ryan ដែលជានាយកប្រតិបត្តិនៃកម្មវិធីសុខភាពគ្រាមានអាសន្ននៃអង្គការអង្គការសុខភាពពិភពលោក បាននិយាយថា សហគមន៍អន្តរជាតិត្រូវធ្វើការជាមួយគ្នាដើម្បីអភិវឌ្ឍជាមួយគ្នានូវវ៉ាក់សាំងមានសុវត្ថិភាពនិងមានប្រសិទ្ធភាពនិងព្យាបាលជំងឺកូវីដ១៩។ លោកថ្លែងថា ផលិតកម្មជួយជីវិតមនុស្សទាំងនេះត្រូវតែបែងចែកឲ្យបានលឿននិងស្មើគ្នាដល់ពួកអ្នកមាននិងពួកអ្នកក្រដូចៗគ្នា។លោកនិយាយទៀតថា ការផ្តល់ថ្នាំនេះមិនគួរផ្អែកលើសមត្ថភាពមានលុយទិញនោះទេ៕
ប្រែសម្រួលដោយលោកឈឹម សុមេធ
