ក្រុមប្រឹក្សាសន្តិសុខអង្គការសហប្រជាជាតិ នឹងកោះប្រជុំក្នុងគ្រាអាសន្ននៅថ្ងៃសុក្រនេះលើបទចោទប្រកាន់ស្តីពីការផលិតអាវុធជីវសាស្ត្រនៅក្នុងប្រទេសអ៊ុយក្រែនទៅតាមសំណើរបស់រដ្ឋាភិបាលក្រុងមូស្គូ ដែលភាពគួរឲ្យទុកចិត្តបានស្តីពីអាវុធគីមីនោះ បានត្រូវចោទសួរក្នុងសម័យប្រជុំស្តីពីប្រទេសស៊ីរី។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។
ប្រទេសរុស្ស៊ី កាលពីថ្ងៃព្រហស្បតិ៍ បានចោទប្រកាន់សហរដ្ឋអាមេរិកពីការផ្តល់ថវិកាដល់ការស្រាវជ្រាវនៅក្នុងការអភិវឌ្ឍអាវុធជីវសាស្ត្រនៅក្នុងប្រទេសអ៊ុយក្រែនដែលបានប្រឈមការវាយប្រហារពីកងទ័ពរុស្ស៊ីរាប់ម៉ឺននាក់ចាប់តាំងពីថ្ងៃទី២៤ ខែកុម្ភៈមក។
ទាំងរដ្ឋាភិបាលក្រុងវ៉ាស៊ីនតោននិងរដ្ឋាភិបាលក្រុងកៀវ បានច្រានចោលការចោទប្រកាន់នេះ ដោយសហរដ្ឋអាមេរិក និយាយថា ការចោទប្រកាន់នេះជាសញ្ញាថា រដ្ឋាភិបាលក្រុងមូស្គូ អាចប្រើអាវុធគីមីដោយខ្លួនឯងនៅពេលឆាប់ៗខាងមុខនេះ។
ប្រធានាធិបតីអ៊ុយក្រែនលោក Volodymyr Zelensky បានច្រានចោលការចោទប្រកាន់ទាំងនោះរបស់រុស្ស៊ីនៅក្នុងសុន្ទរកថាតាមវីដេអូកាលពីថ្ងៃព្រហស្បតិ៍ដោយនិយាយថា «គ្មាននរណាកំពុងអភិវឌ្ឍអាវុធគីមីឬអាវុធប្រល័យលោកផ្សេងៗទៀត» នៅក្នុងប្រទេសអ៊ុយក្រែននោះឡើយ។
ប្រទេសលោកខាងលិច បានចោទប្រកាន់ថា រុស្ស៊ី កំពុងប្រើឧបាយកលដោយចោទប្រកាន់គូប្រឆាំងរបស់ខ្លួននិងសហរដ្ឋអាមេរិកពីការធ្វើអាវុធជីវសាស្ត្រនិងអាវុធគីមីដើម្បីប្រើអាវុធទាំងនោះដោយខ្លួនឯងនៅក្នុងប្រទេសអ៊ុយក្រែន ជាអ្វីដែលរដ្ឋាភិបាលក្រុងមូស្គូ បានរងការ ចោទប្រកាន់ថា បានធ្វើនៅក្នុងប្រទេសស៊ីរី។
ប្រេសិតរងរបស់សហរដ្ឋអាមេរិកប្រចាំនៅអង្គការសហប្រជាជាតិលោក Richard Mills បាននិយាយថា «សហព័ន្ធរុស្ស៊ី បានផ្សព្វផ្សាយព័ត៌មានក្លែងក្លាយម្តងហើយម្តងទៀតចំពោះការ ប្រើអាវុធគីមីនៅក្នុងប្រទេសស៊ីរី»។
លោក James Kariuki ប្រេសិតរងរបស់ចក្រភពអង់គ្លេស បានរិះគន់ការវាយប្រហាររបស់រដ្ឋាភិបាលក្រុងមូស្គូលើប្រទេសអ៊ុយក្រែន ហើយបាននិយាយថា «ការណ៍នេះបានបញ្ជាក់យ៉ាងច្បាស់ថា វាដូចគ្នានឹងសកម្មភាពរុស្ស៊ីនៅក្នុងប្រទេសស៊ីរីដែរ»៕
