ក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃពុធម្សិលមិញ បានសម្រេចរើសបេក្ខជនចុងក្រោយមួយរូបដើម្បីកាន់តំណែងជាអគ្គលេខាធិការអង្គការសហប្រជាជាតិនាអាណត្តិបន្ទាប់។
លោកអតីតនាយករដ្ឋមន្ត្រីព័រទុយហ្គាល់ Antonio Guterresដែលជាអ្នកនយោបាយ និងអ្នកការទូតជើងចាស់មួយរូប ត្រូវបានជ្រើសរើសឲ្យសំឡេងភាគច្រើនលើសលប់ក្នុងចំណោមសមាជិកទាំង ១៥ រូប របស់ក្រុមប្រឹក្សាអង្គការសហប្រជាជាតិ។
លោក Guterres ដែលមានអាយុ ៦៧ ឆ្នាំ ធ្លាប់ធ្វើជានាយករដ្ឋមន្ត្រីប្រទេសព័រទុយហ្គាល់ពីឆ្នាំ ១៩៩២ ដល់ឆ្នាំ ២០០២ មុនពេលលោកធ្វើជាប្រធានឧត្ដមស្នងការជាន់ខ្ពស់អង្គការសហប្រជាជាតិទទួលបន្ទុកជនភៀសខ្លួន UNHCR ពីឆ្នាំ ២០០៥ ដល់ឆ្នាំ ២០១៥។
លោក Guterres បានប្រាប់ VOA នៅក្នុងកិច្ចសម្ភាសន៍ដែលធ្វើឡើងក្នុងអំឡុងពេលលោកធ្វើយុទ្ធនាការឃោសនាធ្វើជាអគ្គលេខាធិការអង្គការសហប្រជាជាតិថា លោកចង់ធ្វើជាអគ្គលេខាធិការអង្គការសហប្រជាជាតិ ដោយសារតែលោកចង់ «បង្កើតលក្ខខណ្ឌឲ្យមានដំណោះស្រាយ» សម្រាប់បញ្ហាប្រឈមរបស់សាកលលោក។
បន្ទាប់ពីការបោះឆ្នោតសម្រេចជាឯកច្ឆន្ទដែលធ្វើនៅថ្ងៃព្រហស្បតិ៍នេះ ក្រុមប្រឹក្សាសន្តិសុខអង្គការសហប្រជាជាតិនឹងធ្វើការឧទ្ទេសនាមលោក Guterres ទៅឲ្យមហាសន្និបាតអង្គការសហប្រជាជាតិ ដែលមានសមាជិកចំនួន ១៩៣ ប្រទេសធ្វើសេចក្ដីសម្រេចជ្រើសរើសលោកជាចុងក្រោយ។
លោក Antonio Guterres នឹងចូលកាន់តំណែងជាអគ្គលេខាធិការអង្គការសហប្រជាជាតិបន្តពីលោក Ban Ki Moon នៅថ្ងៃទី១ ខែមករា ឆ្នាំ ២០១៧៕
