ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អ.ស.ប. សរសើរ​កម្ពុជា​លើ​ការ​ចូលរួម​ដោះស្រាយ​បញ្ហា​ពិភពលោក ទោះ​ជា​បារម្ភរឿង​សិទ្ធិ​មនុស្ស


ទាញ​យក​ពី​តំណភ្ជាប់​ដើម

អ.ស.ប. សរសើរ​កម្ពុជា​លើ​ការ​ចូលរួម​ដោះស្រាយ​បញ្ហា​ពិភពលោក ទោះ​ជា​បារម្ភរឿង​សិទ្ធិ​មនុស្ស

លោកស្រី អ៊ៀរី កាណេកុ (Eri Kaneko) មន្ត្រី​នាំពាក្យ​អ.ស.ប.​ម្នាក់ បាន​ថ្លែង​ប្រាប់​ VOA ខេមរភាសា​នៅ​ខាងក្រៅ​កិច្ចប្រជុំ​មហា​សន្និបាត​អ.ស.ប.​ក្នុង​ទីក្រុង​ញូវយ៉ក​ថា ការ​អភិវឌ្ឍន៍​នៅ​កម្ពុជា​ដែល​ផ្តោត​ការ​យកចិត្ត​ទុក​ដាក់​ទៅ​លើ​ការភ្ជាប់​សន្តិភាព​ទៅ​នឹង ការ​អភិវឌ្ឍន៍​នោះ​គឺ​ជា​គំរូ​មួយ។

ដំណាល​គ្នា​ដែល​មន្ត្រី​ជាន់ខ្ពស់​កម្ពុជា​ថ្លែង​សុន្ទរកថា​នៅ​ឯ​កិច្ចប្រជុំ​មហា​សន្និបាត​អ.ស.ប.​លើក​ទី៧១ កាលពី​ចុងខែ​កញ្ញា​នេះ​ មន្ត្រី​នាំ​ពាក្យ​របស់​លោក​អគ្គលេខា​ធិការ​អ.ស.ប. បាន គីម៊ូន បាន​ថ្លែង​ថា ប្រទេស​កម្ពុជា​បាន​ចូលរួម​ក្នុង​សកម្មភាព​អន្តរជាតិ​មួយ​ចំនួន ដែល​អ.ស.ប​សម្តែង​ការ​ពេញ​ចិត្ត។

ក្រៅពី​ការ​បញ្ជូន​កងទ័ព​ដោះមីន​ចូល​ទៅ​ក្នុង​បេសកកម្ម​រក្សា​សន្តិភាព​របស់​អ.ស.ប.​ក្នុង​ប្រទេស​ជាច្រើន ប្រទេស​កម្ពុជា​ជា​ប្រទេស​ក្រីក្រ​មួយ​ដែល​ទើប​ងើប​ចេញ​ពី​សង្គ្រាម ហើយ​កំពុង​ធ្វើការ​អភិវឌ្ឍន៍​ប្រទេស​ខ្លួន​ផង​នោះ បាន​ចូលរួម​អនុម័ត​ផ្តល់​សច្ចាប័ន​លើ​កិច្ច​ព្រមព្រៀង​ក្រុង​ប៉ារីស​លើ​បញ្ហា​ប្រែប្រួល​អាកាស​ធាតុ និង​សកម្ម​ភាព​ផ្សេងៗ​ទៀត។

លោកស្រី អ៊ៀរី កាណេកុ (Eri Kaneko) មន្ត្រី​នាំពាក្យ​អ.ស.ប.​ម្នាក់ បាន​ថ្លែង​ប្រាប់​ VOA ខេមរភាសា​នៅ​ខាងក្រៅ​កិច្ចប្រជុំ​មហា​សន្និបាត​អ.ស.ប.​ក្នុង​ទីក្រុង​ញូវយ៉ក​ថា ការ​អភិវឌ្ឍន៍​នៅ​កម្ពុជា​ដែល​ផ្តោត​ការ​យកចិត្ត​ទុក​ដាក់​ទៅ​លើ​ការភ្ជាប់​សន្តិភាព​ទៅ​នឹង ការ​អភិវឌ្ឍន៍​នោះ​គឺ​ជា​គំរូ​មួយ។

«កម្ពុជា​គឺជា​ប្រទេស​គាំទ្រ​យ៉ាងខ្លាំង​ចំពោះ​ការ​អភិវឌ្ឍន៍​ ការ​អភិវឌ្ឍន៍​សហស្សវត្ស​ ហើយ​នឹង​ការ​អភិវឌ្ឍន៍​ប្រកប​ដោយ​ចីរភាព។ ហើយ​យើង​នៅ​ឯ​អ.ស.ប.​ពិត​ជា​អរគុណ ចំពោះ​ការ​គាំទ្រ​របស់​កម្ពុជា​ក្នុង​កម្មវិធី​នេះ។ ការ​បំពេញ​មុខងារ​របស់​កម្ពុជា​នេះ​គឺជាគំរូ​មួយ​ដែល​ប្រទេស​មួយ​អាច​សម្រេច​បាន​ជោគជ័យ​នៅ​ពេល​ប្រទេស​នោះ​ដាក់​ការ​អភិវឌ្ឍន៍​ជា​ចំណុច​ស្នូល​នៃ​គោលបំណង​របស់​ខ្លួន‍»។

លោកស្រី​បាន​អះអាង​ថា ប្រទេស​មួយ​មិនអាច​មាន​ការ​អភិវឌ្ឍន៍​ដោយ​គ្មាន​សន្តិភាព ហើយក៏​មិន​អាច​មាន​សន្តិភាព​ដោយ​គ្មាន​ការអភិវឌ្ឍន៍​បាន​ដែរ។​ លោកស្រី​ថ្លែង​យ៉ាង ដូច្នេះ​ទំនង​ជា​យោង​ទៅ​លើ​សន្តិភាព​ក្នុង​ប្រទេស​កម្ពុជា​ដែល​កើត​មាន​ឡើង​កាល​ពី​ឆ្នាំ​១៩៩៩​ និង​កំណើន​សេដ្ឋកិច្ច​កម្ពុជា​ឡើង​ដល់​៧​ភាគរយ ​ជា​ប្រចាំ​តាម​សន្ទស្សន៍​សេដ្ឋកិច្ច​ដែល​អង្គការ​ហិរញ្ញវត្ថុ​ពិភពលោក​នានា​បាន​ទស្សន៍ទាយ ​និង​កត់ត្រា​ជាច្រើន​ឆ្នាំ​ជាប់ៗ​គ្នា​កន្លង​មក ​ក្រោយ​កម្ពុជា​បញ្ចប់​សង្គ្រាម​ទាំងស្រុង​រវាង​ភាគី​ខ្មែរ។

លោក ប្រាក់ សុខុន រដ្ឋ​មន្ត្រី​ក្រសួង​ការបរទេស​កម្ពុជា ផ្តល់​បទ​សម្ភាសន៍​ផ្តាច់​មុខ​ឲ្យ​លោក សុខ ខេមរា អ្នក​យក​ព័ត៌មាន​របស់​វីអូអេ​ផ្សាយ​ជា​ខេមរភាសា ​នៅ​ការិយាល័យ​បេសកកម្ម​របស់​កម្ពុជា​ប្រចាំ​អង្គការ​សហប្រជា​ជាតិ មួយ​ថ្ងៃ​ក្រោយ​ពេល​ដែល​លោក​បាន​ថ្លែង​សុន្ទរកថា​នៅ​មហាសន្និបាត​អង្គការ​សហប្រជាជាតិ​នៅទីក្រុង​ញូវយ៉ក កាលពី​ថ្ងៃ​អាទិត្យ ទី២៥ ខែ​កញ្ញា ឆ្នាំ​២០១៦។
លោក ប្រាក់ សុខុន រដ្ឋ​មន្ត្រី​ក្រសួង​ការបរទេស​កម្ពុជា ផ្តល់​បទ​សម្ភាសន៍​ផ្តាច់​មុខ​ឲ្យ​លោក សុខ ខេមរា អ្នក​យក​ព័ត៌មាន​របស់​វីអូអេ​ផ្សាយ​ជា​ខេមរភាសា ​នៅ​ការិយាល័យ​បេសកកម្ម​របស់​កម្ពុជា​ប្រចាំ​អង្គការ​សហប្រជា​ជាតិ មួយ​ថ្ងៃ​ក្រោយ​ពេល​ដែល​លោក​បាន​ថ្លែង​សុន្ទរកថា​នៅ​មហាសន្និបាត​អង្គការ​សហប្រជាជាតិ​នៅទីក្រុង​ញូវយ៉ក កាលពី​ថ្ងៃ​អាទិត្យ ទី២៥ ខែ​កញ្ញា ឆ្នាំ​២០១៦។

នៅក្នុង​សុន្ទរកថា​នៅឯ​កិច្ចប្រជុំ​មហា​សន្និបាត​អ.ស.ប.​នោះ​ដែរ​ លោក​ទេសរដ្ឋ​មន្ត្រី ប្រាក់​ សុខុន​ រដ្ឋ​មន្ត្រី​ក្រសួង​ការ​បរទេស​កម្ពុជា​តំណាង​ឲ្យ​ប្រទេស​កម្ពុជា​បាន​ថ្លែងពី​កិច្ច​ប្រឹងប្រែង​របស់​រដ្ឋាភិបាល​លោក​នាយក​រដ្ឋមន្ត្រី ​ហ៊ុន សែន ​ក្នុងការ​កសាង ប្រទេស​ចេញ​ពី​អំពើ​ប្រល័យ​ពូជ​សាសន៍ ​ខ្មែរក្រហម​ហើយនឹង​សង្គ្រាម​រ៉ាំរ៉ៃ​ជាច្រើន ទសវត្សរ៍។

លោក​បាន​អះអាង​ថា ​កម្ពុជា​រងគ្រោះ​ដោយសារ​សង្គ្រាម​ក្នុង​ទសវត្សរ៍​១៩៧០​ និង​របប​ប្រល័យ​ពូជ​សាសន៍ ហើយ​ធនធាន ហេដ្ឋា​រចនាសម្ព័ន្ធ​ត្រូវ​បំផ្លិច​បំផ្លាញ​សឹងតែ​អស់​ដោយ​ពុំ​បាន​ចូល​រួម​ជាមួយ​នឹង​ពិភពលោក​ទេ​រហូត​ទាល់​តែ​ឆ្នាំ​២០០៦។​ តែ​លោក​ថា​កម្ពុជា​បាន​ធ្វើ​ឲ្យ​សេដ្ឋកិច្ច​រីកចម្រើន​ដល់​ទៅ​៧ភាគរយ ​បាន​កាត់​បន្ថយ​ភាពក្រីក្រ​ ចំនួន​១ភាគ​រយ​ជារៀង​រាល់ឆ្នាំ​ចាប់តាំង​ពីឆ្នាំ​១៩៩៤​មក។​ មិនត្រឹម​តែ​ប៉ុណ្ណោះ​ លោក​បាន​បន្ថែម​ថា កម្ពុជា​បាន​បញ្ជូន​កងទ័ព​ដោះមីន​ អ្នក​បច្ចេកទេស​ និង​គ្រូពេទ្យ​ចំនួន ៩០០​នាក់​បច្ចុប្បន្ន​នេះ​ ក្នុង​ចំណោម​ជាង​៣០០០នាក់​ ទៅ​កាន់​ប្រទេស​ជាច្រើន​ដូចជា ​ស៊ូដង់ ​ស៊ូដង់​ខាងត្បូង ​សូម៉ាលី​ជាដើម​ ក្នុង​បេសកកម្ម​រក្សា​សន្តិភាព​របស់​អ.ស.ប.។

«ប៉ុន្តែ​ចុងក្រោយ​នេះ​ ១០ឆ្នាំ​ ចាប់ពី​ឆ្នាំ​២០០៦​មក​ គឺ​យើង​បាន​រួម​ចំណែក​ក្នុង​បុព្វហេតុ សន្តិភាព​តាមរយៈ​ការ​បញ្ជូន​កងទ័ព​មួកខៀវ​របស់​យើង​មក​ចូលរួម​ក្នុង​បេសកកម្ម​រក្សា សន្តិភាព​របស់​អ.ស.ប.។ ដំបូង​បំផុត​យើង​បាន​បញ្ជូន​ក្រុម​ដោះមីន‍»។

ក្នុង​សុន្ទរកថា​របស់​លោក​ជិត​២០នាទី​ដដែល​ ហើយនឹង​ការធ្វើ​កិច្ច​សម្ភាសន៍​ផ្តាច់មុខ​ជាមួយ​ VOA​ ផ្នែក​ខេមរភាសា ​លោក​ប្រាក់ សុខុន ​បាន​ថ្លែង​ប្រាប់​ពី​ការ​ប្តេជ្ញា​របស់​កម្ពុជា​ក្នុង​ការ​ចូលរួម​ជាមួយ​នឹង​អន្តរជាតិ​ក្នុង​ការ​ទប់ស្កាត់​ការ​ប្រែប្រួល​អាកាស​ធាតុ​ផងដែរ​ ដោយ​បញ្ជាក់​ថា​ គណៈរដ្ឋ​មន្ត្រី​កម្ពុជា​ទើបតែ​បាន​អនុម័ត​លើ​កិច្ច​ព្រម​ព្រៀង ​ទីក្រុង​ប៉ារីស​ស្តីពី​ការ​ប្រែប្រួល​អាកាស​ធាតុ​ ដើម្បី​ដាក់​ជូនសភា​ផ្តល់​សច្ចាប័ន។​ លោក​បាន​បន្ទរថា​ការ​ប្រែប្រួល​អាកាស​ធាតុ​បានធ្វើ​ឲ្យ​ប្រទេស​នានា​រងគ្រោះ​ដោយ​ទឹកជំនន់​ ក្តៅ​ហួត​ហែង​ជាង​ពេល​មុនៗ​២អង្សារ​ ខ្វះ​ទឹក​ប្រើ​ប្រាស់ ​ភ្លៀង​ធ្លាក់​មិនទៀង​ទាត់​ ការ​ប្រែប្រួល​សន្តិសុខ​ស្បៀង​និង​គ្រោះ​មហន្ត​រាយ​ផ្សេងៗ​ទៀត។

«អញ្ចឹង​ហើយ​បានជា​ឆ្នាំ​កន្លង​ទៅ​នេះ​ថ្នាក់​ដឹកនាំ​ពិភព​លោក​បាន​សម្រេច​កិច្ច​ព្រម ព្រៀង​ក្រុងប៉ារីស​ស្តីពី​ការ​ប្រែប្រួល​ធាតុ​អាកាស​ ហើយ​ប្រទេស​កម្ពុជាក៏​ជា​ប្រទេស ដែល​បាន​ចុះ​ហត្ថលេខា ​ជាប្រទេស​ហត្ថលេខី​មួយ​ដែរ​នៃកិច្ច​ព្រមព្រៀង​ក្រុង​ប៉ារីស​នេះ‍»។ ​

រីឯ​លោកស្រី​ កាណេកុ​ បាន​ថ្លែង​ទៀត​ថា​ ប្រទេស​នានា​លើ​ពិភព​លោក​រួមទាំង​កម្ពុជា​បាន​ប្តេជ្ញា​ថា​ នឹង​ចូលរួម​ប្រយុទ្ធ​ប្រឆាំង​នឹង​ការ​ប្រែប្រួល​អាកាស​ធាតុ​ ដែល​ជា​ក្តីបារម្ភ​របស់​ពិភព​លោក​ ហើយ​ថា​ការ​សន្យា​របស់​កម្ពុជា​ក្នុងការ​អនុម័ត​ផ្តល់​សច្ចាប័ន​លើ​កិច្ច​ព្រមព្រៀង​ក្រុង​ប៉ារីស​ស្តីពី​ការ​ប្រែប្រួល​អាកាស​ធាតុ​នេះ​ជា​រឿង​ដែល​អាច​ជំរុញ​ឲ្យ​កិច្ចព្រម​ព្រៀង​នេះ​បាន​អនុវត្តឆាប់។

«ហើយ​យើង​សូម​អរគុណ​ដល់​សកម្មភាព​របស់​កម្ពុជា។​ យើង​សង្ឃឹម​ថា​កិច្ចព្រម​ព្រៀង ក្រុងប៉ារីស​ស្តីពីការ​ប្រែប្រួល​អាកាស​ធាតុ​នេះ​ នឹង​ចូល​ជា​ធរមាន​ដើម្បី​អនុវត្ត ​នៅមុនដំណាច់​ឆ្នាំ២០១៦​នេះ‍»។

កិច្ចព្រម​ព្រៀង​ក្រុង​ប៉ារីស​ស្តីពី​ការ​ប្រែប្រួល​អាកាស​ធាតុ​នេះ​នឹងចាប់​ផ្តើម​អនុវត្ត​ភ្លាម នៅពេល​ដែល​ប្រទេស​ដែល​បញ្ចេញ​ឧស្ម័ន​ផ្ទះ​កញ្ចក់​ចំនួន​៥៥​ភាគរយ​ចូលរួម។​ តែ​សេចក្តី​ត្រូវការ​ចាំបាច់​នេះ​ទើបតែ​បាន​៤៨​ភាគរយ​ទេ​មកទល់​នឹង​បច្ចុប្បន្ន​នេះ។ អ.ស.ប.​មាន​ប្រទេស​ដល់​ទៅ៦០​ហើយ​ ដែល​ចូលរួម​ក្នុងកិច្ច​ព្រម​ព្រៀង​ក្រុង​ប៉ារីស​ស្តីពី​ការប្រែ​ប្រួល​អាកាស​ធាតុ​នេះ។

ពាក់ព័ន្ធ​នឹង​បញ្ហា​នយោបាយ​ផ្ទៃក្នុងកម្ពុជា​ លោក​ប្រាក់ សុខុន​ រដ្ឋមន្ត្រី​ការ​បរទេស​កម្ពុជា​បាន​ការពារ​ និងច្រាន​ចោល​ការ​ចោទ​ប្រកាន់​រឿង​ធ្វើ​ទុក្ខបុក​ម្នេញ​ផ្នែក​នយោបាយ និង​ការ​រំលោភ​សិទ្ធិមនុស្ស​លើក្រុម​ជំទាស់​ ដោយ​ចាត់​ទុកថា​ជា​រឿង​មិន​យុត្តិធម៌​នោះ​ទេ​ សម្រាប់​កម្ពុជា​ដោយសារ​ថា បញ្ហា​ដែល​កើត​ឡើង​ចំពោះ​មន្ត្រី​និង​មេដឹកនាំ​គណបក្ស​ប្រឆាំងគឺ​ លោក​ សម រង្ស៊ី និង​ លោក​ កឹម សុខា ​ជា​បញ្ហាបុគ្គល​ មិនមែន​ជាបញ្ហា​បក្ស​នយោបាយ​ទេ។​

«តែ​គណបក្ស​របស់​លោក​ទាំងពីរ ​គណបក្ស​សង្គ្រោះ​ជាតិ​ មិនមាន​បញ្ហា​អ្វី​ទាំង​អស់​ គឺ​គាត់​នៅតែ​ដំណើរ​ការ​ធម្មតា​ សមាជិក​ផ្សេងទៀត​នៅក្នុង​គណបក្ស​សង្គ្រោះ​ជាតិ​ គឺនៅ​ធ្វើ​សកម្មភាព​ធម្មតា​ ទៅ​ណា​មក​ណា​អី​ធម្មតា​ មាន​សិទ្ធ​សេរីភាព​ពេញ​លេញ​ធម្មតា។​ អញ្ចឹង​យើង​អត់​មាន​ប៉ះពាល់​ទៅដល់​គណបក្ស​ទេ​ ហើយ​មិន​ប៉ះពាល់​ទៅ​ដល់​សមាជិក​ណា​ដែល​មិនបាន​ប្រព្រឹត្ត​ខុស។​ អញ្ចឹង​យើង​និយាយ​តែ​សមាជិក​ណា​ដែល​ប្រព្រឹត្តខុស‍»។

តែ​លោក​ស្រី​ កាណេកុ ​អ្នកនាំ​ពាក្យ​អ.ស.ប​.បាន​អះអាង​ថា ​លោក​អគ្គលេខា​ធិការ​អ.ស.ប. ​ឃ្លាំ​មើល​ស្ថាន​ការណ៍​នយោបាយ​ក្នុង​ប្រទេស​កម្ពុជា​យ៉ាង​យក​ចិត្ត​ទុកដាក់​ ហើយ​ទទូច​ឲ្យ​ភាគី​នានា​បន្តការ​សន្ទនា។

«ដូចជា​លោក​អគ្គលេខា​ធិការ​បាន​បញ្ជាក់​ ហើយនឹង​បន្ត​បញ្ជាក់​គឺថា​លោក​អគ្គលេខា​ធិការ​អ.ស.ប​.សូម​គាំទ្រ​ចំពោះ​ការ​ពិភាក្សា​ថ្នាក់​ជាតិ ​ដែល​ជាស្នូល​នៃ​កិច្ច​ប្រឹង​ប្រែង​ទាំងឡាយ​ ដើម្បី​ដោះ​ស្រាយ​បញ្ហា​តាមរយៈ​មធ្យោបាយ​អហិង្សា‍​រាប់​ទាំង​ជម្លោះ​នានា​ផង »។

ភាគី​នយោបាយ​ទាំងពីរ​ទើបតែ​បាន​ចាប់ផ្តើម​ចូល​ប្រជុំ​សភា​និង​ពិភាក្សាគ្នា​លើកិច្ចការ​ច្បាប់ ​ដែល​គេ​បកស្រាយ​ថា​ជា​ការ​ចាប់​ផ្តើម​ស្តារ​ឡើងវិញ​នូវ​របប​សេរីនិយម ​ពហុបក្ស​ បន្ទាប់​ពី​បាន​អាក់ខាន​ជាច្រើន​ខែ​ ដោយសារ​គណបក្ស​នយោបាយ​ទាំងពីរ​បាន​បង្ក​ឲ្យ មាន​អរិភាព​ រវាងគ្នា​និងគ្នា​ពាក់ព័ន្ធ​នឹងក្តីក្តាំ​នៅ​តុលាការ​លើ​មេដឹកនាំ​ក្រុម​ជំទាស់​និង ក្រុម​សង្គម​ស៊ីវិល។

ទោះជា​យ៉ាងណា​ក៏ដោយ ​អ្នក​នយោបាយ​ក្នុង​ប្រទេស​កម្ពុជា​ត្រូវ​អ្នក​វិភាគ​ខ្លះ​បាន​លើកទឹក​ចិត្ត​ឲ្យ​បន្សល់​ទុកមរតក​របស់​ខ្លួន​ ហើយ​ដោះស្រាយ​បញ្ហា​វិវាទ​នយោ​បាយ​ ដើម្បី​ភាព​នឹងនរ ​ការ​វិល​ត្រឡប់​ទៅរក​ស្ថានភាព​នយោបាយ​ធម្មតា​វិញ​ហើយនឹង​ដើម្បី​ការ​អភិវឌ្ឍន៍​របស់​ប្រទេស​ដែល​ទើប​ទទួល​បាន​សន្តិភាព​និង​បញ្ចប់​សង្គ្រាម​នេះ៕

XS
SM
MD
LG