អង្គការសហប្រជាជាតិរាយការណ៍ថា អ្នកធ្វើការផ្នែកមនុស្សធម៌ប្រឈមនឹងអំពើហិង្សាខ្លាំងដល់កម្រិតមួយមិនធ្លាប់មានពីមុនមក នៅពេលពួកគេហ៊ានប្រថុយជីវិតដើម្បីផ្តល់ជំនួយសង្គ្រោះជីវិតដល់ជនស៊ីវិលរាប់លាននាក់ដែលឋិតក្នុងតំបន់មានវិបត្តិ។ ទិវាមនុស្សធម៌ពិភពលោកក្នុងឆ្នាំនេះបានផ្តល់កិត្តិយស និងការគោរពដល់វីរជនរាប់ពាន់នាក់ទាំងនេះ។
ទិវាមនុស្សធម៌ពិភពលោកត្រូវបានបង្កើតឡើងនៅក្រោយការវាយប្រហារភេរវកម្មលើបរិវេណអាគារអង្គការសហប្រជាជាតិក្នុងទីក្រុងបាដាដ ប្រទេសអ៊ីរ៉ាក់ កាលពីថ្ងៃទី ១៩ ខែសីហា ឆ្នាំ ២០០៣ ដោយនៅពេលនោះ មនុស្ស ២២ នាក់ត្រូវបានសម្លាប់ ដែលក្នុងនោះរួមមានទាំងលោក Sergio Vieiro de Mello ដែលជាអ្នកតំណាងពិសេសរបស់អគ្គលេខាធិការអង្គការសហប្រជាជាតិប្រចាំនៅប្រទេសអ៊ីរ៉ាក់ផងដែរ។
ចាប់តាំងពីពេលនោះមក អ្នកធ្វើការខាងផ្នែកជំនួយមនុស្សធម៌ជិត ៥ ពាន់នាក់ត្រូវបានសម្លាប់ រងរបួស ឬចាប់ពង្រត់។ លោក Jens Laerke អ្នកនាំពាក្យនៃការិយាល័យអង្គការសហប្រជាជាតិទទួលបន្ទុកការសម្របសម្រួលកិច្ចការមនុស្សធម៌ បានប្រាប់ VOA ថា អ្នកធ្វើការផ្នែកមនុស្សធម៌ក្នុងឆ្នាំ ២០១៩ បានរងការវាយប្រហារជាច្រើនមិនធ្លាប់មានពីមុនមកនៅក្នុងតំបន់មានសង្គ្រាមនៅទូទាំងពិភពលោក។
លោក Jens Laerke និយាយថា៖ «កាលពីឆ្នាំមុន មានអ្នកធ្វើការផ្នែកជំនួយមនុស្សធម៌សរុបចំនួន ៤៨៣ នាក់ ដែលបានរងការវាយប្រហារនៅពេលបំពេញការងារ។ ក្នុងចំណោមនោះ ១២៥ នាក់ត្រូវបានសម្លាប់ ចំនួនដូចគ្នានេះដែរត្រូវបានចាប់ពង្រត់ និងជាច្រើននាក់ទៀតបានរងរបូស»។
អង្គការសហប្រជាជាតិបានរាយការណ៍ថា ការវាយប្រហារភាគច្រើនបានកើតមានឡើងនៅក្នុងប្រទេសស៊ីរី និងបន្ទាប់មកនៅប្រទេសស៊ូដង់ខាងត្បូង សាធារណរដ្ឋប្រជាធិបតេយ្យកុងហ្គោ ប្រទេសអាហ្វហ្គានីស្ថាន និងសាធារណរដ្ឋអាហ្វ្រិកកណ្តាល។
លោក Jens Laerke និយាយថា រាល់ពេលដែលអ្នកធ្វើការខាងផ្នែកជំនួយមនុស្សធម៌រងការវាយប្រហា វាមានផលប៉ះពាល់មិនល្អដល់ប្រជាពលរដ្ឋដែលពួកគេខិតខំជួយ។
លោក Jens Laerke ថ្លែងដូច្នេះថា៖ «ភាគច្រើននៃអ្នកធ្វើការផ្នែកជំនួយមនុស្សធម៌នៅជួរមុខ គឺជាពលរដ្ឋនៃប្រទេសដែលពួកគេធ្វើការផ្ទាល់តែម្ដង ដែលយើងហៅអ្នកទាំងនោះថាជាវីរជនពិតប្រាកដនៃទិវានេះ។ ជារឿយៗ ពួកគេជាសមាជិកនៃសហគមន៍ដែលពួកគេជួយ។ អ្នកខ្លះគឺជាជនភៀសខ្លួនដែលជួយជនភៀសខ្លួនដូចគ្នា ឬក៏ជួយដល់សហគមន៍ដែលទទួលពួកគេឱ្យស្នាក់អាស្រ័យ។ អ្នកខ្លះទៀតគឺជាវេជ្ជបណ្ឌិត និងគិលានុប្បដ្ឋាយិកាក្នុងមូលដ្ឋានដែលផ្តល់សេវារបស់ពួកគេដោយមិនគិតថ្លៃ»។
លោក Jens Laerke បានបន្ថែមថា អ្នកខ្លះទៀតគឺជាអ្នកធ្វើការផ្នែកជំនួយមនុស្សធម៌អន្តរជាតិ ដែលធ្វើការពីកន្លែងមានវិបត្តិមួយទៅកន្លែងមានវិបត្តិមួយទៀត។
ទីភ្នាក់ងារមនុស្សធម៌នានាបានព្រមានថា ការផ្តល់ជំនួយនៅពេលបច្ចុប្បន្ននេះកាន់តែមានគ្រោះថ្នាក់ជាងមុនដោយសារតែមានការឆ្លងរាតត្បាតជាសាកលនៃជំងឺកូវីដ១៩។ គណៈកម្មាធិការកាកបាទក្រហមអន្តរជាតិបានកត់ត្រាអំពីឧបទ្ទវហេតុហិង្សា ការយាយី ឬការមើលងាយជាង ៦០០ ករណី ដែលកើតឡើងលើបុគ្គលិកផ្នែកសុខាភិបាល អ្នកជំងឺ និងហេដ្ឋារចនាសម្ព័ន្ធសុខាភិបាលទាក់ទិននឹងករណីជំងឺកូវីដ១៩ នៅក្នុងរយៈពេល ៦ ខែដំបូងនៃការរាតត្បាតជាសាកលនៃជំងឺនេះ៕
ប្រែសម្រួលដោយលោក ឈឹម សុមេធ
