ប្រធានឧត្តមស្នងការជាន់ខ្ពស់អង្គការសហប្រជាជាតិទទួលបន្ទុកជនភៀសខ្លួនលោក Filippo Grandi និយាយថាប្រព័ន្ធសុំសិទ្ធិជ្រកកោនក្នុងសហរដ្ឋអាមេរិកបានក្លាយជារឿងមួយដែល«មិនអាចគ្រប់គ្រងបាន»ហើយទីភ្នាក់ងាររបស់លោកជួយធ្វើឲ្យប្រសើរឡើងវិញជាបណ្តើរៗឆ្ពោះទៅរកប្រព័ន្ធមានប្រសិទ្ធភាពប្រសើរជាងមុនសម្រាប់ជនចំណាកស្រុក។
ក្នុងបទសម្ភាសន៍ជាមួយវីអូអេលោក Grandi និយាយថាកំណែទម្រង់ប្រភេទនេះមានលក្ខណៈស្មុគ្រស្មាញដែលត្រូវប្រើពេលវេលាជាច្រើនឆ្នាំដើម្បីធ្វើឲ្យសម្រេចបានប៉ុន្តែលោកមានការលើកទឹកចិត្តចំពោះអ្វីដែលលោកបានឃើញកើតមានឡើងក្នុងរដ្ឋបាលរបស់លោកប្រធានាធិបតីJoe Bidenបន្ទាប់ពីមានការកាត់បន្ថយយ៉ាងខ្លាំងនូវការតាំងទីលំនៅថ្មីៗរបស់ជនភៀសខ្លួនក្នុងរដ្ឋបាលលោក Donald Trump។
លោកបានមានប្រសាសន៍ថា៖« យើងគាំទ្រពីព្រោះនេះគឺជាផ្នែកដែលមិនអាចខ្វះបាននៅក្នុងការអនុវត្តទូលំទូលាយដើម្បីដោះស្រាយការចល័តរបស់មនុស្សនៅអាមេរិកកណ្តាលដែលរួមបញ្ចូលទាំងចលនាប្រជាជនដែលជាជនភៀសខ្លួនពីព្រោះពួកគេរត់ចេញពីអំពើហិង្សាពីការធ្វើទុក្ខបុកម្នេញពីការរើសអើង។ការងារនោះត្រូវធ្វើនៅគ្រប់កម្រិតទាំងអស់ត្រូវតែធ្វើនៅក្នុងប្រទេសដើមដែលភាគច្រើននៅប្រទេសហុងឌូរ៉ាសអែលសាល់វ៉ាឌ័រដល់ប្រទេសហ្គាតេម៉ាឡាហើយក៏ត្រូវធ្វើនៅតាមបណ្តាប្រទេសឆ្លងកាត់ដែររួមទាំងប្រទេសក្វាតេម៉ាឡានិងប្រទេសម៉ិកស៊ិកព្រមទាំងត្រូវធ្វើនៅព្រំដែនផងដែរ»។
ចំនួនជនភៀសខ្លួនដែលត្រូវបានអនុញ្ញាតមកតាំងទីលំនៅក្នុងសហរដ្ឋអាមេរិកបានធ្លាក់ចុះពីចំនួន៨៥.០០០នាក់ក្នុងឆ្នាំ២០១៦មកត្រឹម១៨.០០០នាក់ក្នុងឆ្នាំ២០២០។ រដ្ឋបាលរបស់លោក Biden បានបង្កើនចំនួនជនភៀសខ្លួនដែលអាមេរិកទទួលយកដល់ចំនួន៦២.៥០០នាក់ក្នុងឆ្នាំនេះហើយមានគម្រោងនឹងបង្កើនរហូតដល់១២៥.0០០នាក់។
លោក Grandi ក៏បានលើកឡើងផងដែរថាបន្ថែមទៅលើការធ្លាក់ចុះដោយការកំណត់របស់រដ្ឋាភិបាលអាមេរិកនោះជំងឺកូវីដ១៩ក៏បានធ្វើឲ្យប៉ះពាល់ជាខ្លាំងដល់ការតាំងទីលំនៅថ្មីៗរបស់ជនភៀសខ្លួននៅជុំវិញពិភពលោកផងដែរក្នុងឆ្នាំ២០២០នោះ។
រដ្ឋបាលលោក Biden បានបង្កើនការទទួលជនភៀសខ្លួនចំនួនដល់៦២.៥០០នាក់នៅឆ្នាំនេះដោយមានផែនការជំរុញឱ្យបានដល់១២៥.០០០នាក់។
លោកបានប្រាប់ VOA ថា៖ «សាមញ្ញទេយើងត្រូវផ្អាកការធ្វើដំណើរតាំងទីលំនៅថ្មីពីព្រោះមិនមានជើងយន្តហោះទៀតទេ។យើងមិនអាចប្រើផ្លូវបានទេពីព្រោះពួកវាមិនដំណើរការ។ទាំងនេះគឺជាតថភាពជាក់ស្តែងដែលកំពុងត្រូវបានជម្នះយឺតៗប៉ុន្តែវាត្រូវការពេលវេលាខ្លះ»៕
