ឧត្តមស្នងការអង្គការសហប្រជាជាតិទទួលបន្ទុកកិច្ចការសិទ្ធិមនុស្សលោក Volker Türk បានផ្តល់ការវាយតម្លៃដ៏ក្រៀមក្រំមួយអំពីស្ថានភាពនៅក្នុងប្រទេសកូរ៉េខាងជើងកាលពីថ្ងៃទី ១២ ខែមិថុនាកន្លងទៅនេះ ក្នុងពេលមួយទសវត្សរ៍ក្រោយមកបន្ទាប់ពីរបាយការណ៍ដ៏ស៊ីជម្រៅមួយបានបង្ហាញអំពីការរំលោភបំពានដ៏ធ្ងន់ធ្ងរនិងរីករាលដាលនៅក្នុងប្រទេសនោះ។
លោក Türk បានបញ្ជាក់ក្នុងសន្និសីទពិសេសមួយរបស់ក្រុមប្រឹក្សាសន្តិសុខអង្គការសហប្រជាជាតិដែលឯកអគ្គរដ្ឋទូតកូរ៉េខាងជើងមិនបានចូលរួមយ៉ាងដូច្នេះថា៖ «សព្វថ្ងៃនេះ សាធារណរដ្ឋប្រជាមានិតប្រជាធិបតេយ្យកូរ៉េគឺជាប្រទេសមួយដែលបិទជិតពីពិភពលោក ជាប្រទេសដែលមានបរិយាកាសថប់ណែនបិទជិតពោរពេញដោយការភិតភ័យ ដែលជីវិតរស់នៅប្រកបដោយការលំបាកវេទនាគ្មានក្ដីសង្ឃឹម»។
លោកTürk បានបង្ហាញការព្រួយបារម្ភអំពីការគ្រប់គ្រងដ៏តឹងរ៉ឹងរបស់របបដឹកនាំកូរ៉េខាងជើងលើការធ្វើដំណើររបស់ប្រជាពលរដ្ឋ ដែលក្នុងនោះរួមទាំងលទ្ធភាពក្នុងការចាកចេញពីប្រទេសនេះផងដែរ។ ពលរដ្ឋកូរ៉េខាងជើងភាគច្រើនមិនអាចសុំការអនុញ្ញាតពីរដ្ឋាភិបាលដើម្បីចាកចេញពីប្រទេសនោះទេ ហើយអ្នកដែលប៉ុនប៉ងគេចខ្លួនចេញពីប្រទេសប្រឈមនឹងការធ្វើទារុណកម្ម ការឃុំខ្លួននៅជំរំការងារ ឬប្រឈមនឹងសេចក្តីស្លាប់បើពួកគេបរាជ័យ។
លោកបានថ្លែងតាមវីដេអូពីការិយាល័យរបស់លោកនៅទីក្រុងហ្សឺណែវនៃប្រទេសស្វីសថា៖ «ការចាកចេញពីប្រទេសរបស់ខ្លួនមិនមែនជាបទឧក្រិដ្ឋនោះទេ។ ផ្ទុយទៅវិញ វាគឺជាសិទ្ធិមនុស្សដែលទទួលស្គាល់ដោយច្បាប់អន្តរជាតិ»។
លោកបានថ្លែងថា ការគាបសង្កត់សេរីភាពក្នុងការបញ្ចេញមតិគឺមានសភាពកាន់តែអាក្រក់ឡើងដោយរដ្ឋាភិបាលកូរ៉េខាងជើងបានពង្រឹងច្បាប់ហាមប្រាមពលរដ្ឋមិនឱ្យប្រើប្រាស់ប្រព័ន្ធផ្សព្វផ្សាយឬវប្បធម៌បរទេស ដូចជារឿងភាគកូរ៉េខាងត្បូងឬតន្រ្តី K-pop របស់កូរ៉េខាងត្បូងជាដើម។
ប្រធានផ្នែកសិទ្ធិមនុស្សរូបនេះបានថ្លែងថា៖ «និយាយឱ្យសាមញ្ញទៅ ពលរដ្ឋនៅសាធារណរដ្ឋប្រជាមានិតប្រជាធិបតេយ្យកូរ៉េប្រឈមនឹងហានិភ័យនៃការស្លាប់ដោយគ្រាន់តែមើលឬចែកផ្សាយរឿងភាគបរទេស»។
លោកបានជំរុញរដ្ឋាភិបាលកូរ៉េខាងជើងឱ្យបញ្ឈប់ការប្រើប្រាស់ទោសប្រហារជីវិតក្នុងប្រព័ន្ធច្បាប់របស់ប្រទេស ហើយឆ្ពោះទៅរកការលុបបំបាត់ទោសនេះទាំងស្រុង។
អ្វីដែលប្រហែលកាន់តែគួរឱ្យព្រួយបារម្ភជាងនេះទៅទៀតនោះគឺស្ថានភាពសន្តិសុខស្បៀងអាហារនៅកូរ៉េខាងជើង។
លោក Türk បានថ្លែងថា៖ «មនុស្សគ្រប់រូបដែលការិយាល័យរបស់ខ្ញុំបានសម្ភាសន៍បានលើកឡើងអំពីរឿងនេះស្រដៀងគ្នាថា មនុស្សគឺងាយក្លាយទៅជាទន់ខ្សោយ ល្ហិតល្ហៃ រីងរៃ ដោយសារគ្មានអ្វីបរិភោគ»។
កម្មវិធីស្បៀងអាហារពិភពលោក (WFP) របស់អង្គការសហប្រជាជាតិបានបញ្ជាក់ថា ពលរដ្ឋកូរ៉េខាងជើងជាង ៤០% ដែលស្មើនឹងជិត ១១ លាននាក់ខ្វះអាហារូបត្ថម្ភ។ មនុស្សជាច្រើនរងគ្រោះដោយសារការខ្វះអាហារូបត្ថម្ភធ្ងន់ធ្ងរ ដោយសារការខ្វះជីវជាតិសំខាន់ៗ ជាពិសេសអ្នកដែលរស់នៅក្រៅទីក្រុងធំៗ។ កុមារគឺរងផលប៉ះពាល់ជាងគេ ដោយ ១៨% មានសភាពក្រិនដោយសារកង្វះអាហារូបត្ថម្ភធ្ងន់ធ្ងរ។
ឧត្តមស្នងការអង្គការសហប្រជាជាតិរូបនេះក៏បានបង្ហាញការព្រួយបារម្ភអំពីការប្រើប្រាស់របស់រដ្ឋាភិបាលកូរ៉េខាងជើងនូវពលកម្មដោយបង្ខំដែលរួមមានទាំងនៅបរទេសផងដែរ។ លោកបានកត់សម្គាល់ថា ពលករដែលពួកគេបានសម្ភាសន៍បានរៀបរាប់អំពីស្ថានការធ្វើការងារដែលមានគ្រោះថ្នាក់ចំពោះរូបរាងកាយ ហើយពួកគេត្រូវស៊ូទ្រាំនឹងការឃ្លាំមើលកម្រិតខ្ពស់ហួសប្រមាណ៕
ប្រែសម្រួលដោយអ្នកនាង ស្រេង លក្ខិណា
វេទិកាបញ្ចេញមតិ