មន្រ្តីជាន់ខ្ពស់ទទួលបន្ទុកផ្នែកសិទ្ធិមនុស្សនៃអង្គការសហប្រជាជាតិ និងអង្គការក្នុងស្រុកមួយចំនួនបានចាត់ទុកថា ការដកអាជ្ញាបណ្ណសារព័ត៌មានវីអូឌីមិនបានអនុលោមទៅតាមច្បាប់ស្តីពីរបបសារព័ត៌មាន និងចាត់ទុកការកំណត់ឱសានវាទរបស់លោកនាយករដ្ឋមន្ត្រីហ៊ុន សែនជាការគំរាមកំហែងធ្ងន់ធ្ងរមួយ។ នេះបើតាមសេចក្តីថ្លែងការណ៍របស់ពួកគេ។
នៅក្នុងសេចក្តីថ្លែងការណ៍មួយ កាលពីថ្ងៃចន្ទ លោក Volker Türk ឧត្តមស្នងការទទួលបន្ទុកបញ្ហាសិទ្ធិមនុស្សនៃអង្គការសហប្រជាជាតិថ្លែងថា លោកមានការភ្ញាក់ផ្អើល និងព្រួយបារម្ភចំពោះការដកអាជ្ញាបណ្ណវីអូឌី។
លោកបញ្ជាក់ថា៖ «ខ្ញុំមានការព្រួយបារម្ភថា សេចក្តីសម្រេចនេះហាក់ដូចជាការសម្រេចចិត្តដោយបំពាន ដោយសារតែការសម្រេចចិត្តនេះមិនត្រូវបានធ្វើឡើងដោយហ្មត់ចត់ និងតម្លាភាព ដូចមានចែងក្នុងច្បាប់ស្តីពីរបបសារព័ត៌មានរបស់ប្រទេសកម្ពុជា ហើយខកខានក្នុងការបំពេញនូវលក្ខខណ្ឌភាពស្របច្បាប់ ភាពចាំបាច់ និងសមាមាត្រដែលតម្រូវដោយច្បាប់សិទ្ធិមនុស្សអន្តរជាតិ ចំពោះការរឹតបន្តឹងនានាមកលើសេរីភាពនៃការបញ្ចេញមតិ»។
លោកបានអំពាវនាវឱ្យរដ្ឋាភិបាលកម្ពុជាលុបចោលនូវសេចក្តីសម្រេចនេះដើម្បីការពារសិទ្ធិពលរដ្ឋ និងសិទ្ធិនយោបាយសម្រាប់បុគ្គលទាំងអស់គ្នា និងធានាឱ្យមានបរិយាកាសអំណោយផលសម្រាប់សង្គមស៊ីវិល រួមទាំងប្រព័ន្ធផ្សព្វផ្សាយឯករាជ្យផងដែរ។
លោក ណុប វី នាយកប្រតិបត្តិសមាគមសម្ព័ន្ធអ្នកសារព័ត៌មានកម្ពុជា ហៅកាត់ថា ខេមបូចា ថ្លែងថា ការដកអាជ្ញាបណ្ណនេះបង្ហាញថា សេរីសារព័ត៌មាននៅកម្ពុជាបន្តធ្លាក់ចុះ។ លោកស្នើទៅក្រសួងព័ត៌មាននិងរដ្ឋាភិបាលអនុវត្តច្បាប់ស្តីពីរបបសារព័ត៌មានឱ្យបានត្រឹមត្រូវ មុននឹងការដកអាជ្ញាបណ្ណ។
លោកថ្លែងថា៖ «តាមច្បាប់ស្តីពីរបបសារព័ត៌មានគឺថា សម្តេច[នាយករដ្ឋមន្រ្តី]ក៏គួរតែផ្តល់ពេលវេលាឱ្យទៅតាមខ្លឹមសារនៃច្បាប់ដែរ ព្រោះយ៉ាងហោចណាស់ក៏យើងមានពេល១សប្តាហ៍ ក្នុងការកែតម្រូវ មុនពេលដែលមានការប្តឹងផ្តល់ ឬក៏មានការសម្រចឈានទៅដកអាជ្ញាបណ្ណ។ នេះជាចំណុចមួយសំខាន់ណាស់ ហើយយើងទទូចស្នើសុំឱ្យរាជរដ្ឋាភិបាលធ្វើយ៉ាងណាពិនិត្យ និងអនុវត្តច្បាប់ស្តីពីរបបសារព័ត៌មានដែលយើងមានជាធរមានហ្នឹង ដើម្បីផ្តល់នូវការគាំពារ ក៏ដូចគាំទ្រចំពោះការអនុវត្តការងាររបស់អ្នកសារព័ត៌មាន»។
លោកបន្ថែមថា៖ «ជាធម្មតាលក្ខណៈដែលជាការប្រកបវិជ្ជាជីវៈ អ្នកសារព័ត៌មានដែលមានវិជ្ជាជីវៈខ្ពស់ គេត្រូវតែមានការកែតម្រូវហើយប្រសិនបើអត្ថបទហ្នឹងមានការខុសឆ្គង។ ហើយយើងក៏បានឃើញដែរថា វីអូឌីក៏បានបន្ថែមនៅក្នុងការកែតម្រូវរបស់ខ្លួនដែរ ដោយសារតែយើងឃើញថា យើងមានចំណុចខ្វះខាតតិចតួចនៅក្នុងអត្ថបទហ្នឹង ប៉ុន្តែសម្រាប់ខ្ញុំការខ្វះខាតតិចតួចនេះក៏វាមិនឈានទៅដល់ការដកអាជ្ញាបណ្ណហ្នឹងដែរ»។
កាលពីថ្ងៃចន្ទ ក្រសួងព័ត៌មានបានចេញសេចក្តីសម្រេចមួយ ដោយលុបចោលអាជ្ញាបណ្ណរបស់វីអូឌី តាមបញ្ជារបស់លោកនាយករដ្ឋមន្រ្តីហ៊ុន សែន ពាក់ព័ន្ធនឹងការផ្សាយអត្ថបទថា លោកហ៊ុន ម៉ាណែតចុះហត្ថលេខាផ្តល់ជំនួយ ១០០.០០០ ដុល្លារដល់ប្រទេសតួកគី ក្នុងគ្រោះរញ្ជួយដី។ លោកហ៊ុន សែនបានទាមទារឱ្យស្ថាប័នមួយនេះសុំទោសជាសាធារណៈ។
ក្រសួងព័ត៌មានបានបញ្ជាក់ថា វីអូឌី«រំលោភយ៉ាងធ្ងន់ធ្ងរលើវិជ្ជាជីវៈសារព័ត៌មានធ្វើឱ្យប៉ះពាល់ដល់កិត្តិយស និងកិត្យានុភាពរបស់រាជរដ្ឋាភិបាលកម្ពុជា ហើយមិនព្រមធ្វើការកែសម្រួលតាមបទប្បញ្ញត្តិច្បាប់ស្តីពីរបបសារព័ត៌មាន»។
នៅក្នុងសេចក្តីថ្លែងការណ៍រួម ចុះថ្ងៃទី១៣ ខែកុម្ភៈ អង្គការសមាគមចំនួន៩៣ស្ថាប័នបានប្រតិកម្មនឹងការដកអាជ្ញាបណ្ណនេះ។ ពួកគេបញ្ជាក់ថា៖ «ការកំណត់ឱសានវាទរបស់សម្តេចនាយករដ្ឋមន្ត្រីហ៊ុន សែនបង្ហាញពីការគំរាមកំហែងធ្ងន់ធ្ងរដល់ស្ថាប័ន និងអ្នកសារព័ត៌មានឯករាជ្យទាំងអស់នៅកម្ពុជា។ កម្ពុជាមានច្បាប់ដែលមានស្រាប់សម្រាប់ដោះស្រាយចំពោះការសម្រង់សម្តី ឬអង្គហេតុមិនត្រឹមត្រូវ នៅក្នុងការរាយការណ៍ព័ត៌មានមួយ»។
ពួកគេបានលើកយកមាត្រា១០នៃច្បាប់ស្តីពីរបបសារព័ត៌មាននៅកម្ពុជា ដែលចែងថា មនុស្សមានសិទ្ធិទាមទារឱ្យមានការកែតម្រូវ និងការឆ្លើយតបពីអ្នកផ្សាយព័ត៌មាននៅពេលដែលពួកគេយល់ថា សេចក្តីថ្លែងការណ៍មួយមិនត្រឹមត្រូវ ហើយអ្នកផ្សាយព័ត៌មានត្រូវឆ្លើយតបក្នុងរយៈពេល៧ថ្ងៃ។ ពួកគេក៏មានសិទ្ធិផងដែរក្នុងការប្តឹងទៅតុលាការពីបទបរិហារកេរ្តិ៍ និងបទមួលបង្កាច់។
លោក ប៉ែន បូណា រដ្ឋលេខាធិការក្រសួងព័ត៌មាន ប្រាប់វីអូអេថា ការដកអាជ្ញាបណ្ណនេះ ដោយសារអត្ថបទរបស់សារព័ត៌មានមួយនេះប៉ះពាល់ស្ថិរភាពនយោបាយធ្ងន់ធ្ងរ ហើយវីអូឌីមិនបានកែតម្រូវអត្ថបទរបស់ខ្លួនភ្លាមៗ។
លោកបញ្ជាក់ថា៖ «រាជរដ្ឋាភិបាលចាត់ទុកថា ជាការប៉ះពាល់យ៉ាងធ្ងន់ធ្ងរដល់ស្ថិរភាពនយោបាយ ស្ថិរភាពរបស់ប្រទេសក្នុងការដឹកនាំរបស់រដ្ឋាភិបាល។ អ៊ីចឹងបានទាមទារឱ្យវីអូឌីកែតម្រូវព័ត៌មានហ្នឹង ព្រោះ ជាព័ត៌មានមួយដែលខុសទាំងស្រុង ប្រឌិតទម្លាក់កំហុសទៅលើអ្នកដទៃ ដែលប៉ះពាល់ទៅដល់បុគ្គលសាធារណៈ ហើយនឹងប៉ះពាល់ទៅដល់ប្រព័ន្ធដឹកនាំរដ្ឋទាំងមូល»។
កាលពីថ្ងៃសៅរ៍សប្តាហ៍មុន នៅពេលដែលលោកនាយករដ្ឋមន្រ្តី ហ៊ុន សែន ប្រតិកម្ម និងទាមទារឱ្យវីអូឌីសុំទោសជាសាធារណៈ លោកបានលើកឡើងថា «មិត្តភក្តិបរទេសឬសង្គមស៊ីវិល មុនបញ្ចេញមតិ សូមស្រាវជ្រាវរឿងនេះជាមុនសិនទាំងអង្គហេតុ និងអង្គច្បាប់»។
អ្នកនាំពាក្យសមាគមសិទ្ធិមនុស្សអាដហុក លោកស៊ឹង សែនករុណាយល់ថា នៅពេលការដកអាជ្ញាបណ្ណសារព័ត៌មានមិនធ្វើឡើងតាមយន្តការតុលាការ តែបែរជាធ្វើតាមការសម្រេចចិត្ត តាមរយៈស្ថាប័នរដ្ឋាភិបាលវិញនោះ គឺជាគ្រោះថ្នាក់ និងហានិភ័យខ្ពស់ណាស់ចំពោះអ្នកបំពេញការងារវិជ្ជាជីវៈសារព័ត៌មាន។ ដូច្នេះលោកថា ត្រូវតែមានការបែងចែងអំណាចនីតិបញ្ញត្តិ នីតិប្រតិបត្តិ និងតុលាការឱ្យដាច់ពីគ្នា ហើយតុលាការត្រូវតែឈរលើភាពត្រឹមត្រូវ ផ្តល់យុត្តិធម៌ កុំលម្អៀងលើនិន្នាការនយោបាយណាមួយ។
លោកថ្លែងថា៖ «ប្រព័ន្ធប្រជាធិបតេយ្យអត់អាចចៀសផុតអំពីការរិះគន់ទេ អ៊ីចឹងបើផ្តល់សិទ្ធិអំណាចឱ្យទៅរដ្ឋាភិបាល ឬស្ថាប័នរដ្ឋាភិបាលជាអ្នកសម្រេចដោយលុបបំបាត់នូវអំណាចរបស់តុលាការ អាហ្នឹងគឺជាគ្រោះថ្នាក់ និងហានិភ័យខ្ពស់ណាស់ ចំពោះអ្នកបំពេញការងារជាវិជ្ជាជីវៈសារព័ត៌មាន»។
លោក ប៉ា ចន្ទរឿន ប្រធានវិទ្យាស្ថានប្រជាធិបតេយ្យកម្ពុជា កត់សម្គាល់ថា កំហុសឆ្គងរបស់សារព័ត៌មានវីអូឌីគឺមិនមានអ្វីខុសគ្នាទៅនឹងការខុសឆ្គងរបស់កាសែត The Guardian របស់អង់គ្លេស ដែលបានផ្សាយព័ត៌មានយល់ច្រឡំអំពីរដ្ឋាភិបាលកម្ពុជា កាលពីឆ្នាំ២០២១នោះទេ ហើយពេលនោះកាសែត The Guardian បានកែតម្រូវ និងប្រើពាក្យ Apology ក្នុងការសុំទោសរដ្ឋាភិបាលកម្ពុជា ដែលកម្ពុជាទទួលយក និងមិនយកទោសពៃរ៍អ្វីនោះទេ។
ដោយឡែក លោកថា ការអនុវត្តច្បាប់ស្តីពីរបបសារព័ត៌មាននេះនៅមានការខ្វះខាតច្រើន ដែលលោកលើកជាឧទាហរណ៍ថា ការដកអាជ្ញាបណ្ណវីអូឌីនេះគឺមិនបានអនុលោមតាមច្បាប់សារព័ត៌មានឆ្នាំ១៩៩៥ ដែលបានជះឥទ្ធិពលដល់ប្រព័ន្ធនីតិរដ្ឋ និងការអនុវត្តការងារសារព័ត៌មាននៅកម្ពុជា។
លោកបន្ថែមថា ការផ្សាយព័ត៌មានតែងតែមានត្រជាក់ មានក្តៅ និងរសើប ដូច្នេះរដ្ឋាភិបាលត្រូវតែមានការអត់ឱនឱ្យបានខ្ពស់៕
