ការិយាល័យសិទ្ធិមនុស្សអង្គការសហប្រជាជាតិ បាននិយាយថាការធ្វើឲ្យខូចខាតដល់ប្រាសាទបុរាណ កាលពីថ្ងៃទី២១ ខែមិថុនា គឺជាសោកនាដកម្មថ្មីបំផុត នៅក្នុងបញ្ជីភាពយង់ឃ្នង ប្រព្រឹត្តដោយពួកយោធារដ្ឋឥស្លាម។ ក្រុមសកម្មប្រយុទ្ធនេះ ត្រូវទទួលខុសត្រូវចំពោះការបំផ្លាញទ្រង់ទ្រាយធំទៅលើតំបន់សាសនា រួមមានវិហារគ្រិស្ត វិហារឥស្លាម ចេតិយ ផ្នូរ កន្លែងបញ្ចុះសព នៅក្នុងប្រទេសអ៊ីរ៉ាក់ និងស៊ីរី។
លោកស្រី Ravina Shamdasani ជាមន្ត្រីនាំពាក្យផ្នែកសិទ្ធិមនុស្ស បានហៅការបំផ្លាញដោយចេតនាទៅលើវិហារ អាល់ នូរី ថាជាការវាយប្រហារលើសាសនា និងបេតិកភណ្ឌវប្បធម៌របស់ប្រជាជនអ៊ីរ៉ាក់ និងពិភពលោក។
លោកស្រី Shamdasani បាននិយាយថា៖ «ច្បាប់មនុស្សធម៌អន្តរជាតិ ហាមឃាត់យ៉ាងច្បាស់ចំពោះការវាយប្រហារបែបនេះ ហើយអ្នកប្រព្រឹត្តបទឧក្រិដ្ឋដែលបំផ្លាញវត្ថុទាំងនេះ ទាំងបានដឹងអំពីលក្ខណៈប្រវត្តិសាស្ត្រ និងសាសនារបស់វត្ថុទាំងនោះ នឹងត្រូវជាប់ទោសពីបទឧក្រិដ្ឋសង្គ្រាម ដូចនៅក្នុងករណីរឿងក្ដីទីក្រុង Timbuktu កំពុងចាប់ផ្ដើមដំណើរការនៅតុលាការព្រហ្មទណ្ឌអន្តរជាតិ»។
កាលពីខែកក្កដា ឆ្នាំ២០១២ ក្រុមឧទ្ទាមឥស្លាម ជាសម្ព័ន្ធជាមួយនឹងបណ្ដាញអាល់ កៃដា នៅភាគខាងជើងប្រទេសម៉ាលី បានបំផ្លាញវិហារសតវត្សទី១៥មួយ នៅក្នុងទីក្រុង Timbuktu។
លោកស្រី Shamdasani បានឲ្យប្រាប់ VOA ថា គេជឿថាពួករដ្ឋឥស្លាម IS ឬហៅថា ISIL បានធ្វើឲ្យផ្ទុះបំផ្លាញវិហារនោះ ដើម្បីការពារមិនឲ្យកងសន្តិសុខអ៊ីរ៉ាក់ចូលមកជិត។
លោកស្រីបានឲ្យដឹងថា៖ «នេះគឺជាវិធីមួយ ក្នុងចំណោមកលវិធីដែលក្រុម ISIL កំពុងតែប្រើ។ ដូចអ្នកដឹងហើយ ពួកគេប្រើមនុស្សជារបាំងការពារ។ ពួកគេថែមទាំងបានដុតភ្លើងឲ្យឆេះតំបន់រ៉ែប្រេង រោងចក្រ របស់របរដែលជាសម្ភារៈបម្រើឲ្យសាធារណជនទាំងស្រុង ដើម្បីការពារកុំឲ្យកងសន្តិសុខអ៊ីរ៉ាក់ចូលទៅជិត។ តាមការដែលខ្ញុំបានដឹងពីសហការីនៅកន្លែងកើតហេតុ ធ្វើឲ្យខ្ញុំយល់ថាពួករដ្ឋឥស្លាមចាប់ផ្ដើមភ័យខ្លាចកាន់តែខ្លាំងឡើង នៅពេលកងសន្តិសុខអ៊ីរ៉ាក់ចូលទៅជិតដល់ពួកគេ។ ដូច្នេះ យុទ្ធសាស្ត្ររបស់ពួកគេមានលក្ខណៈរឹតតែឃោរឃៅឡើង»។
អង្គការសហប្រជាជាតិ បានរាយការណ៍ថា ពួកសកម្មប្រយុទ្ធរដ្ឋឥស្លាម កំពុងបង្ខាំងជនស៊ីវិលប្រហែល ១០០.០០០នាក់ ទុកជាចំណាប់ខ្មាំង នៅភាគខាងកើតទីក្រុងចំណាស់ Mosul ខណៈពេលដែលកងទ័ពអ៊ីរ៉ាក់ធ្វើការវាយលុកកាន់តែខ្លាំងដើម្បីយកទីក្រុង Mosulមកវិញ។
ប្រែសម្រួលដោយ៖ សើ សាយ្យាណា
