ទូរទស្សន៍រដ្ឋអ៊ីរ៉ាក់ បានប្រាប់ឲ្យដឹងថា ភូឈួយរបស់ Abu Bark al-Baghdadi មេដឹកនាំក្រុមរដ្ឋឥស្លាមបានស្លាប់នៅក្នុងការវាយប្រហារតាមអាកាសនៅក្នុងខេត្តal-Anbar នៅជិតព្រំដែនប្រទេសស៊ីរី។
របាយការណ៍កាលពីថ្ងៃសៅរ៍ម្សិលមិញបានប្រាប់ឲ្យដឹងថា Ayad al-Jumaili ហើយនឹងមេបញ្ជាការតំបន់ផ្សេងទៀតរបស់ក្រុមរដ្ឋឥស្លាមបានស្លាប់នៅក្នុងការវាយប្រហារតាមអាកាសដោយកងទ័ពអាកាសអ៊ីរ៉ាក់នៅក្នុងតំបន់ខាងលិចឆ្ងាយនៃប្រទេសអ៊ីរ៉ាក់។របាយការណ៍នោះមិនបានប្រាប់ឲ្យដឹងថាតើនៅពេលណាការវាយប្រហារនោះបានកើតមានឡើងទេហើយមិនបានផ្តល់សេចក្តីលម្អិតទេ។
មន្រ្តីនៅឯក្រុមចម្រុះប្រឆាំងក្រុមរដ្ឋឥស្លាមដែលដឹកនាំដោយសហរដ្ឋអាមេរិក មិនបានបញ្ជាក់ពីការស្លាប់របស់ពួកជ្រុលនិយមនោះកាលពីរសៀលថ្ងៃសៅរ៍ទេ។
ដោយដកស្រង់សេចក្តីថ្លែងការណ៍មកពីមន្រ្តីយោធាស៊ើបការណ៍សម្ងាត់អ៊ីរ៉ាក់ របាយ ការណ៍នោះ បានពណ៌នាថា Jumaili ដែលគេស្គាល់ថាAbu Yahyaជារដ្ឋមន្រ្តីក្រសួងសង្គ្រាមរបស់ក្រុមរដ្ឋឥស្លាម។ សេចក្តីថ្លែងការណ៍នោះបានប្រាប់ឲ្យដឹងទៀតថា «យន្តហោះរបស់កងទ័ពអាកាសបានវាយប្រហារចំទីដៅទៅលើទីស្នាក់ការរបស់ក្រុមរដ្ឋឥស្លាមនៅក្នុងទីក្រុង al-Qaim។
Jumaili ដែលកាលពីពេលមុនជាមន្រ្តីស៊ើបការណ៍សម្ងាត់នៅក្រោមសាដាមហ៊ូសេន បានចូលរួមជាមួយក្រុមបះបោរនិកាយស៊ុននីបន្ទាប់ពីការទន្ទ្រានដែលដឹកនាំដោយសហរដ្ឋអាមេរិកនៅឆ្នាំ២០០៣ ហើយពួកអ្នកវិភាគនិយាយថា ចាប់តាំងពីនោះមក ជននោះបានទាក់ទងដោយផ្ទាល់ទៅ Baghdadiដែលជាមេដឹកនាំរបស់ក្រុមរដ្ឋឥស្លាម។
មន្រ្តីស៊ើបការណ៍សម្ងាត់សហរដ្ឋអាមេរិកនិងអ៊ីរ៉ាក់បាននិយាយថា ពួកគេជឿជាក់ថា Baghdadi បានរើទីតាំងកិច្ចប្រតិបត្តិការរបស់ខ្លួនប្រហែល៣០០គីឡូម៉ែត្រទៅតំបន់ភាគឦសាន្ត ហើយបច្ចុប្បន្ននេះកំពុងលាក់ខ្លួននៅវាលខ្សាច់ខាងក្រៅទីក្រុង Mosul ដែលមានការប្រយុទ្ធគ្នា៕
