ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ប្រធាន​អង្គការ​សហប្រជាជាតិ​ព្រមាន​ពី​គ្រោះ​ទុរភិក្ស​និង​ជំរុញ​ឱ្យ​រុស្ស៊ី​បញ្ចេញ​គ្រាប់​ធញ្ញជាតិ​របស់​អ៊ុយក្រែន


រូបឯកសារ៖ អគ្គលេខាធិការ​អង្គការ​សហប្រជាជាតិ លោក Antonio Guterres ចូលរួម​ក្នុង​សន្និសីទ​សារព័ត៌មានរួម​គ្នា​​មួយ​ជាមួយ​ប្រធានាធិបតីប្រទេស​អូទ្រីស លោក ​Alexander Van der Bellen ក្នុង​ទីក្រុងវីយែន ប្រទេស​អូទ្រីស ថ្ងៃទី ១១ ខែឧសភា ឆ្នាំ២០២២។ (AP Photo/Theresa Wey)
រូបឯកសារ៖ អគ្គលេខាធិការ​អង្គការ​សហប្រជាជាតិ លោក Antonio Guterres ចូលរួម​ក្នុង​សន្និសីទ​សារព័ត៌មានរួម​គ្នា​​មួយ​ជាមួយ​ប្រធានាធិបតីប្រទេស​អូទ្រីស លោក ​Alexander Van der Bellen ក្នុង​ទីក្រុងវីយែន ប្រទេស​អូទ្រីស ថ្ងៃទី ១១ ខែឧសភា ឆ្នាំ២០២២។ (AP Photo/Theresa Wey)

អគ្គលេខាធិការ​អង្គការ​សហប្រជាជាតិលោក Antonio Guterres បាន​ព្រមាននៅ​ថ្ងៃ​ពុធ​ម្សិល មិញ​ពីភាព​អត់ឃ្លាន​និង​គ្រោះ​ទុរភិក្ស​ដ៏​ធំ​មួយ​ដែល​អាច​កើត​មាន​ជា​ច្រើន​ឆ្នាំ ប្រសិន​បើវិបត្តិ​ស្បៀង​អាហារ​សាកល​នៅ​តែ​បន្តកើន​ឡើង​ដោយ​គ្មាន​ការត្រួតពិនិត្យ​ហើយ​លោក​ក៏​បាន​ជំ រុញឱ្យ​ប្រទេស​រុស្ស៊ី​ ដោះ​លែងនូវ​គ្រាប់​ធញ្ញជាតិ​របស់​អ៊ុយក្រែន​ដែល​ខ្លួន​បាន​រាំង​ខ្ទប់​នោះ។ នេះ​បើ​តាម​សេចក្តីរាយការណ៍​របស់​ទីភ្នាក់ងារ​ព័ត៌មាន AFP។

ថ្លែងនៅ​ក្នុង​កិច្ចប្រជុំ​កំពូលសំខាន់មួយ​របស់​អង្គការ​សហប្រជាជាតិក្នុង​បុរីញូយ៉ក លោក Guterres បាន​ប្រសាសន៍​ថា សង្គ្រាម​នៅ​ក្នុង​ប្រទេស​អ៊ុយក្រែន​បាន​ធ្វើ​ឱ្យ​មាន​អសន្តិសុខ​ស្បៀង​អាហារសាកលលោក​ដែល​បាន​ទទួល​រង​ផល​ប៉ះពាល់​រួចទៅ​ហើយ​ដោយសារ​ការ កើន​ឡើង​កំដៅ​និងជំងឺ​រាតត្បាត​កូវីដ១៩។

លោក Guterres បាន​ថ្លែង​ទៀត​ថា គ្រាន់តែ​ក្នុង​រយៈពេល២ឆ្នាំ​ប៉ុណ្ណោះ ចំនួនមនុស្សដែល​ជួប​នឹង​កង្វះ​ខាត​ស្បៀង​អាហារដ៏​ធ្ងន់ធ្ងរ​បាន​កើនឡើង​ទ្វេដង​ពី​ចំនួន១៣៥លាន​នាក់​កាលពី​មុន​រាតត្បាត​ជំងឺ​កូវីដ១៩ទៅដល់​រហូត២៧៦លាននាក់ នាពេល​បច្ចុប្បន្ន។

លោក​បាន​បន្ថែម​ទៀតថា​ មនុស្សប្រមាណ​ជាង​កន្លះ​លាន​នាក់​ កំពុង​រស់នៅ​ក្នុង​ស្ថាន​ភាព​នៃ​គ្រោះ​ទុរភិក្ស ដែល​ចំនួន​នេះ​បាន​កើន​ឡើង​ប្រមាណ​៥០០​ភាគរយ​ ចាប់​តាំង​ពី​ឆ្នាំ​២០១៦​មក។

មុនពេល​រុស្ស៊ី​ចូល​ឈ្លានពាន​អ៊ុយក្រែន​កាល​ពី​ខែ​កុម្ភៈ​កន្លង​ទៅ អ៊ុយក្រែន​ត្រូវ​បាន​គេ​មើល​ឃើញ​ថា​ ជា​ប្រទេសដែល​ផ្តល់​ធនធាន​សម្រាប់​ផលិត​នំប័ង​របស់​ពិភពលោកដោយ​នាំចេញផលិតផល​កសិកម្ម​ប្រមាណ៤,៥លាន​តោនក្នុង​មួយ​ឆ្នាំៗតាម​រយៈកំពង់​ផែ​របស់​ខ្លួន​ដែលក្នុង​នោះ​មាន​ស្រូវ​សាឡីប្រមាណ១២ភាគរយ ពោត​ប្រមាណ១៥ភាគរយ​និង​ពាក់កណ្តាល​ជា​ប្រេង​ឆាសម្រាប់​ទីផ្សារ​ពិភពលោក។

ក៏ប៉ុន្តែ​ដោយសារ​កំពង់ផែ Odessa កំពង់​ផែ Chornomorsk និង​កំពង់​ផែ​មួយ​ចំនួន​ទៀត​ក្នុង​ប្រទេស​អ៊ុយក្រែន​ត្រូវ​បាន​កាត់ផ្តាច់ដោយសារ​នាវា​ចម្បាំង​របស់​រុស្ស៊ី ការ​ផ្គត់​ផ្គងផលិតផល​ទាំង​នេះត្រូវ​បាន​ធ្វើ​ឡើង​តែ​តាម​ផ្លូវ​គោកតែ​ប៉ុណ្ណោះ​ដែល​មិន​សូវ​មាន​ប្រសិទ្ធភាព។

លោក Guterres បានអំពាវនាវដល់​រុស្ស៊ី​ឱ្យ​បើក​ច្រកកំពង់ផែ​ដើម្បី​អនុញ្ញាត​ឱ្យ​អ៊ុយក្រែន​នាំ ចេញ​ទំនិញ​ទាំងនោះ​តាមផ្លូវ​ទឹក​របស់​ខ្លួន៕

XS
SM
MD
LG