អគ្គលេខាធិការអង្គការសហប្រជាជាតិ លោក Antonio Guterres កាលពីនៅថ្ងៃសុក្រ បានជំរុញឱ្យមានការអត់ធ្មត់ជាអតិបរិមានៅតំបន់មជ្ឈិមបូព៌ា បន្ទាប់ពីការវាយប្រហារដោយយន្តហោះគ្មានមនុស្សបើករបស់ស.រ.អា.នៅជិតអាកាសយានដ្ឋានក្រុងបាកដាដ ប្រទេសអ៊ីរ៉ាក់ ដោយបានសម្លាប់ឧត្តមសេនីយ៍ Qassem Soleimani ដែលជាមេបញ្ជាការកងកម្លាំងឆ្មាំបដិវត្តន៍អ៊ីរ៉ង់ ដ៏មានឥទ្ធិពល។
នៅក្នុងសេចក្តីថ្លែងការណ៍ខ្លីមួយ អគ្គលេខាធិការអង្គការសហប្រជាជាតិលោក Guterres បាននិយាយថា លោកព្រួយបារម្ភយ៉ាងខ្លាំងអំពីសភាពការណ៍តានតឹងដែលកើនឡើងនេះ ហើយបានព្រមានថា «ពិភពលោកមិនអាចទ្រាំទ្រសង្គ្រាមមួយទៀតនៅតំបន់ឈូងសមុទ្រពែកនោះទេ»។
នៅក្រៅក្រុមប្រឹក្សាសន្តិសុខអង្គការសហប្រជាជាតិជាកន្លែងដែលសមាជិកក្រុមប្រឹក្សានេះធ្វើកិច្ចប្រជុំបិទទ្វារកាលពីព្រឹកថ្ងៃសុក្រស្តីពីស្ថានភាពនៅក្នុងប្រទេសស៊ីរីនោះ ក្រុមអ្នកការទូតបាននិយាយបន្ទរការអំពាវនាវរបស់លោកអគ្គលេខាធិការអង្គការសហប្រជាជាតិ។
ឯកអគ្គរដ្ឋទូតបារាំង លោក Nicolas De Riviere មានប្រសាសន៍ថា «យើងអំពាវនាវកុំឱ្យមានការតានតឹងបន្ថែមទៀត។ នេះជាអ្វីដែលយើងត្រូវការឥឡូវនេះ។ យើងត្រូវបន្ថយការតានតឹង។ យើងត្រូវការស្ថិរភាពនៅក្នុងតំបន់ ហើយយើងពិតជាលើកទឹកចិត្តឱ្យគ្រប់គ្នាបន្ថយការតានតឹង»៕
