អ.ស.ប.បានថ្កោលទោសការបំផ្ទុះគ្រាប់បែកអត្តឃាតកាលពីថ្ងៃសៅរ៍នៅក្នុងប៉ែកខាងកើតនៃប្រទេស Afghanistan ដោយហៅការវាយប្រហារនេះថា ជា «អំពើព្រៃផ្សៃ»។
សេចក្តីថ្លែងការណ៍មួយចេញផ្សាយកាលពីថ្ងៃសៅរ៍ដោយអ្នកនាំពាក្យរបស់លោកអគ្គលេខាធិការអ.ស.ប. បាន គីមូន បានអំពាវនាវឲ្យយកពួកជនទទួលខុសត្រូវដល់ការវាយប្រហារនេះទៅឲ្យតុលាការកាត់ទោស ហើយបានសុំដល់ប្រជារាស្ត្រអាហ្វហ្គានីស្ថាន ឲ្យច្រានចោលភេរវកម្ម និងភាពជ្រុលនិយមប្រកបដោយហិង្សា។
កាលពីថ្ងៃសៅរ៍ដែរ លោកប្រធានាធិបតីអាហ្វហ្គានីស្ថាន Ashraf Ghani បាននិយាយថា ពួករដ្ឋអ៊ីស្លាមបានអះអាងទាមទារការទទួលខុសត្រូវដល់ការបំផ្ទុះគ្រាប់បែកក្នុងក្រុង Jalalabad ដែលបានបណ្តាលឲ្យមនុស្សយ៉ាងតិចណាស់៣៥នាក់ស្លាប់ និងធ្វើឱ្យមនុស្សជាង១០០នាក់ទៀតត្រូវរបួស។
នៅក្នុងសេចក្តីប្រកាសរបស់លោក លោក Ghani បានហៅឧប្បត្តិហេតុនេះថាជា ការគួរឲ្យរន្ធត់។
កាលពីពេលមុននោះពួកតាលីបង់បានបដិសេធការទទួលខុសត្រូវដល់ការបំផ្ទុះគ្រាប់បែកនោះដោយបានហៅការវាយប្រហារនោះថាជា «សកម្មភាពអាក្រក់គ្មានសីលធម៌» មួយ។
អ្នកធ្វើការវាយប្រហារនោះបានបំផ្ទុះគ្រាប់បែកនៅខាងក្រៅធនាគារមួយដែលនៅទីនោះក្រុមបុគ្គលិករដ្ឋាភិបាលបានប្រមូលផ្តុំគ្នាដើម្បីបើកប្រាក់បៀវត្សរ៍ពួកគេ៕
