ប្រាំខែក្រោយពីប្រទេសចំនួន៧៦បានផ្តល់អនុសាសន៍ដល់ប្រទេសកម្ពុជាឲ្យជំរុញការធ្វើឲ្យប្រសើរឡើងផ្នែកសិទ្ធិមនុស្ស នៅថ្ងៃនេះអង្គការសហប្រជាជាតិនិងរដ្ឋាភិបាលកម្ពុជាបានរៀបចំសិក្ខាសាលារួមគ្នាដើម្បីផ្សព្វផ្សាយអនុសាសន៍ទាំងនេះ។
អាជ្ញាធរកម្ពុជានិងអង្គការសហប្រជាជាតិបានផ្សព្វផ្សាយជាផ្លូវការនូវអនុសាសាន៍របស់បណ្តាប្រទេសសមាជិកអង្គការសហប្រជាជាតិស្តីពីការគោរពសិទ្ធិមនុស្សនៅកម្ពុជានៅថ្ងៃពុធនេះដោយមានការលើកឡើងពីការរីកចម្រើនមួយចំនួន។
នៅក្នុងកិច្ចប្រជុំរបស់ក្រុមប្រឹក្សាសិទ្ធិមនុស្សរបស់អង្គការសហប្រជាជាតិកាលពីខែមិថុនាឆ្នាំ២០១៤នៅទីក្រុងហ្សឺណែវប្រទេសស៊្វីស ប្រទេសចំនួន៧៦បានផ្តល់អនុសាសន៍ស្តីពីការពង្រឹងការលើកតម្កើងការគោរពសិទ្ធិមនុស្សនៅកម្ពុជារហូតដល់ចំនួន២០៥ចំណុច។ ក្នុងនោះ កម្ពុជាទទួលយកអនុសាសន៍ចំនួន១៦៣និងកត់ទុកសម្រាប់ពិចារណាចំនួន៣៨។ ហើយកម្ពុជាបានទាត់ចោលនូវអនុសាសន៍ចំនួន៤។
អនុសាសន៍ដែលកម្ពុជាទាត់ចោលនោះជាប់ទាក់ទងទៅនឹងការការពារសេរីភាពសារព័ត៌មាន ការធានាសិទ្ធិទទួលបានការអប់រំសម្រាប់កុមារទាំងអស់ដោយរាប់បញ្ចូលទាំងកុមារដែលមានដើមកំណើតវៀតណាមផងដែរ។ ក្រៅពីនោះអនុសាសន៍ទាក់ទងនឹងការប្រឆាំងនឹងការរើសអើងចំពោះកុមារដែលងាយរងគ្រោះនិងអនុសាសន៍ឲ្យដោះស្រាយឡើងវិញអត្រាបោះបង់ចោលសាលារៀនក៏ត្រូវប្រទេសកម្ពុជាទាត់ចោលដែរ។
នៅក្នុងសិក្ខាសាលាថ្នាក់ជាតិស្តីពីការត្រួតពិនិត្យតាមកាលកំណត់ជាសាកល (UPR) ដែលរៀបចំដោយអង្គការសហប្រជាជាតិប្រចាំកម្ពុជានិងគណៈកម្មការសិទ្ធិមនុស្សកម្ពុជាក្នុងទីក្រុងភ្នំពេញនៅថ្ងៃនេះ លោក ម៉ក់ សម្បត្តិ ប្រធានគណៈកម្មការសិទ្ធិមនុស្សកម្ពុជាបានថ្លែងថា កិច្ចប្រជុំនៅថ្ងៃនេះដើម្បីធ្វើការបែងចែកការទទួលខុសត្រូវរបស់ស្ថាប័នរដ្ឋដែលជាប់ពាក់ព័ន្ធនឹងអនុសាសន៍ដែលកម្ពុជាទទួលយកនេះ។
«យើងទាំងអស់គ្នាមកជួបជុំនេះគឺជាថ្ងៃដំបូងបំផុតដែលយើងធ្វើការផ្សព្វផ្សាយពីអនុសាសន៍ UPR។ មានន័យថា ក្រោយពីយើងផ្សព្វផ្សាយយើងនឹងចាប់ផ្តើមធ្វើកិច្ចការហ្នឹង។ ក្រសួងណាពាក់ព័ន្ធអនុសាសន៍ណាត្រូវយកទៅពិនិត្យនិងអនុវត្តន៍បែបណា។»
ក្នុងចំណោមអនុសាសន៍ទាំង១៦៣រួមមានការតម្រូវឲ្យកម្ពុជាផ្តល់សច្ចាប័នលើសន្ធិសញ្ញានិងអនុសញ្ញាពិសេសៗមួយចំនួន ការកែទម្រង់និតិបញ្ញត្តិនិងប្រព័ន្ធយុត្តិធម៌ ការបង្កើតស្ថាប័នសិទ្ធិមនុស្សជាតិ ការលើកស្ទួយសិទ្ធិស្ត្រី សិទ្ធិរស់រានមានជីវិតនិងកំណែទម្រង់ការបោះឆ្នោត ការលើកស្ទួយសិទ្ធិកុមារ សិទ្ធិជនពិការ អនុសាសន៍ដែលពាក់ព៍ន្ធនឹងស្ថាប័នសាលាក្តីខ្មែរក្រហម សេរីភាពនៃការបញ្ចេញមតិ សិទ្ធិដីធ្លី សិទ្ធិទទួលបានការងារ ការកាត់បន្ថយភាពក្រីក្រ។ ត្រង់ចំណុចនេះដែលពាក់ព័ន្ធទៅនឹងក្រសួងផែនការ។ ក្រៅពីនោះមានអនុសាសន៍ទាក់ទងនឹងសិទ្ធិទទួលបានសេវាសុខភាព ដែលពាក់ព័ន្ធជាមួយក្រសួងសុខាភិបាល សិទ្ធិទទួលបានការអប់រំដែលពាក់ព័ន្ធនឹងក្រសួងអប់រំយុវជននិងកីឡាជាដើម។
លោក ម៉ក់ សម្បតិ្ត លើកឡើងថាអនុសាសន៍ទាំងនេះមានការលើកឡើងជាន់គ្នាដដែលៗរវាងប្រទេសនិមួយៗ ហើយអនុសាសន៍ទាំងនេះ «មានចែងនៅក្នុងផែនការនយោបាយ»របស់រដ្ឋាភិបាលរួចទៅហើយ។ ជាមួយគ្នានេះ លោកបញ្ជាក់ថា កម្ពុជាបានក្លាយជាគំរូដល់ប្រទេសដទៃក្នុងការផ្តល់សច្ចាប័នលើសន្ធិសញ្ញានិងពិធីសារមួយចំនួន ជាពិសេសពិធីសារបន្ថែមស្តីពីការប្រឆាំងការធ្វើទារុណកម្មដែលបណ្តាប្រទេសអាស៊ីនិងសហរដ្ឋអាមេរិកមិនទាន់បានផ្តល់សច្ចាប័ននៅឡើយ។
លោកស្រី គ្លែរ វ៉ាន់ឌើ វែរ៉ិន (Claire Van der Vearen) អ្នកសម្របសម្រួលរបស់អង្គការសហប្រជាជាតិប្រចាំកម្ពុជាគូសបញ្ជាក់ថា អនុសាសន៍នៃបណ្តាប្រទេសសមាជិកអង្គការសហប្រជាជាតិទាំងនេះជាទ្រនិកវាស់ស្ទង់ការគោរពសិទ្ធិមនុស្សនៅកម្ពុជា។
លោកស្រីពន្យល់ថា៖ «អនុសាសន៍ UPR បង្ហាញការខិតជិតមួយដើម្បីវាយតម្លៃការការពារសិទ្ធិមនុស្សនៅក្នុងប្រទេសនេះក៏ដូចជាវាយតម្លៃលើភាពចន្លោះប្រហោងនិងឱកាសសម្រាប់ពង្រឹងការការពារសិទ្ធិមនុស្ស។»
ដោយឡែកលោកស្រី វ៉ាន់-ហ៊ា លី (Wan-Hea Lee) តំណាងការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជាបញ្ជាក់ថា ការពិភាក្សាអំពីអនុសាសន៍ស្តីពីសិទ្ធិមនុស្សនៅថ្ងៃនេះគឺដើម្បីជំរុញឲ្យមានការចាត់វិធានការជាក់ស្តែងនៅថ្ងៃខាងមុខ។
«យើងនៅទីនេះដើម្បីពិនិត្យឲ្យបានស៊ីជម្រៅលើអនុសាសាន៍ទាំងនេះដើម្បីបែងចែកការទទួលខុសត្រូវនិងដើម្បីអភិវឌ្ឍសកម្មភាពជាក់ស្តែងសម្រាប់ធ្វើការអនុវត្តន៍អនុសាសន៍ទាំងនេះ។»
ប្រទេសកម្ពុជាបានទទួលរងការស្តីបន្ទោសប្រកបដោយការរិះគន់ជាលក្ខណៈអន្តរជាតិពាក់ព័ន្ធនឹងការបំពារបំពានលើការគោរពសិទ្ធិមនុស្ស សិទ្ធិដីធ្លីនិងសិទ្ធិសម្តែងមតិជាដើម។
លោក អ៊ូ វីរៈ ប្រធានក្រុមប្រឹក្សាភិបាលរបស់មជ្ឈមណ្ឌលសិទ្ធិមនុស្សកម្ពុជាមានប្រសាសន៍ថា អនុសាសន៍ UPR នេះជា «សម្ពាធនយោបាយអន្តរជាតិ» សម្រាប់ការលើកកម្ពស់សិទ្ធិមនុស្សនៅកម្ពុជា។ ប៉ុន្តែលោក អ៊ូ វីរៈ ចាត់ទុកថា គណបក្សជាប់ឆ្នោតទាំងពីរគឺគណបក្សប្រជាជនកម្ពុជានិងគណបក្សសង្គ្រោះជាតិមានការទទួលខុសត្រូវក្នុងការជំរុញការលើកកម្ពស់សិទ្ធិមនុស្សនេះ៕
