ហ្សឺណែវ៖ អគ្គស្នងការអង្គការសហប្រជាជាតិទទួលបន្ទុកខាងកិច្ចការសិទ្ធិមនុស្ស លោកស្រី ណាវី ពីឡៃ អំពាវនាវឲ្យរដ្ឋាភិបាល អេហ្ស៊ីបផ្លាស់ប្ដូរប្រព័ន្ធដែលនាំឲ្យមានបទរំលោភមកលើសិទ្ធិនុស្សដ៏រីករាលដាល។
លោកស្រីមានប្រសាសន៍ថា លោកស្រីតក់ស្លុតដោយឃើញចំនួនមនុស្សរងគ្រោះកាន់តែច្រើន ហើយលោកស្រី អំពាវនាវដល់យោធា និងប៉ូលិស សុំបន្ធូរកម្លាំង នៅក្នុងបាតុកម្មដើរតវ៉ាកាលពីថ្ងៃអង្គារ។ លោកស្រីថ្លែងទៀតថា ការិយាល័យរបស់លោកស្រីបានទទួលសេចក្ដីរាយកាណ៍ក្រៅផ្លូវការថា មនុស្សប្រមាណ ៣០០ នាក់ បានស្លាប់ដោយសារអំពើឃោរឃៅពាក់ព័ន្ធនឹងបាតុកម្ម ហើយជាង ៣.០០០នាក់របួស និងច្រើនរយនាក់ទៀតបានត្រូវចាប់ឃុំ។
រូភើត ខូវិល (Rupert Colville)ដែលជា អ្នកនាំពាក្យរបស់លោកស្រីអគ្គស្នងការថ្លែងថា លោកស្រីអគ្គស្នងការថ្កោលទោសការប្រើប្រាស់កម្លាំងហួសហេតុ ហើយលោកស្រីអំពាវនាវសុំឲ្យមានការស៊ើបអង្កេតមកលើមុខនាទីរបស់កងកម្លាំងសន្ដិសុខនៅក្នុងអំពើឃោរឃៅកើតឡើងកាលពីបុន្មានថ្ងៃកន្លងទៅនេះ។
លោក ខូវិល ថ្លែងថា ទុក្ខវេទនាដ៏យូរអង្វែងរបស់ពលរដ្ឋអេហ្ស៊ីបជាកត្ដាធំ នៅក្នុងការតវ៉ាបាតុកម្មនោះ។ លោកបន្តថា៖
«ប្រជាពលរដ្ឋបានបដិសេធយ៉ាងច្បាស់នូវប្រព័ន្ធដែលធ្វើឲ្យគេគ្មានសិទ្ធិជាមូលដ្ឋាន ដែលបានប្រព្រឹត្ដបទរំលោភដ៏ធ្ងន់ធ្ងរជាច្រើន ដូចជាការធ្វើទារុណកម្មជាដើម។ លោកស្រីអគ្គស្នងការមានជំនឿថា ដោយទុកជាធរមាននូវច្បាប់ប្រទេសមានគ្រាអាសន្នជាង៣០ ឆ្នាំ រដ្ឋាភិបាលអេហ្ស៊ីប បានបង្ហាញច្បាស់ឲ្យឃើញថា សិទ្ធិមនុស្ស មិនមែនជាអាទិភាពចំបង របស់ខ្លួនទេ»។
ច្បាប់ប្រទេសមានគ្រាអាសន្នបានត្រូវតាក់តែងឡើងនៅឆ្នាំ១៩៨១ ក្រោយពីមានឃាតកម្មមកលើប្រធានាធិបតី អង់វ៉ា សាដាត។ ហើយច្បាប់នេះមិនបានត្រូវដកចេញទេ។ លោក ខូលវិល កត់សម្គាល់ថា ច្បាប់ប្រទេសមានគ្រាអាសន្នបើកផ្លូវឲ្យកងកម្លាំងការពារសន្ដិសុខ និងស្ថាប័នរដ្ឋដទៃ ធ្វើការរំលោភលើសិទ្ធិរបស់ប្រជាពលរដ្ឋតាមអំពើចិត្ដ។
ប្រែសម្រួលដោយ អ៊ូ ធួក
