អ៊ុយក្រែននិយាយនៅថ្ងៃពុធនេះថារុស្ស៊ីបានវាយប្រហារដោយដ្រូនចំនួន១៤គ្រឿងនិងកាំជ្រួចមីស៊ីល Cruise ដែលជាផ្នែកមួយនៃការវាយប្រហារនៅពេលថ្មីៗនេះរបស់ខ្លួន។
កងទ័ពអាកាសអ៊ុយក្រែនបាននិយាយថាប្រព័ន្ធការពារដែនអាកាសរបស់ខ្លួនបានបាញ់ទម្លាក់ដ្រូនទាំងអស់ដែលបានហោះមកកាន់ទិសដៅនៅផ្នែកនានានៃតំបន់ភាគកណ្តាល អាគ្នេយ៍និងខាងលិចប្រទេសអ៊ុយក្រែន។
មិនមានសេចក្តីរាយការណ៍ភ្លាមៗពីការខូចខាតឬមនុស្សស្លាប់និងរងរបួសទេ។
យោធាអ៊ុយក្រែនក៏បាននិយាយដែរថាកាំជ្រួចមីស៊ីលរុស្ស៊ីធុនX-22បានធ្លាក់នៅវាលក្នុងតំបន់ Zaporizhzhiaដោយមិនបានហោះទៅដល់ទីដៅរបស់វា។
អ៊ុយក្រែនបានកំណត់អត្តសញ្ញាណដ្រូនរុស្ស៊ីទាំងនោះជាដ្រូន Shahedធ្វើនៅប្រទេសអ៊ីរ៉ង់ ហើយការវាយប្រហារនៅពេលថ្មីៗបំផុតនេះបានកើតមានឡើងបន្ទាប់ពីការព្រមានដោយសហរដ្ឋអាមេរិកថាអ៊ីរ៉ង់អាចផ្តល់ឱ្យរុស្ស៊ីនូវកាំជ្រួចបាល្លីស្ទិកដើម្បីប្រើប្រាស់នៅក្នុងសង្គ្រាមរបស់ខ្លួននៅក្នុងប្រទេសអ៊ុយក្រែន។
អ្នកនាំពាក្យក្រុមប្រឹក្សាសន្តិសុខជាតិលោក John Kirbyបានប្រាប់ពួកអ្នកយកព័ត៌មានកាលពីថ្ងៃអង្គារម្សិលមិញថា«នៅក្នុងការឆ្លើយតបដល់ការជួយឧបត្ថម្ភនេះ រុស្ស៊ីបានផ្តល់ឱ្យរដ្ឋាភិបាលអ៊ីរ៉ង់វិញនូវកិច្ចសហប្រតិបត្តិការខាងការពារប្រទេសដែលមិនធ្លាប់មានកាលពីពេលមុន រួមមានកាំជ្រួចមីស៊ីល អេឡិចត្រូនិកនិងប្រព័ន្ធការពារដែនអាកាស»។
លោកKirbyបាននិយាយទៀតថាបន្ថែមពីដ្រូន អ៊ីរ៉ង់បានផ្តល់ឱ្យរុស្ស៊ីរួចហើយនូវគ្រាប់បែកទម្លាក់ពីលើអាកាសដែលមានការបញ្ជានិងគ្រាប់កាំភ្លើងសម្រាប់ប្រើនៅក្នុងប្រទេសអ៊ុយក្រែន៕
ព័ត៌មានខ្លះនៃសេចក្តីរាយការណ៍នេះដកស្រង់ពីទីភ្នាក់ងារសារព័ត៌មាន AP, AFPនិង Reuters។
