រដ្ឋាភិបាលអ៊ុយក្រែនបានបញ្ជាក់នៅថ្ងៃអង្គារនេះថា ការវាយប្រហាររបស់រុស្ស៊ីលើតំបន់ពីរកន្លែងនៃប្រទេសអ៊ុយក្រែនបានធ្វើឱ្យមនុស្សយ៉ាងតិច ៨ នាក់រងរបួស។
នៅក្នុងតំបន់ Kherson នៅភាគខាងត្បូងប្រទេសអ៊ុយក្រែន ការវាយប្រហារតាមអាកាសនិងការបាញ់ផ្លោងដោយកាំភ្លើងធំរបស់រុស្ស៊ីបានធ្វើឱ្យមនុស្ស ៤ នាក់រងរបួស និងបានធ្វើឱ្យផ្ទះជាច្រើនខ្នងរងការខូចខាត។ នេះបើតាមការបញ្ជាក់របស់រដ្ឋមន្ត្រីក្រសួងមហាផ្ទៃអ៊ុយក្រែនលោក Igor Klymenko នៅលើបណ្ដាញសង្គមអនឡាញ។
លោក Klymenko ក៏បាននិយាយផងដែរថា ការវាយប្រហាររបស់រុស្ស៊ីនៅក្នុងតំបន់ Kharkiv នៅភាគឦសានប្រទេសអ៊ុយក្រែនបានធ្វើឱ្យមនុស្ស ៤ នាក់រងរបួស។
ទាំងអ៊ុយក្រែននិងរុស្ស៊ីសុទ្ធតែបានបញ្ជាក់នៅថ្ងៃអង្គារនេះថា យោធារបស់ខ្លួនបានបង្អាក់ការវាយប្រហាររបស់យានយន្តគ្មានមនុស្សបើករបស់សត្រូវ។
ក្រសួងការពារជាតិរុស្ស៊ីបានលើកឡើងថា ខ្លួនបានបំផ្លាញទូកអ៊ុយក្រែន ៣ គ្រឿងនៅភាគខាងជើងនៃសមុទ្រខ្មៅ។
រុស្ស៊ីបានបន្ថែមថា ខ្លួនបានធ្វើប្រតិបត្តិការ «ប្រឆាំងនឹងសកម្មភាពបំផ្លាញដោយចេតនា» នៅជិតកំពង់ផែក្រុង Sevastopol ដែលជាទីតាំងរបស់កងនាវារបស់ខ្លួននៅសមុទ្រខ្មៅ។
កងទ័ពជើងអាកាសរបស់អ៊ុយក្រែនបានបញ្ជាក់ថា ប្រព័ន្ធការពារដែនអាកាសរបស់ខ្លួនបានបាញ់ទម្លាក់ដ្រូន ៦ គ្រឿងដែលរុស្ស៊ីបានបាញ់ចេញពីតំបន់គ្រីមា (Crimea)៕
ព័ត៌មានខ្លះសម្រាប់សេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AFP និងទីភ្នាក់ងារសារព័ត៌មាន Reuters។
