ប្រធានាធិបតីអ៊ុយក្រែនលោក Volodymyr Zelenskyy បានបញ្ជាក់ពីភាពចាំបាច់នូវប្រព័ន្ធការពារដែនអាកាស និងការស្ថាបនាឡើងវិញនូវប្រព័ន្ធថាមពលរបស់ប្រទេសលោក ខណៈលោកបានថ្លែងទៅកាន់សន្និសីទស្តីពីការស្ថាបនាប្រទេសអ៊ុយក្រែនឡើងវិញ ដែលរៀបចំឡើងដោយប្រទេសអាល្លឺម៉ង់កាលពីថ្ងៃអង្គារ។
លោក Zelenskyy បាននិយាយថា កងកម្លាំងរុស្ស៊ីបានកំណត់យកហេដ្ឋារចនាសម្ព័ន្ធថាមពលអ៊ុយក្រែន ធ្វើជាគោលដៅនៃការវាយប្រហារក្នុងពេលកន្លងទៅ ដោយធ្វើការវាយប្រហារតាមដ្រូននិងគ្រាប់មីស៊ីល ដោយបំផ្លាញសមត្ថភាពផលិតថាមពលអ៊ុយក្រែនអស់ពាក់កណ្តាលចាប់តាំងពីរដូវរងាក្នុងពេលកន្លងទៅ។
លោកនិយាយទៀតថា ក្រោយសង្គ្រាមអស់រយៈពេល ២ ឆ្នាំកន្លងទៅ កងយោធាអ៊ុយក្រែន បានបង្ហាញថា ខ្លួនអាចទប់ទល់ជាមួយរុស្ស៊ីបាននៅសមរភូមិជួរមុខ និងនៅតែអាចប្រើប្រាស់បានសមុទ្រខ្មៅដដែល។
ប៉ុន្តែលោក Zelenskyy និយាយថា៖ «រុស្ស៊ីមានប្រៀបខ្លាំងជាយុទ្ធសាស្ត្រលើអ៊ុយក្រែន គឺលើផ្ទៃអាកាស។ វាជាការវាយប្រហារដោយគ្រាប់មីស៊ីលនិងគ្រាប់ផ្លោង ដែលបានជួយដល់កងទ័ពថ្មើរជើងរបស់គេនៅលើដីឱ្យរុលទៅមុខ។ មានតែប្រព័ន្ធការពារដែនអាកាសប៉ុណ្ណោះទេ ដែលអាចឆ្លើយតបលើរឿងនេះបាន»។
លោកនិយាយទៀតថា អ៊ុយក្រែនសង្ឃឹមថា ខ្លួននឹងទទួលបាននូវជំនួយដែលមានទឹកប្រាក់រាប់ពាន់លានដុល្លារ សម្រាប់កងយោធាអ៊ុយក្រែននិងសេចក្តីត្រូវការខាងហេដ្ឋារចនាសម្ព័ន្ធរបស់ខ្លួន។
សន្និសីទក្នុងទីក្រុងបែរឡាំង ប្រទេសអាល្លឺម៉ង់នេះ កើតមានឡើងតែប៉ុន្មានថ្ងៃប៉ុណ្ណោះ មុនសន្និសីទស្តីពីសន្តិភាពមួយ ដែលនឹងត្រូវប្រារព្ធធ្វើឡើងនៅក្នុងប្រទេសស្វីសនៅចុងសប្តាហ៍នេះ ដែលមានប្រទេសនិងអង្គការប្រមាណ ៩០ ចូលរួម ដែលនឹងធ្វើការក្នុងក្របខណ្ឌមួយ ដើម្បីបង្កើតឡើងនូវផែនការសន្តិភាពមួយ ក៏ដូចជារកវិធីដើម្បីធ្វើឱ្យរុស្ស៊ីនិងអ៊ុយក្រែនចូលរួមពាក់ព័ន្ធនៅក្នុងដំណើរការសន្តិភាពនេះ។
រុស្ស៊ីនឹងមិនចូលរួមនៅក្នុងកិច្ចប្រជុំសន្តិភាពនៅក្នុងប្រទេសស្វីសនេះឡើយ៕
ព័ត៌មានខ្លះសម្រាប់សេចក្តីរាយការណ៍នេះផ្តល់ដោយទីភ្នាក់ងារសារព័ត៌មានAssociated Press និង Reuters។
វេទិកាបញ្ចេញមតិ