ប៉ូលិស Uganda និយាយថា គេបានចាប់ខ្លួនមនុស្សរាប់សិបនាក់ដែលជាសកម្មជននយោបាយប្រឆាំងនៅសប្តាហ៍នេះ។ ការចាប់ខ្លួននេះកើតមានឡើងស្របពេលមានការសន្និដ្ឋានថា លោកប្រធានាធិបតី Yoweri Museveni នឹងធ្វើការកែប្រែរដ្ឋធម្មនុញ្ញដើម្បីឲ្យលោកអាចឈរឈ្មោះធ្វើជាប្រធានាធិបតីមួយអាណត្តិទៀតនៅឆ្នាំ២០២១។
រដ្ឋធម្មនុញ្ញ Uganda ចែងថា បេក្ខជនប្រធានាធិបតីត្រូវតែមានអាយុតិចជាង៧៥ឆ្នាំ នៅពេលឈរឈ្មោះសម្រាប់ការបោះឆ្នោត។ លោក Museveni ដែលបានកាន់អំណាច៣១ឆ្នាំមកនោះ នឹងមានអាយុ៧៧ឆ្នាំនៅក្នុងការបោះឆ្នោតលើកក្រោយ។
លោកស្រី Ingrid Turinawe មន្ត្រីអង្គការវេទិកាសម្រាប់ការផ្លាស់ប្តូរតាមប្រជាធិបតេយ្យបានប្រាប់ទីភ្នាក់ងារព័ត៌មាន AFPថា លោកស្រីជឿថា ការចាប់ខ្លួនសមាជិកគណបក្សប្រឆាំង៥៦នាក់កាលពីថ្ងៃពុធគឺជាប់ទាក់ទងនឹងបញ្ហានេះ។
លោក Museveni មិនទាន់បានប្រាប់អំពីចេតនារបស់លោកជាសាធារណៈទេក្នុងការឈរឈ្មោះមួយអាណត្តិទៀតនោះទេ ដោយលោកប្រាប់បណ្តាញព័ត៌មាន Uganda កាលពីថ្ងៃពុធថា កុំឲ្យខាតពេលដោយសារតែពាក្យចចាមអារ៉ាមអំពីការធ្វើវិសោធនកម្មរដ្ឋធម្មនុញ្ញនោះ៕
