ប៉ូលិសនៃប្រទេសអ៊ូហ្គង់ដាបានចាប់ខ្លួនលោក Kizza Besigye ម្តងទៀតកាលពីថ្ងៃច័ន្ទ បន្ទាប់ពីមេដឹកនាំនៃគណបក្សប្រឆាំងរូបនេះមានគម្រោងដឹកនាំធ្វើបាតុកម្មប្រឆាំងនឹងគណៈកម្មាធិការរៀបចំការបោះឆ្នោត ដើម្បីប្រមូលភស្តុតាងអំពីលទ្ធផលនៃការបោះឆ្នោតប្រធានាធិបតី។
នេះគឺជាការចាប់ខ្លួនលើកចុងក្រោយបង្អស់ ក្រោយពីលោក Kizza Besigye បានចាញ់ឆ្នោតកាលពីថ្ងៃព្រហស្បតិ៍ទៅលោកប្រធានាធិបតីYoweri Museveni ដែលកំពុងកាន់តំណែង។
លោក Besigye មានបំណងដឹកនាំធ្វើបាតុកម្មប្រឆាំងនឹងគណៈកម្មាធិការរៀបចំការបោះឆ្នោតដោយធ្វើដំណើរចេញពីផ្ទះរបស់លោក ដែលជាកន្លែងដែលលោកនឹងប្រមូលផ្តុំភស្តុតាងដែលលោកថាអាចនឹងជួយដល់លោកធ្វើការសម្រេចចិត្តថានឹងត្រូវប្តឹងជំទាស់ទៅកាន់តុលាការកំពូលជុំវិញការចាញ់ឆ្នោតរបស់លោក។
ប៉ុន្តែមេធាវីរបស់លោក Besigye បានថ្លែងថា ប៉ូលិសបានចាប់ខ្លួនលោកនៅពេលដែលលោកចាកចេញពីរបងផ្ទះរបស់លោក។
លោកមេធាវី Peter Magelah គឺជាប្រធានគម្រោងនៅអង្គការ Chapter Four ដែលជាអង្គការសិទ្ធិស៊ីវិលប្រចាំនៅរដ្ឋធានី កំប៉ាឡា។ លោកថ្លែងថា បេក្ខជនមានសិទ្ធិក្នុងការប្តឹងជំទាស់ជុំវិញលទ្ធផលនៃការបោះឆ្នោតទៅកាន់តុលាការកំពូលក្នុងរយៈពេល១០ថ្ងៃក្រោយពេលប្រកាសលទ្ធផលឆ្នោត។
លោកមេធាវី Peter Magelah ថ្លែងថា៖ «ប្រសិនបើរដ្ឋាភិបាលកាន់អំណាចជឿថាគណបក្សរបស់ខ្លួនបានឈ្នះសំឡេងឆ្នោតដោយពិតប្រាកដមែននោះ ត្រូវអនុញ្ញាតឲ្យលោក Besigye ប្តឹងពីព្រោះថាប្រសិនបើពុំមានភស្តុតាងទេ លោកនឹងនៅតែចាញ់នៅក្នុងតុលាការដដែល ដូច្នេះវាប្រឆាំងនឹងភាពយុត្តិធម៌ ប្រឆាំងនឹងហេតុផល ដោយការព្យាយាមហាមឃាត់លោកក្នុងការនាំយកភស្តុតាងទៅកាន់តុលាការ»។
លោក Magelah ថ្លែងថា ផ្ទុយទៅវិញកងកម្លាំងសន្តិសុខគួរតែជួយសម្រួលដល់គម្រោងរបស់លោក Besigye។
លោក Magelah ថ្លែងថា៖«សម្រាប់ខ្ញុំ ដំបូន្មានរបស់ខ្ញុំគឺ ឲ្យប៉ូលិសនិងភ្នាក់ងារសន្តិសុខបើកផ្លូវឲ្យលោកស្វែងរកភស្តុតាង គឺភស្តុតាងដែលលោកកំពុងតែស្វែងរក ហើយត្រូវធ្វើឲ្យប្រាកដថាលោកមានសុវត្ថិភាព ហើយអ្នកដទៃទៀតក៏មានសុវត្ថិភាពផងដែរ»។
លោកមេធាវី Robert Kirunda នៅរដ្ឋធានី កំប៉ាឡា បានផ្តល់ដំណោះស្រាយមួយផ្សេងទៀត។
លោកមេធាវី Robert Kirunda ថ្លែងថា៖«វាជាការត្រឹមត្រូវសម្រាប់ប៉ូលិសក្នុងការនិយាយថា លោកមិនអាចរំខានសន្តិភាពដោយការធ្វើដូច្នេះបានទេ។ ដូច្នេះអ្វីដែលពួកគេគួរធ្វើគឺផ្តល់ភស្តុតាងដល់លោក»។
លោក Kirunda បានលើកឡើងថា ប៉ូលិសបានចាប់ខ្លួនរបស់លោក Besigye មុននឹងលោកបានប្រព្រឹត្តបទល្មើស ដែលត្រូវបានគេហៅថា «ការចាប់ខ្លួនដើម្បីការពារទុកជាមុន»។
លោក Robert Kirunda ថ្លែងថា៖«ឥឡូវនេះប្រសិនបើអ្នកនិយាយថា វាជាការចាប់ខ្លួនដើម្បីការពារទុកជាមុននោះ អីចឹងអនុញ្ញាតឲ្យលោកជួបនឹងមេធាវី ប៉ុន្តែមានបញ្ហាច្បាស់ណាស់នៅទីនេះ ដែលលោកកំពុងព្យាយាមដោះស្រាយ ហើយបញ្ហាសម្រាប់អ្នកដើម្បីប្តឹងប្រធានាធិបតី អ្នកត្រូវការភស្តុតាងដែលគួរឲ្យជឿទុកចិត្តបាន។ ភស្តុតាងនោះអាចយកបានពីគណៈកម្មាធិការរៀបចំការបោះឆ្នោត ឬពីទីភ្នាក់ងាររបស់លោក ពិសេសនៅទីនេះ ប្រសិនបញ្ហាគឺជាការបូកសរុបលទ្ធផលឆ្នោត។ ប្រសិនបើលោកមិនអាចធ្វើបានដូចការលើកឡើងនេះទេ លោកមិនអាចជួបជាមួយនឹងទីភ្នាក់ងារ លោកមិនអាចជួបជាមួយនឹងមេធាវី លោកមិនអាចទៅរកគណៈកម្មាធិការរៀបចំការបោះឆ្នោតដើម្បីប្រមូលភស្តុតាង ហើយពេលនោះនឹងមានបញ្ហាធំនៅទីនេះ»។
យោងទៅតាមអ្នកនាំពាក្យនៃប៉ូលិសក្រុង កំប៉ាឡា លោក Patrick Onyangoបានឲ្យដឹងថា លោក Besigye ត្រូវបានចាប់ខ្លួនពីបទប្រមែប្រមូលក្រុមយុវជនដើម្បីព័ទ្ធចូលគណៈកម្មាធិការរៀបចំការបោះឆ្នោត ដែលលោកថ្លែងថា គឺជាផែនការបង្កអំពើហិង្សានៅក្នុងទីក្រុង កំប៉ាឡា។
រដ្ឋាភិបាលនៃប្រទេសអ៊ូហ្គង់ដាបានឲ្យដឹងថា លោក Museveni បានឈ្នះការបោះឆ្នោតកាលពីថ្ងៃព្រហស្បតិ៍ ដោយសារតែលទ្ធផលខុសគ្នាឆ្ងាយគឺសំឡេង ៦០.៨ ភាគរយ ធៀបទៅនឹងសំឡេង ៣៥.៤ ភាគរយរបស់លោក Besigye។
គណបក្សប្រឆាំងបានចោទប្រកាន់ ភ្នាក់ងាររបស់លោក Museveni ថាបានបង្កភាពមិនប្រក្រតីនៅក្នុងការបោះឆ្នោត ខណៈដែលលោក Museveni បានថ្លែងថា បេសកកម្មសង្កេតការណ៍របស់សហភាពអឺរ៉ុបគឺខុស និងមិនមានភាពជាក់លាក់ បន្ទាប់ពីបានរាយការណ៍ថាការបោះឆ្នោតត្រូវបានធ្វើឡើងក្នុងបរិយាកាសបំភិតបំភ័យ ដោយគ្មានតម្លាភាពនិងឯករាជ្យភាពនៅឯគណៈកម្មាធិការរៀបចំការបោះឆ្នោត។
លោក Museveni ឡើងកាន់អំណាចចាប់តាំងពីឆ្នាំ ១៩៨៦ នៅពេលដែលកងទ័ពតស៊ូដើម្បីជាតិរបស់លោកចូលកាន់កាប់ប្រទេសអ៊ូហ្គង់ដាដោយកម្លាំង ដោយទាញប្រទេសអ៊ូហ្គង់ដាចេញពីភាពវឹកវរបន្ទាប់ពីសង្គ្រាម៕
ប្រែសម្រួលដោយ ស្រេង លក្ខិណា
