ការសម្រេចចិត្តរបស់កម្ពុជា ដើម្បីពង្រីកមូលដ្ឋានកងទ័ពជើងទឹកដ៏ធំបំផុតរបស់ខ្លួន និងអនុញ្ញាតឱ្យកងយោធាចិនប្រើប្រាស់ដោយផ្តាច់មុខនូវផ្នែកមួយនៃមូលដ្ឋាននេះ បានបង្ហាញនូវការខ្វះតម្លាភាពយ៉ាងខ្លាំង។ នេះបើតាមការបញ្ជាក់របស់មន្ត្រីជាន់ខ្ពស់មួយរូបនៃក្រសួងការពារជាតិអាមេរិកនៅថ្ងៃព្រហស្បតិ៍នេះ ហើយដែលត្រូវបានផ្សព្វផ្សាយដោយទីភ្នាក់ងារព័ត៌មាន Reuters។
មន្ត្រីចិនមួយរូបបាននិយាយកាលពីថ្ងៃពុធថា «ភាពជាដៃគូដ៏រឹងមាំដូចដែកថែប» របស់ប្រទេសចិនជាមួយប្រទេសកម្ពុជា ត្រូវបានជំរុញឡើងតាមរយៈកិច្ចសហប្រតិបត្តិការយោធា ខណៈដែលការធ្វើទំនើបកម្មនៃមូលដ្ឋានកងទ័ពជើងទឹករាម បានចាប់ផ្តើមឡើងជាមួយនឹងការផ្តល់ថវិកាដោយប្រទេសចិន។
រដ្ឋមន្ត្រីក្រសួងការពារជាតិកម្ពុជា លោក ទៀ បាញ់ បានច្រានចោលនូវភាពភ័យខ្លាចដែលថា កម្ពុជានឹងអនុញ្ញាតឱ្យប្រទេសចិន សាងសង់មូលដ្ឋានកងទ័ពរបស់ខ្លួននៅលើទឹកដីកម្ពុជា ដោយនិយាយថា ប្រទេសណាក៏អាចប្រើប្រាស់ទីតាំងមូលដ្ឋានកងទ័ពជើងទឹករាមរបស់កម្ពុជាបានដែរ ហើយថាកម្ពុជាបើកចំហក្នុងការទទួលយកជំនួយយោធាពីប្រទេសផ្សេងៗទាំងអស់។
សហរដ្ឋអាមេរិកជឿថា ផែនការពង្រីកមូលដ្ឋានកងទ័ពជើងទឹករាមនោះ រួមមានការផ្តល់ការប្រើប្រាស់ដោយផ្តាច់មុខនៅផ្នែកខាងជើងរបស់មូលដ្ឋាននេះ សម្រាប់កងយោធាចិន ហើយថា ប្រទេសទាំងពីរនេះ មិនបានចែករំលែកនូវព័ត៌មានលម្អិត ជុំវិញផែនការរបស់រដ្ឋាភិបាលក្រុងប៉េកាំងក្នុងការប្រើប្រាស់មូលដ្ឋានយោធានេះតែម្នាក់ឯងទេ។
មន្ត្រីអាមេរិកាំងនោះ បានថ្លែងក្នុងលក្ខខណ្ឌមិនបញ្ចេញឈ្មោះថា៖ «មានការខ្វះតម្លាភាពខ្លាំងណាស់។ មានការប្រកែកថាគ្មានការពាក់ព័ន្ធរបស់កងយោធាចិន អស់ពេលជាច្រើនខែកន្លងទៅ»។
មន្ត្រីអាមេរិករូបនេះនិយាយថា ប្រទេសចិននិងកម្ពុជាកន្លងមក បានចាត់វិធានការនានា ដើម្បីលាក់បាំងសកម្មភាពរបស់កងទ័ពចិន ដែលរួមមានទាំងការលាក់បំបាំងបុគ្គលិកចិន មិនឱ្យមន្ត្រីបរទេសផ្សេងទៀតបានឃើញ ក្នុងអំឡុងពេលនៃដំណើរទស្សនកិច្ចរបស់ពួកគេទៅកាន់តំបន់មូលដ្ឋានកងទ័ពជើងទឹករាមនោះជាដើម។
មន្ត្រីអាមេរិកាំងរូបនេះបន្ថែមទៀតថា៖ «អ្វីដែលយើងក៏ដូចជាប្រទេសផ្សេងៗក្នុងតំបន់អំពាវនាវនោះ គឺសុំឱ្យមានតម្លាភាពកាន់តែច្រើនឡើងថែមទៀត ជុំវិញសកម្មភាពផ្សេងៗរបស់កងទ័ពចិននៅក្នុងប្រទេសកម្ពុជា ហើយថា ការខ្វះតម្លាភាពបានធ្វើឱ្យមានការព្រួយបារម្ភ និងនាំឱ្យមានការមន្ទិលសង្ស័យ នៅក្នុងចំណោមប្រទេសមួយចំនួននៅក្នុងតំបន់»។
អត្ថាធិប្បាយរបស់មន្ត្រីអាមេរិករូបនេះធ្វើឡើង ស្របពេលដែលរដ្ឋមន្ត្រីការពារជាតិអាមេរិកលោក Lloyd Austin បានទៅដល់ប្រទេសសិង្ហបុរី ដើម្បីជួបប្រជុំជាមួយសមភាគីអាស៊ីមួយចំនួនរបស់លោក ដែលក្នុងនោះ រួមមានការជួបប្រជុំមួយ ដែលត្រូវបានរំពឹងទុក ជាមួយរដ្ឋមន្ត្រីការពារជាតិចិន គឺលោកឧត្តមសេនីយ៍ Wei Fenghe ផងដែរ។
សហរដ្ឋអាមេរិក និងប្រទេសចិនត្រូវគេរំពឹងថា នឹងប្រើប្រាស់កិច្ចប្រជុំសន្តិសុខជាន់ខ្ពស់របស់អាស៊ីនេះ ដើម្បីរិះគន់គ្នាទៅវិញទៅមក រាប់តាំងពីបញ្ហាបូរណភាពទឹកដីកោះតៃវ៉ាន់ រហូតដល់សង្រ្គាមនៅក្នុងប្រទេសអ៊ុយក្រែន បើទោះបីជាប្រទេសទាំងពីរនេះ ធ្លាប់បានបង្ហាញនូវឆន្ទៈក្នុងការពិភាក្សាស្តីពីការខ្វែងគំនិតគ្នាក៏ដោយ។
ទំនាក់ទំនងរវាងកម្ពុជានិងអាមេរិក មានភាពរកាំរកូសអស់រយៈពេលជាច្រើនឆ្នាំមកហើយ ជុំវិញការចោទប្រកាន់របស់អាមេរិកដែលថា លោកនាយករដ្ឋមន្ត្រី ហ៊ុន សែន ដែលបានកាន់តំណែងដ៏យូរមកហើយ និងគណបក្សគ្រប់គ្រងអំណាចរបស់លោក បានបំផ្លាញលទ្ធិប្រជាធិបតេយ្យ តាមរយៈការធ្វើទុក្ខបុកម្នេញលើគណបក្សប្រឆាំង។
កាលពីមួយឆ្នាំមុន កម្ពុជាបាននិយាយថា ខ្លួនបានវាយចោលអគារមួយខ្នងដែលសាងសង់ឡើងដោយថវិការបស់អាមេរិក នៅក្នុងមូលដ្ឋានកងទ័ពជើងទឹករាមនោះ ដើម្បីធ្វើការពង្រីកទីតាំងនេះថែមទៀត។
ដើម្បីគូសបញ្ជាក់ពីចំណងទាក់ទងដ៏កក់ក្តៅជាមួយប្រទេសចិន លោក ទៀ បាញ់ នៅសប្ដាហ៍នេះ បានបង្ហោះរូបថតមួយចំនួននៅលើបណ្តាញសង្គម ដែលលោកបានថតជាមួយឯកអគ្គរដ្ឋទូតចិនប្រចាំនៅកម្ពុជា គឺលោក Wang Wentian ដែលបានចុះមុជទឹកសមុទ្រជាមួយគ្នានោះ។
ក៏ប៉ុន្តែលោក ទៀ បាញ់ ក៏បង្ហាញបំណងចង់បន្ធូរនូវការភ័យខ្លាចក្នុងសហរដ្ឋអាមេរិក និងក្នុងប្រទេសក្នុងតំបន់ផងដែរ ដែលថាកម្ពុជា អាចបើកទ្វារទទួលកងទ័ពចិននោះ៕
ប្រែសម្រួលដោយ លោក ជ្រា វណ្ណរិទ្ធ
