ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ចំនួន​ឧកញ៉ា​ក្នុង​ជួរ​កង​កម្លាំង​ប្រដាប់​អាវុធ​កើន​ដល់​១៣២ នាក់


រូបភាព​ឯកសារ៖ ក្រសួង​មហាផ្ទៃ​ នៅតាម​បណ្តោយ​មហាវិថី​នរោត្តម​ ក្នុង​រាជធានី​ភ្នំពេញ​ កាលពី​ថ្ងៃទី​២៤ ខែ​មករា ឆ្នាំ​២០១៧។ (VOA)

ក្រសួង​មហាផ្ទៃ​នឹង​បើក​កិច្ច​ប្រជុំ​ពិសេស​មួយ​ក្នុង​សប្តាហ៍​នេះ​ ដើម្បី​កំណត់​ឲ្យ​ឧកញ៉ា​ក្នុង​ជួរ​នគរ​បាល​ទាំង​នោះ បោះបង់​តួនាទី​មួយ និង​រក្សា​តួនាទី​មួយ។

ឧកញ៉ា​ដែល​កំពុង​មាន​តួនាទី​ខ្ពស់​ក្នុង​ជួរ​កង​កម្លាំង​ប្រដាប់​អាវុធ​កើន​ដល់​ចំនួន​១៣២​នាក់​ដែល​ក្នុង​នោះ​ឧកញ៉ា​ជិត​១០០​នាក់​ជា​មន្ត្រី​យោធា។ ក្រសួង​មហាផ្ទៃ​នឹង​បើក​កិច្ច​ប្រជុំ​ពិសេស​មួយ​ក្នុង​សប្តាហ៍​នេះ​ ដើម្បី​កំណត់​ឲ្យ​ឧកញ៉ាក្នុង​ជួរ​នគរ​បាល​ទាំង​នោះ បោះ​បង់​តួនាទី​មួយ​ និង​រក្សា​តួនាទី​មួយ​។​ ​

ក្រសួង​មហាផ្ទៃ​គ្រោង​នឹង​បើក​កិច្ច​ប្រជុំ​ពិសេស​មួយ​នៅថ្ងៃព្រហស្បតិ៍សប្តាហ៍​នេះ ដើម្បី​ឲ្យ​ឧកញ៉ា​ចំនួន​៣២​នាក់​ជ្រើសរើស​ជា​ចុង​ក្រោយ​រវាង​តួនាទី​ខ្ពស់​ក្នុង​ក្រសួង​មហាផ្ទៃ​ និង​ងារ​ជា​ឧកញ៉ា​ដែល​តំណាង​ឲ្យ​អ្នក​កាន់​កាប់​មុខ​ជំនួញ​មាន​ទ្រព្យ​សម្បត្តិ​ហូរហៀរ។ នេះ​បើ​តាម​ការ​បញ្ជាក់របស់អ្នកនាំពាក្យ​ក្រសួង​មហាផ្ទៃ។

ក្រៅ​ពី​ចំនួន​ឧកញ៉ា​ក្នុង​ក្រប​ខណ្ឌ​នគរបាល ​ក្រសួង​ការពារ​ជាតិ​ក៏​បាន​រក​ឃើញ​ថា​ ចំនួន​ឧកញ៉ា​ដែល​កំពុង​កាន់​តួនាទីសំខាន់​ៗ​ក្នុង​កង​កម្លាំង​យោធា ​បាន​កើន​ដល់​ចំនួន​៩៩​នាក់​។​

នាយ​ឧត្តម​សេនីយ៍​ ខៀវ សុភ័គ អ្នកនាំពាក្យ​ក្រសួង​មហាផ្ទៃ​ប្រាប់ VOA នៅ​ថ្ងៃ​ចន្ទ​នេះ​ថា ​ក្នុង​ក្រប​ខណ្ឌ​ក្រសួង​មហាផ្ទៃ​មាន​ឧកញ៉ា​ចំនួន​៣៣​រូប ​ដែល​ក្នុង​ចំណោម​នោះ​មាន​ឧកញ៉ា​ម្នាក់​បាន​លាលែង​ពី​តួនាទី​ជា​មន្ត្រី​មុន​ការ​ប្រកាស​គោល​ការណ៍​របស់​ក្រសួង។ លោក​បន្ត​ថា រដ្ឋមន្រ្តី​ក្រសួង​មហាផ្ទៃ​គឺ​លោក​ស ខេង នឹង​បើក​កិច្ច​ប្រជុំ​មួយនៅ​ថ្ងៃ ព្រហស្បតិ៍ទី​១២​ខែកញ្ញា ​ដើម្បី​សម្រេច​ថា​តើ​ឧកញ៉ាទាំង​នោះ​នឹង​ត្រូវ​ជ្រើស​យក​តួនាទីក្នុង​ក្រប​ខណ្ឌ​នគរបាល ឬ​ក៏​រក្សា​ងារ​ជា​ឧកញ៉ា។

«ជា​គោល​ការណ៍​ប្រសិន​បើ​គាត់​ស្ម័គ្រ​ចិត្ត​លាលែង​ពី​ណាមួយ​វា​គឺជា​ការ​ល្អ ដូច្នេះ​ហើយ​បាន​ក្នុង​រឿង​នេះ​សម្តច​ក្រលា​ហោម​លោក​នឹង​បើក​កិច្ច​ប្រជុំ​មួយ​នៅ​ថ្ងៃ​ទី​១២ លោក​នឹងដឹកនាំ​ការងារ​ហ្នឹង»។

ចំណែក​នាយ​ឧត្តម​សេនីយ៍​ ឈុំ សុជាត អ្នកនាំពាក្យ​ក្រសួង​ការពារ​ជាតិ​លើក​ឡើង​ថា រហូត​មក​ដល់​ពេល​នេះ ចំនួន​ឧកញ៉ា​ដែល​ស្ថិត​ក្នុង​ជួរ​កង​កម្លាំង​យោ​ធា​មាន​ចំនួន​៩៩​នាក់ ក្នុង​នោះ​មាន​ក្របខណ្ឌ​ក្រសួង​ចំនួន​៣៤​នាក់ និង​ក្នុង​ក្រប​ខណ្ឌ​អគ្គបញ្ជា​ការ​មាន​ចំនួន​៦៥​នាក់។ លោក​បន្ត​ថា មាន​ឧកញ៉ា​មួយ​ចំនួន​បាន​បញ្ជាក់​ពី​ចេតនា​លា​ឈប់​ពី​តួនាទី​ជាន់​ខ្ពស់​ក្នុង​យោធា​ដើម្បី​រក្សា​ងារ​ជា​ឧកញ៉ា។ ​ប៉ុន្តែ​នៅ​មិន​ទាន់​មាន​ការ​ធ្វើ​តាម​និតិវិធី​ជាផ្លូវ​ការនៅ​ឡើយ។

«ម៉េចៗ​ទៀត​អាហ្នឹង​អត់​ទាន់​មាន​អី​កំណត់​ច្បាស់​លាស់​ទេ ទាល់​តែ​ចាំ​មាន​ក្រដាស​ស្នាម​ពី​នាយក​ដ្ឋាន​បុគ្គលិក​មក អាហ្នឹង​បាន​ច្បាស់​លាស់​បាន។​ ឥឡូវ​គេ​កំពុង​ធ្វើ​ជំរឿន»។​

ការសម្រច​នេះ​ធ្វើ​ឡើង​ជា​បន្តបន្ទាប់​ ក្រោយ​ពេល​ដែល​លោក​នាយក​រដ្ឋ​មន្ត្រី ​ហ៊ុន សែន បាន​ដាក់​បញ្ជា​កាល​ពី​ពាក់​កណ្តាល​ខែសីហា ឲ្យ​ក្រុម​មន្ត្រី​ក្នុង​ជួរ​កង​កម្លាំង​ប្រដាប់​អាវុធ​ដែល​មាន​ងារ​ជា​ឧកញ៉ា ត្រូវ​តែ​ជ្រើសរើស​ជា​បន្ទាន់​ រវាង​ងារ​ជា​ឧកញ៉ា និង​តួនាទី​ជា​កង​កម្លាំង​ប្រដាប់​អាវុធ។

ក្រុម​មន្ត្រី​ផ្លូវ​ការ​អះអាង​ថា បទបញ្ជា​របស់​លោក​ ហ៊ុន សែន គឺ​ «ដើម្បី​លុ​បបំបាត់​ទំនាស់​ផល​ប្រយោជន៍​រវាង​ឈ្មួញ​ដែល​តំណាង​ឲ្យ​ឧកញ៉ា​ និង​មន្ត្រី​ដែល​មាន​តួនាទី​ខ្ពស់​ក្នុង​រដ្ឋា​ភិបាល។

ការ​ដាក់​បញ្ជា​របស់​ប្រមុខ​រដ្ឋា​ភិបាល​កម្ពុជា​ ​ធ្វើ​ឡើង​ក្រោយ​ពី​មន្ត្រី​យោធា​មួយ​រូប​ដែល​មាន​ងារ​ជា​ឧកញ៉ា ត្រូវ​បាន​ចាប់​ខ្លួន ​និង​ចោទ​ប្រកាន់​តាម​ផ្លូវ​តុលាការ​ ក្រោយ​ពី​រក​ឃើញ​ថា​មន្ត្រី​យោធា​រូប​នោះ​បាន​ប្រព្រឹត្ត​បទល្មើស​ទាក់​ទង​នឹង​ឧក្រិដ្ឋកម្ម​កាប់​បំផ្លាញ​ព្រៃឈើ។ ចំណែក​ឧកញ៉ា​មួយ​ចំនួន​ទៀត​ដែល​មាន​តួនាទី​ក្នុង​ជួរ​កម្លាំង​ប្រដាប់​អាវុធ​ដែរ​នោះ ក៏​មាន​ការ​ពាក់​ព័ន្ធ​នឹង​ការ​ប្រព្រឹត្តិ​បទ​ឧក្រិដ្ឋ​ធ្ងន់ធ្ងរ​ផ្សេងៗនា​ពេល​កន្លង​មក។​ នេះ​បើ​ផ្អែក​តាម​សេចក្តី​រាយការណ៍​នានា​របស់​សារព័ត៌មាន​ក្នុង​ស្រុក។

​លោក ឱក សេរីសោភក្តិ៍ អ្នក​ជំនាញ​ផ្នែក​អភិបាល​កិច្ច​ល្អ​ក្នុង​ប្រទេស​កម្ពុជា ធ្លាប់បាន​លើកឡើង​ថា ការ​កំណត់​ឲ្យ​ក្រុម​ឧកញ៉ា​លាលែង​ពី​ការងារ​ក្នុង​ស្ថាប័ន​រដ្ឋ​គឺជា​រឿង​ត្រឹម​ត្រូវ​ ដើម្បី​ចៀស​វាង​ការ​ដែលក្រុម​មន្ត្រី​ទាំង​នោះ​អាចយក​តួនាទី​ក្នុង​រាជការ​ទៅ​ការពារ​មុខ​របរ​ជំនួញ​របស់​ខ្លួន។

បើ​តាម​តួលេខ​កាល​ពី​ឆ្នាំ២០០៧ ​ឧកញ៉ា​ក្នុង​ប្រទេស​កម្ពុជា​សរុប​មាន​ជាង​៧០០​នាក់។ ប៉ុន្តែ​ជាង​ដប់​ឆ្នាំ​កន្លង​មក​នេះ ប្រភព​មួយ​ចំនួន​ទៀត​បញ្ជាក់​ថា​ចំនួន​ឧកញ៉ា​នៅ​ក្នុង​ប្រទេស​កម្ពុជា​អាច​កើន​ដល់​៣០០០​នាក់។ ហើយ​ឧកញ៉ា​មួយ​ចំនួន​បំពេញ​ការ​ងារ​ជំនួញ​ផង​ និង​ការ​ងារ​ជា​ក្រប​ខណ្ឌមន្ត្រី​រាជការ​ផង ថែម​ទាំង​មាន​តួនាទី​សំខាន់​ ទាំង​ក្នុង​កង​កម្លាំង​ប្រដាប់​អាវុធ​ និង​ក្នុង​ស្ថាប័ន​រដ្ឋាភិបាល​ ​និង​ស្ថាប័ន​នីតិបញ្ញត្តិ៕​

សេចក្តីរាយការណ៍ពិសេស

  • VOA Khmer Special Report Section

    សេចក្តីរាយការណ៍ពិសេស

XS
SM
MD
LG