គេបានរាយការណ៍ថាមានមនុស្សម្នាក់ទៀតបានចូលរួមក្នុងជំនួបមួយក្នុងអាគារ Trump Tower ដែលបានកើតមានឡើងកាលពីខែមិថុនាឆ្នាំ ២០១៦ រវាងពួកសមាជិកក្រុមអ្នកឃោសនាបោះឆ្នោតប្រធានាធិបតីឱ្យ Donald Trump និងមេធាវីរុស្ស៊ីម្នាក់នៅពេលមានការពិភាក្សាគ្នាច្រើនអំពីថាតើក្រុមអ្នកឃោសនាបោះឆ្នោតនេះបានធ្វើកិច្ចសហប្រតិបត្តិការជាមួយកិច្ចខិតខំប្រឹងប្រែងណាមួយរបស់រុស្ស៊ីដើម្បីឱ្យមានឥទ្ធិពលលើការបោះឆ្នោតប្រធានាធិបតីស.រ.អា.កាលពីឆ្នាំទៅមិញឬទេ។
កាលពីថ្ងៃសុក្របណ្តាញផ្សាយព័ត៌មានពីរបានបង្ហាញអត្តសញ្ញាណពលរដ្ឋអាមេរិកាំងដើមកំណើតរុស្ស៊ីពីរនាក់គឺឈ្មោះ Anatoly Samochornov និងឈ្មោះ Rinat Akhmetshin ថាបានអមដំណើរមេធាវីរុស្ស៊ី អ្នកស្រី Natalia Veselnitskaya ទៅកាន់ជំនួបនោះដែល Donald Trump Jr. បាននិយាយពីដំបូងថាគ្រាន់តែនិយាយអំពីការហាមប្រាមរបស់រុស្ស៊ីមិនឱ្យជនជាតិអាមេរិកាំងយកពួកក្មេងៗរុស្ស៊ីមកចិញ្ចឹម។
ក្នុងសប្តាហ៍នេះ Trump Jr. បានប្រាប់ឱ្យដឹងថាគាត់បានចូលរួមក្នុងការប្រជុំគ្នានេះដោយសារគាត់បានត្រូវសន្យាថានឹងមានការប្រាប់ឱ្យគាត់ដឹងអំពីព័ត៌មានមិនល្អខ្លះអំពីលោកស្រី Hillary Clinton ដែលជាគូប្រជែងរបស់ Trump។
Rinat Askmetshin បាននិយាយប្រាប់កាសែត The Washington Post កាលពីថ្ងៃសុក្រថាគាត់បានចូលរួមក្នុងជំនួបនេះក្រោយពីមុខនាទីរបស់គាត់បានត្រូវរាយការណ៍ដោយប្រភពព័ត៌មានឯទៀតៗ។ MSNBC បានរាយការណ៍កាលពីយប់ថ្ងៃសុក្រថាអ្នកបកប្រែភាសាម្នាក់ឈ្មោះ Samochornov ក៏មានវត្តមានដែរ៕
